Opokwa ɔnang ɛnanga
21
1 Masa Jɨsɔs oker kɛ erang, azuwadanang abɛ na anang ɛnanga ki ikwukwu tsɛ ɛnanga kɔ ɔtsɔm kwa atɨm. 2 Ɛma okoro ose opokwa kpokpora kwɔ ɔnang apenni va affa. 3 Oben bɛ abɛ, “Nteg banga udɨg ɔkka, opokwa kpokpora nwa wɔ ɔnang ɔyɔnga ayog mboga ibɨng. 4 Anang mbaga areng ku zuwada kwa abɛ aba anang; opokwa nwa ko okpor pfɛ ɔtag ibɨng ɔnang.”Jɨsɔs ɔtɔnga ilɨga tsɔ ɔtsɔm kwa atɨm
5 Abuwinnam ban pɛ Jisɔs abɛ na atɔnga ɔbanga azuwada pɛ nta ra aba atɨm assi ɛnya kɔ ɔtsɔm kwa atɨm kwu Ubɨnɔkpaabyi ɔttara kɛ ɛnanga sa aba assi anang Ubɨnɔkpaabyi. Jisɔs oben, 6 “Mbyama ibɨng pya abanga ase ma, ibe arɛ ikwuma, ɛta zan mi irɨg sɛ mɛ ɛnana ko oyog, abɛ na anung ibɨng aze ki iseg.”
7 Aba abɔw, “Okpewnnwer, bigi ibe dɔ ri idɨg nda arɛ mi iyɨn? Mbang wɔ ude ɛkɔga abɛ idɨg nda arɛ nami iyɨn?”
8 Jisɔs ɔpɔna: “Abanga addo akker aba anang banga alɛg. Anang pa asawɔsaw abɛ na kwu ke etse tsam, aba aben abɛ, ‘Amma ɛma wɔ,’ ɔttara ‘Ibe kifora.’ Nang bɛ innam abuw. 9 Ibe rɛ awang idɨg rɨ nkpong ɔttara kɨ nrɨma, akwɛ ɔnang banga udɨg ɔyag, idɨg nda arɛ niyɨn pɛrɛ, ekponginnam sang mama.”
10 Ɛma okwo oteg bɛ abɛ, “Ifon ni irɨm ifon abubɛ, ɛvaar ni irɨma ɛvaar atsitsɛ. 11 Oseg fɔ ɔsawɔsaw nɛ ɛkpar etto kɛ ɛtanga, okwo ɔttara ki ikamana pyuwa ki iwang ki iwang ɔttara idɨg ri izorozora ɔttara ɛkɔga abɛ na ase kɛ ɛrang.
12 “Pɛrɛ idɨg nda ibɨng arɛ iyɨn, abɛ na atittso apfuw banga kɛ ɛffa, abɛ anang banga irem, abɛ atag banga ake ka adappa ɔttara aba ake banga ngbakɔw, abɛna atɨm banga apfona ka avaar ɔttara anang pa atɨm ɔyagbɨn seg ra abanga ukwur ka kam ke etse. 13 Mama wɔ ode ɛwang tsɛ ma ateg ɔtɔnga zuwa ɔbanga amabɛ. 14 Nang ettem tsɔ udɨg ayag tsekwe ma apɔna, pɛrɛ ibe ndo ikwu. 15 Nɨnang banga itɔnga ɔttara esonga tsɛ abanga ma atɨma pa ayogikwan pɔ aba annama ake affɨm ɔttara akkar banga ɛmma. 16 Anang pɔ, aba atte ɔttara ka aba akka, uvakka pa adwunɨng, pu uppanɨng, ɔttara ayogdɨkkɔw pɔ, abɛ na atag banga anang anang pa atɨm iseg, aba afɔ ayog ban. 17 Ɔnang kwidede nɔ ɔkwɔn-ɔ ukwur amma. 18 Isɨsar dan ri ibɨn ke etso tsɔ rɛ mi idɨm kede. 19 Dobe, na nang-ɔnanga.
20 “Ibe rɛ ase Jɛrusɛlɛm sa asɔza araw abawa, asonga abɛ iliga tsɛ kefora. 21 Tte anang pa anɨng ka Judiya araw apfona ga ka akpetso dim, ayok pa anɨng ko ofon aba ayɨn ki iyan, ayog pa anɨng ku urɨg aba anang anwa ko ofon. 22 Mama wɔ ode Ibe ri irem dɔwa tsekwɛ wɛrɛ aba akkɛr fase idɨg ndo iyɨn. 23 Nzɔn ode kwu upanɨng pa atɨm nfar ɔttara pa abɛ na anang uva ɛba, anang mba na ase irem ri ititam ma ki iseg nda ɔttara idwudwag ru Ubɨnɔkpaabyi ni etto ɛjag bɛ. 24 Asɔza na afɔ anang ɔttara aba pfuw anang masɛ agbakɔw nang apfona ki ifon ɔdwag. Ifon rɛ ɛna Izrɨrɛl nida nɛ ɛbar Jɛrusɛlɛm kɨ nfɔg tar ibe ra abɛ igba.
25 “Ikikona dɨg ninɨng ku ududon, ko offe ɔttara kɨ ndɨdor. Anang ki ifon rɔ ɔyagbɨn no ozor bɛ ɔttara ɔyag bɛ udɨg ukwur ɛkɔr tsa assi ɔttara ko obogidi mi itɨma ikwu. 26 Ayoganang nɔ ɔwar bɛ ukwur ozora ki idɨg pyuwa ra abɛ ma awanga rɛ mi iyɨn ma kɔ ɔyagbɨn, ekpo pyɛ ɛrang apyɛ ne nyeng-onyeng. 27 Ki ibe ndo abɛ na ase Unwa kwu Udwunɨng nukwu ga ka akkpang pɛ ɛrang kɛ ɛffa ɔttara ka azuwada pi ititam. 28 Ibe rɛ idɨg nda arɛ mi ititso iyɨn, bɨna bobe agge etso, ukwurabɛ ibe ki ifora tsɛ enaanga tsɔ mi ikwu.”
29 Ɔtta bɛ otse, “Ker itsi nza tsi fig ɔttara kɨ ntsi ndo ibɨng. 30 Ibe ra apyɛ efon atɔng ɔma oyen na ase, asonga abɛ issigwu ke efora. 31 Ibe ndo ɔma na se idɨg nda arɛ niyɨn, ɔma na asonga abɛ Ɛvaar tsu Ubɨnɔkpaabyi ke efora.
32 “Nnɨteg banga udɨg ɔkka, anang pa arɨg mazizan abɛ ibɨng ma ppe pɛrɛ idɨg nda arɛ iyɨn ibɨng 33 Ɛrang ɔttara ki iseg arɛ nɛ ɛkam itɨma, ɔtɔnga kwam ntɨma mɔ ɔkama.
34 “Ker-o, anang ettem tsɔ atag ake ke elowa ɔttara adwug buma ɔttara idɨg furfur ra akpen fasɛ inang banga ipfuw dambɛ ɔmma gwɔ. 35 Atse mi ikwu ekewa ɔnang kwidede ma ki iseg. 36 Do ɛkpakpa ɔttara zɔm atɨm fasɛ abanga akama ɛffa tsa abanga ma annanga ki idɨg nda rɛ mi iyɨn ɔttara sa addo abɛ pɛrɛ Unwa kwu Udwunɨng.”