Judas otsera abɛ okkpe Jisɔs
22
1 Ibe rɛ anang pi Izɨrɛl na si Elowa tsɛ Brɛda kwa abɛ na ɔtɔg pfu unu uburubur na aka ke efora, elowa nzo aba agba ajer tse Ezega. 2 Avaar pa affɔnɛzza ɔttara ka akpewinyɨna tsɛ Mosis abɛ na aror eden sa abɛ ma afɔ Jisɔs, ozora ussi bɛ ukwurabɛ abɛ narora abɛ anang asonga. 3 Oshem ɔkwɔ ɔnwa Judas kwo okpen Iskarɔt, ɔtɔmɔtɔm wan kwi ikana zowaffa. 4 Judas ubɨn okewa avaar pa affɔnɛzza ɔttara atsonang pɛ na atɨg ɔtsɔm kwa atɨm ɔttara ɔtɔnga abubɛ otsekwɛ ɛma mɔ ɔtaga Jisɔs ɔnang bɛ aba afɔ. 5 Olew bɛ, aba atsera akpog pa abɛ ma anang-ɛ. 6 Ɛma otsera, oror ɛwang tsɛ ɛma mɔ ɔnang bɛ Jisɔs ki iduwa.Jisɔs utsi utsapfɛ ɔttara abuwinnam pɛ
7 Igwu tsɛ Elowa tsi Brɛd kwa abɛ na ɔtɔg pfu unu uburubur na aka ekwe ewem, ibe ra abɛ na afɔ ɔrɔmaan nwa kwe Ezega. 8 Jisɔs ɔtɔma Pitɛ ɔttara ka Jɔn abɛ, “Asɔng ata addo ɔwang kwa amana ma atsi Elowa tse Ezega.”
9 Abɛ abɔw-ɛ, “Maan wɔ kwa amana ma ta anddo kwɛ?” 10 Ɔpɔn bɛ, “Masa abanga ma anwa ko ofon, abanga na agba udwunɨng kwɔ ɔtɔg isɔga ra assi, abuw-ɛ innam tar anwa kɔ ɔtsɔm. 11 Ateg oyenɔtsɔm abɛ, ‘Okpewnnwer ɔbɔw abɛ: Iwur tsa akiken na anɨnga inɨng mann, amma nti ntsi Elowa tse Ezega abuwinnam pam abubɛ?’ 12 Ɛma nɔ kɔg banga iwur tsɛ ejeg-ojeg ga kɛ ɛnyɔng kɛ erang tsa abɛ ka adda ibɨng, abanga assi utsapfɛ muma.”
13 Aba abɨna ata ase ekpo byo ibɨng otse kwɛ Jisɔs oteg bɛ, aba assi Elowa tse Ezega atsog.
14 Ibe ri ibe arɛ iwem, Jisɔs ɔttara atɔmɔtɔm pɛ aba ata anɨnga abɛ atsi utsapfɛ. 15 Jisɔs oben abɛ, “Amma wɛrɛ nnang kɨ nror eden tsɛ mu ntsi Elowa tse Ezega abangama abubɛ pɛrɛ si ndɔw irem.” 16 Nteg banga abɛ, Elowa nza tse Ezega ndag mɨntsi pɛrɛ ntsi tsɛ kɛ Ɛvaar tsu Ubɨnɔkpaabyi.
17 Jisɔs ɔtaga nkɔw, usuma Ubɨnɔkpaabyi, oben abɛ, “Abanga ataga agwo arɨg ayog. 18 Nɨn mbembɛ nteg banga abɛ amma ndag atwug mɨngwo tarr Ɛvaar tsu Ubɨnɔkpaabyi ikwu.”
19 Ɔtaga brɛd, usuma Ubɨnɔkpaabyi, ɔkpara wɛ ɔtaga ɔnang bɛ, oben abɛ, “Mama wɔ ude ɛkpakpa tsam tsa aba anang banga, assi otse ngwa abanga atɨma azɨm-m.”
20 Ke eden nzo zan, sa abɛ ka brɛd nwo atsa, ɔtaga nkɔw kwa atwug, oben abɛ, “Nkɔw nwa wo ode nnwɔngɔ ɔwarɛ ki isɛ ram ra aba apyeng anang banga. 21 Ɔnang kwɛ no oben abɛ ɔtag-m ɔnang apyipyuwa anang unɨng mama unu utsi utsapfɛ ammabɛ. 22 Unwa kwu Udwunɨng noppe tsekwɛ Ubɨnɔkpaabyi ɔtɔng abɛ mo oppɛ, nupyuw ɔnang ɔnang kwɔ ɔtag-ɛ ɔnang bɛ.” 23 Aba atitso abɔw abɛma oyen, anɛwɔ kwɛ mu ussi udɨg ngwo otse ngwo.
