Aba abɔw Jisɔs ɔwang kwɛ ɛffa tsɛ ibɨn
20
1 Igwu zan, sɛ no okpewa anang ga kɔ ɔtsɔm kwa atɨm kwu Ubɨnɔkpaabyi, avaar pa affɔnɛzza, akpewinyɨna tsɛ Mosis ɔttara atsonang pi ifon aba akwu akew-ɛ ma. 2 Aba aben-ɛ abɛ, “Bag ɛffa zɔ sɛ na atɨma assi idɨg nda? Anɛwɔ ɔnang-ɔ ɛffa nza?” 3 Jisɔs ɔpɔna abɛ, “Amma nɨngba nbɔw banga udɨg, ateg-m. 4 Assi-pyenga pɛ Jɔn, ibɨn kɛ ɛrang sa, ibɨn ka ayoganang?” 5 Aba attitso atɔnga abɛma oyen abɛ, “Odesɛ aben abɛ ibɨn ga kɛ erang, no oben abɛ bugudɨgwɔ kwa abanga nana atsera?” 6 Odesɛ amben mbɛ ibɨn ka ayoganang, anang mba ibɨng na tɔw mana ata ukwurabɛ anang mba ibɨng atser abɛ Jɔn ode otegɛkkawa kwu Ubɨnɔkpaabyi. 7 Aba apɔn-ɛ abɛ, “Amana ɔwang kansong kwi ibɨn ikwu.” 8 Jisɔs ɔpɔna abɛ, “Masa abanga na kana ka pɔna, amma tara banga mɨnteg ɛffa sɛ nnɨntɨma nssi idɨg nda.”Otse kwa anang pa ayam ɛdam tsɔ ɔnang
9 Jisɔs ɔtta bɛ otse abɛ, “Ɔnang wan ɔkpa ɛdam, ɔtaga tsɛ ɔnang anang abɛ aba ker tsɛ, ubɨna oto urɨg kɛ ekama ɔdwag ki itso rɛ kissawa. 10 Ibe ri idɔga ikwi iwem, ɔtɔm otserɔtɔm kwɛ abɛ ɔta ɔtɔ bɔw anang mbo abɛ aba anang-ɛ okew pfɛ pfi itɔga, anang pa ayam ɛdam nzo aba akpɨn-ɛ, aba akuw-ɛ mbɔg-mbɔg. 11 Ɔkɔrɔ ɔtɔm otserɔtɔm ɔdwagɔdwag; aba akara akpɨn-ɛ, aba reng-ɛ nkpar, aba akuw-ɛ mbɔg-mbɔg. 12 Ɔkɔrɔ ɔtɔm oyog kwɔ ɔgba anang attan, aba reng-ɛ nden, aba adɨr-ɛ awar ki iyan.
13 “Ɔnang kwɔ ɔkam ɛdam nzo okwo oben abɛ, ‘Mɨn nssi yan? Mɨn ntɔm unwa kwam kwɨ ntsog ettem, kwuna abɛ na nang-ɛ ikpɨkpowa.’
14 “Ibe rɛ abɛ kwa asɛ, aba ben abɛma oyen abɛ, ‘Ker ɔnang kwɛ mu utsi obo mama, kwu amana anfɛ, ɛdam nza nede tsa amana.’ 15 Aba adɨr-ɛ awar ki iyan tsɛ ɛdam nzo, aba affɛ.
“Oyen ɛdam nzo mu ussi bɛ yan? 16 Nu ukwu ɔkwɔ ɔfɔ anang pa ayam ɛdam nzo, ɔtaga tsɛ ɔnang anang ɔdwag.”
Okpe kwa anang mbo awang kwɛ aba ben abɛ, “Ubɨnɔkpabyi mo tsera.”
17 Jisɔs oker bɛ, okwo oben abɛ, “Akwɛ uyɨn yan kwa aba kɛr:
“ ‘Ɛta tsɔ ɔnang kwu unu uke itsɔm ufum-ufum atsɛma zɔ nede ɛta ɔkkatsɛ ibɨng.’
18 Ɔnang kwidede kwo otto ma kɛ ɛta nzo nɔ ɔzɔg ibɨng shuwan; odesɛ ɛta nzo etto ɛtɔw ɔnang ne ekog-ɛ ɔwag ububuma.”
19 Akpewinyɨna tsɛ Mosis ɔttara avaar pa affɔnɛzza, ayɔr otse kwɛ abɛ ma vag-ɛ muma zizan, ukwurabɛ ɔtta otse ngwo anang abɛma, udɨg kwan, aba araw anang pa anɨng muma.
Ɔtawa kwɔ ɔkara kwɛ abɛ na anang Siza
20 Aba dag-ɛ itsen ka areng, aba atɔm anang pa na ranga abɛ abɛma ade anang ɔkka fasɛ aba vag-ɛ ki itɔnga rɛ mɔ ɔtɔnga, atag-ɛ atsena avaarnang ɔttara ɔnang kwɔ ɔdaw ɔwang ngwo kɛ ɛffa tsa Rom. 21 Aba aben-ɛ abɛ, “Okpewnnwer, ansong ma abɛ ana atɔnga attara akpewa anang obengana, kana atɔnga ator ɔnang wan, ku udɨg ɔkka ana kpewa anang eden tsu Ubɨnɔkpaabyi. 22 Akwɛ otor ma abɛ amana anssi ɔtawa kwɔ ɔkara annang Siza, sa ananga anssi?” 23 Jisɔs osonga idongini ra abɛ, oben bɛ abɛ, 24 “Akɔg-m dinari nwo, ititiga ɔttara kɛ ɛkera tsa anɛ zɔ tsi inɨng muma?” Abɛma aben abɛ, “Pyɛ Siza.” 25 Jisɔs oben bɛ abɛ, “Nang Siza ɔtɔg fo ode pfɛ Siza, ammanga anang Ubɨnɔkpaabyi ɔtɔg pfo ode pfu Ubɨnɔkpaabyi.” 26 Abɛ kɛna ka apfuw ki idɨg rɔ ɔtɔng ma ki ititiga sa ayoganang; akwɛ ɔmanga ono okon bɛ ko otse kwɔ ɔpɔn bɛ, aba myi zɨm.
Ɛshɔwa ko obo ɔttara kɔ ɔbada
27 Ayog pa Sadusis pa aba aben abɛ ɛshɔwa ko obo kede, aba akwu kwa ase Jisɔs aba abɔw-ɛ. 28 Aba aben-ɛ abɛ, “Okpew nnwɛr, Mosis ɔker ɔnang mana abɛ odesɛ ɔnang oppe urɨg ukwa, uva no ofona, unwɔkka ɔtaga ukwa ɔba ofon uva ɔnang unwɔkka kwɛ kuppa. 29 Ɔkam uvɔkka asenaffa; otseden ɔtaga ukwanɨng, uva nofona pɛrɛ oppe. 30 Unwɔkka ɔdwag ɔtag-ɛ ɔba, 31 unwɔkka kwɔ ɔgba attan ɔtag-ɛ ɔba, tar uvɔkka mbo asenaffa ibɨng aba atag-ɛ, abɛ uva nafona. 32 Kwo okponginnam, ukwanɨng nwo okwo oppe. 33 Ukpur ko okpe kwa anang ma shɔwa ko obo, mo ode ukwanɨng kwa anɛ sa abɛma anang asenaffa ibɨng aba atag-ɛ kɔ ɔbada?”
34 Jisɔs oben bɛ abɛ, “Anang pa anɨng kɔ ɔyagbɨn nwama abɛ na aba ayog. 35 Anang pa aban abɛ aba ashɔwa ko obo, adwunɨng abɛ uppanɨng ma ataga, uppanɨng adɨm ma aba. 36 Abɛ dag ma appe adɛgɛ, abɛ ade masa atɔmɔtɔm pɛ erang ɔttara aba ade uva pu Ubɨnɔkpaabyi, masa aba ade uva pa shɔw ko obo. 37 Ko otse kwɛ ɛkpa atsɛ ɛkam, Mosis ɔkɔga sɔ ɔnang oppe nɔ shɔwa-ɔshɔwa ojer Ɔvaar kwi ididen abɛ ‘Ubɨnɔkpbyi kwe Ebraham, Ubɨnɔkpaabyi kwa Azik ɔttara Ubɨnɔkpaabyi kwu Jekɔb.’ 38 Ubɨnɔkpaabyi kwa anang pɛ kappa nuda, ode kwa anang pa anɨng ka akpen; ka kɛ ɔnang kwidede unɨng ka akpen.”
39 Akpewinyɨna tsɛ Mosis ban apɔna abɛ, “Okpewnnwɛr, ka pɔna obengana.” 40 Ɔnang ko ode kwɔ ɔkɔrɔ ɔbar ettem ɔbɔw-ɛ udɨg.
Krais ode unwa dwunɨng kwa anɛ?
41 Jisɔs oben bɛ abɛ, “Kayan wɔ kwa aba aben abɛ Krais unwa dwunɨng kwa Devid wɔ? 42 Sɛ Devid oyen oben ga ku nnwɛr kwɨ mmang abɛ,
“ ‘Ɔvaar oben Ɔvaar kwam abɛ,
“Nɨnga ɛyɛr ku udɨm bɔg kwam,
43 tar nssi ayogikwan pɔ
itsikɔw sɛma anana nfog.” ’
44 Devid ojer-ɛ Ɔvaar, ka bugeden zɔ node unwa dwunɨng kwɛ?”
Jisɔs ɔnang abuwinnam ikamana ɔbanga akpewinyɨna tsa Mosis
45 Sa anang mbo ibɨng na akɔm itɔng, oben abuwinnam abɛ, 46 “Avaga ɛkpakpa otena Akpewinyɨna tsɛ Mosis pɛ ɔnɔ ɔdag bɛ abɛ ake anɔma pyi idɨmudɨm asenga abawa, ɔnɔ dag bɛ abɛ anang atɨma ikpɨkpowa asɨma bɛ kɨnsha, aba anɨnga kɨ ntsi rɨn zuwuzuw ka adappa ɔttara ki iwang ra abɛ nassi elowa. 47 Aba ataga itsɔm ra apokwa kɛ ɛffa, abɛ aranga abɛ abɛma ade anang pa awur-uwur aba azɔm atɨm pa adɨm-udɨm. Abɛ na nang bɛ irem ridɨden.”