24 Ɔmma kara uyin bɛ ɔbanga ɔnang kwɔ ɔbar ɔyɔnga ayog. 25 Jisɔs oteg bɛ abɛ, “Ɔvaar kwa anang pa ana Izɨrɛl na bɨna abɛ na atɨm bɛ kɛ ɛffa, ɔttara atsonang pa abɛ, abɛ ajer abɛma oyen ayogdikkow pa anang ibɨng. 26 Akwɛ otse ngwo mo ode abangama bɛ, akwɛ node abɛ, ɔnangttama node masɛ unwanwa, ɔttara ɔnang kwu utɨm ɔwang node masɛ otserɔtɔm. 27 Anɛwɔ ɔbar ɔyɔnga, ɔnang kwu unɨng ɛyɛr utsi utsapfɛ sa, ɔnang kwu otsen-ɛ utsapfɛ? Ɔnang kwu unɨng ɛyɛr utsi utsapfɛ sang sa? Amma mmanga inɨnga abangama abubɛ masɛ otserɔtɔm. 28 Abangama bɔ anɨng amabɛ ki irem ram. 29 Ka abanga ɛvaar nnanga otsekwɛ adere ɔnang-m. 30 Abanga na atsi attara agwo ko okpokoro kɛ Ɛvaar tsam, abanga na anɨng kɨ nvaar tsi, abanga aponga nffona zowaffa pi Izɨrɛl.
31 “Saimɔn, Saimɔn, oshem kɛ ɛffa ɔtaga abɛ oyom banga otsekwɛ abɛ na agɨma atsifog 32 Amma ka atɨm nzɔma nnang-ɔ, Saimɔn, fasɛ etsera tsɔ ɛnang etto, ibe rɛ ki innam ammanga, nang uvakka ɔkpakpa kpɔg.” 33 Pitɛ ɔpɔn-ɛ abɛ, “Ɔvaar amma kɛ ɛkpakpa nda tsi ngbakɔw ɔttara tso obo ɔmabɛ.”
34 Jisɔs oteg Pitɛ abɛ, “Nteg-ɔ, pɛrɛ ɛnɔndɨm ɛkɔra tsemma, ɔma na afɨm nden ntan abɛ kam ka asong.”
35 Jisɔs ɔbɔw bɛ abɛ, “Ibe rɛ ntɔm abanga ayɨn ki iyan ra abanga ana akpog, ɛkpa ɔttara ki ntwak na atɨma, ɔtɔg unɨng muma pfo owor banga?” Aba ɔpɔnɛ, “Ɔtɔg kode.”
36 Jisɔs oben bɛ, “Mazizan, ɔnang kwɔ ɔna ɛkpa nutɨma, utɨma, ɔttara kɛ ɛkpa sɛ ɛnya, odesa ana ogge nakama, kpe anɔma pyɔ adew wan. 37 Abɛ ka kɛra, ‘Aba awug ɛma ɔttara ga aluloma,’ ɔttara nteg banga idɨg nda arɛ niyɨn ɛnang-m. Otsekwa aba akkɛr ɔbanga ammabɛ, akwɛ ɔna mu uyɨn.”
38 Aba aben-ɛ abɛ, “Ker, Ɔvaar amana atɨm agge affa,” Ɛma oben bɛ abɛ, “ɔgba banga.”
Jisɔs ɔzɔm atɨm ko Okpetso kwo Olif
39 Jisɔs ubɨna opfona ga ko okpetso kwo okpen Okpetso kwo Olif, abuwinnam pɛ aba abuw-ɛ innam. 40 Sa aba awem kɔ ɔwang ngwo, oteg bɛ abɛ, “Azɔm atɨm fasɛ abanga ananga atto ke eyoma.” 41 Ubɨna urɨg bɛ ɛwang nwa kwɛ akkema awar ɛta ewem, utu ukpuga ndwudwɨng ɔzɔm atɨm. 42 Oben abɛ, “Adere, odesɛ ɔma ka atsera, taga nkɔw nwa arɨg-m, tsekwɛ amma ntser sang, tse kwɔ ɔma atser, akwɛ ode otse ngwo.” 43 Ɔtɔmɔtɔm kwu Ubɨnɔkpaabyi ubɨna ga kɛ ɛrang ɔkwɔ owem, ɔnang-ɛ akpɔgidi. 44 Ukwur irem, ɔzɔm atɨm mbo aba anwɛ, irɨg tsi iyɨn-ɛ ede dambɛ isɛ dɔ ni pyenga ki iseg.
45 Ibe ru ubɨn ka atɨm mbo, ɔmanga innam oto okewa abuwinnam pɛ kɔ ɔda, ka bɔ ɔkɔna sa aba anɨng ikwosi. 46 Jisɔs ɔbɔw bɛ, “Bugudɨg gwɔ kwa abanga na atawa? Ashɔwa azɔm atɨm fasɛ abanga ananga atto ke eyoma.”
Aba pfuw Jisɔs
47 Masɛ Jisɔs nɔ tɔnga muma, anang pa sawɔsaw aba akwu, Judas, ɔnang wan kwɔ ɔttar abuwinnam zowanffa pɛ Jisɔs, ɛma wɔ oye bɛ eden, ɛma okewa Jisɔs abɛ ɔttag-ɛb. 48 Jisɔs ɔbɔw-ɛ abɛ, “Ɔma ma ataga Unwa kwu Udwunɨng anang ɔyaw kɛ ɛttaga?”
49 Ibe rɛ abuwinnam pa Jisɔs ase udɨg kwa kwɛ no oben abɛ uyɨn, aba abɔw, “Ɔvaar amana ampeg bɛ agge pya amana sa?” 50 Oyog wan oppeg otserɔtɔm kwɔ ɔffɔnɛzza kwi ititam, ɔkpar-ɛ itɔngkpa ru udɨmbɔg.
51 Jisɔs oben bɛ, “Kɔ ɔgba,” ɔwak ɔdan-ɛ ma ki itɔng, arɛ igweng.
52 Muma wɔ Jisɔs oben avaar pa affɔnɛzza, atsonang pɛ na atɨg ɔtsɔm kwa atɨm kwu Ubɨnɔkpaabyi, ɔttara ka atsonang pa aba akwu aba kwa apfuw-ɛ, “Amma nde ururuwa sa, kwa abanga atɨm agge ɔttara ki itsi ra abanga ma apfuw-m? 53 Amma nnɨng abangama abubɛ ngwu ridede kɔ ɔtsɔm kwa atɨm kwu Ubɨnɔkpaabyi, abanga ɔbɔg kana dana, mama wɔ ode ibe ra abanga ru ugwutwar nussi ɔtɔm.”
Pitɛ okona Jisɔs
54 Aba daw-ɛ, atɨm-ɛ abɛ apfona kɔ ɔtsɔm kwɔ ɔffɔnɛzza kwi ititam, Pitɛ obe eden iwur ubuw-ɛ innam. 55 Ibe ra aba akwa amuma ekpon ke etersha tem, abɛma anɨnga ɛyɛr na wɔwa, Pitɛ ɔkwɔ ɔttar bɛ ɔwɔwa ekpon. 56 Unwa kwanɨng wan kwo ode otserɔtɔm ose Pitɛ sɛ nɔ ɔwɔwa ekpon, oker-ɛ tɨnɨm, oben abɛ, “Udwunɨng nwa ɔgbɔ ɔtwan Jisɔs bɛ.”
57 Pitɛ okona abɛ, “Ukwanɨng, amma kɛ kɨnsong.”
58 Ki ibe kɨma nwa, ɔnang ɔdwag-ɔdwag use-ɛ, oben-ɛ abɛ, “Ɔma agba attara.” Pitɛ oben-ɛ, “Udwunɨng, amma sang.” 59 Ibe ɔdwag-ɔdwag, ɔnang wan ɔvaga ma kɔ ɔtɔnga ngwo, “Ɔnang nwa ku udɨg ɔkka, ɔgba ɔttar-ɛ ukwurabɛ abɨn ga Galili.”
60 Pitɛ ɔpɔn-ɛ, “Udwunɨng, udig kɨnsong kwɛ na atɔnga,” ki ibe ndo, ɛnɔndɨm ɛkɔra. 61 Ɔvaar Jisɔs ɔwak ɔker Pitɛ tɨnɨm, Pitɛ uzɨma ɔtɔnga kwɔ Ɔvaar ɔtɔng abɛ, “Pɛrɛ ɛnɔndɨm ɛkɔra tsemma, ɔma na afɨm amma nden nttan.” 62 Pitɛ uyɨn ki iyan ɔgama pyuwa-pyuwa.
Anang amma Jisɔs ara
63 Adwunɨng pa ana akker Jisɔs abɛ atɔnga, aba ammɛ arra, aba akpɨn-ɛ. 64 Aba akpɛ ivara kpa ka atsen aba aben-ɛ abɛ, “Teg mana ɔnang kwu ukpɨn-ɔ.” 65 Aba atɔnga irag dɨg ɔdwag-ɔdwag risawɔsaw anang-ɛ.
Jisɔs obe ko oro pfɛ Pailet ɔttara ka Hɛrɔd
66 Si igwu atsɛ etsow, atsonang pa Izɨrɛl pa ade avaar pa affɔnɛzza ɔttara akpewinyɨna tsɛ Mosis aba agba. Aba atɨma Jisɔs atsen bɛ. 67 Aba aben abɛ, “Odesa ɔma ade Krais, teg mana.”
Jisɔs ɔpɔn bɛ abɛ, “Odesɛ nteg banga, abanga matsera anang-m, 68 ɔttara odesɛ mbɔw banga, abanga makke apɔna. 69 So otto mazizan Unwa kwu Udwunɨng nu unɨng ɛyɛr ku udɨm bɔg kwu Ubɨnɔkpaabyi kwɔ ɔyɔng ɛffa.” 70 Abɛma ibɨng aba aben, “Ɔma wɔ nade Unwa dwunɨng kwu Ubɨnɔkpaabyi sa?” Ɛma ɔpɔn bɛ, “Abangama oyen ba atɔng.” 71 Aba aben abɛ, “Amana na anror baga attɛnsɛ ɔdwag, abba ibɨng ka awanga kakɛ kɛ ɛmma.”