Waliɲa masara koe
4
Ala la mɔgɔ masubɛreŋɛ bali bangue ka ɲagankata sɔtɔ, awa wole tugun ni wo tɛ takiti a la, wo hakkile dɔndɛ ni to wo ye, a fɔ koe la ka dɛnkɛnɛyabaga min bale be ɲagankatala, wo tigi bata junubu koe to ɲɔ. 2 Wo butɔ, a bata dunuya diyanankoe to, a ni sɔ Ala sagona koe kɔma a la simaya butɔ min be toren a ye. 3 Wo ⸂mɔ⸃ be wagate min maren Ala lɔnbalenu la diyanankoe kɔma, wo ɲan bata kun. Wo bata mɛ jalonya mala wagati tanbireŋɛ tɔ, hanige koronya, siisi koe, muradi koroŋɛ, beeri min tolon koroŋɛ, anun kuye batu koe, min be maren ko kɔndeŋɛ la. 4 Wo to bele dunuya mɔgɛnu jokkila wo dunuyanteya danbale la bitugun, wo bata ma anu ye tɛrɛnna la. Wo butɔ, anu be wo tɔgɔtiɲala, 5 kɔnɔ anu si naa dantɛgɛ sa le Kiiti salá ye min bata wuli mɔgɔ balureŋɛ nun mɔgɔ fagareŋɛ makiiti koe la. 6 Wolo mu, Ala la kibaru ɲinma fɔta nun mɔgɛnu tugun ye minnu bata ma fagabaganu la kɔtɛ. Wolo si a ma, anu nɛɛ si kisi iko Ala to be baluren abada, hali a to be lagiriren anu ye anu bale ni faga iko adamadeŋɛ bɛ.Diinalanu la bɛnɲɔgɔya kafue butɔ
7 Dunuya la baŋɛ bata sutuya. Wo ni wo hakkile lakara, wo ni wo hakkile to wo yɛtɛ ma, alako wo ni nɔ Ala mataranna. 8 Wo bɛ butɔ, wo ni ɲɔgɔn kanu wo juse bɛ la, bayi kanunteya si ma diɲa sabue la tiɲare siyama ma.a 9 Wo ni ɲɔgɔn nasɛnɛ jusu ɲinmaya la, wo kana a ma kuma mɛsɛŋɛ la. 10 Ala ka hinnɛnteya dii wo dɔndɔ dɔndɔ bɛ ma, awa wole tugun ni ɲɔgɔn dɛman. Wo butɔ, wo ni ma Ala la walilá ɲinma la, minnu be a la hinnɛ tafatanna, min sige siyata. 11 Ka mɔgɛ be diren kuma do fɔla, a ni Ala la kuma le fɔ. Ka mɔgɛ be diren dɛmare mala, a ni wo ma Ala sɛnbɛ le la, alako Ala ni mamatɔgɛ sɔtɔ koe bɛ tɔ a la mɔgɔ masubɛreŋɛ Isa sabu la. ⸂Mamatɔgɛ nun⸃ sɛnbɛ be a ye abada. A be ɲɔgɔnna le yati!
Isayankanu la tɔɔrɛ la ko
12 N kanunteŋɛnu, wo be ɲagankata bɛlɛŋɛ min yenna, wo kana wo tɛrɛnna. Ko nama ma a la. 13 Tɔɔrɔ koe Ala la mɔgɔ masubɛreŋɛ fɛ, wo ni ma sɛɛwa le la wo ye. Wo butɔ, wo mɛn si ɲagalin a banba la a la nɔɔra yita luŋɛ. 14 Ka anu ka wo nani Ala la mɔgɔ masubɛreŋɛ tɔgɛ la ko la, hɛra le mu wo la wo ye, bayi Ala Hakkili nɔɔrareŋɛ be wo ma. ⸂Anu be a tɔgɔtiɲala, kɔnɔ wole kan be a tantula.⸃ 15 Mɔgɔ yo kana to wo tɛma, a ni ɲagankata sɔtɔ nɛɛ bɔɔ koe la, kankaya ma koe, ko koroŋɛ ma koe, ka wo ma nafigiya ma. 16 Kɔnɔ ka wo ka ɲagankata sɔtɔ bayi Isayanka dɛnkɛnɛyabaganu le mu wo la, wo kana wo malu. Wo ni Ala tantu wo la wo «Isayanka» tɔgɛ sabu la. 17 Kiiti wagate bata fɔlɔ kela, Ala ni a fɔlɔ a la jama le ma. Adun, ka a fɔlɔta wo mɔle ma, a be nala labanna kama le mɔgɛnu ma minnu bele dɛnkɛnɛyaren Ala la kibaru ɲinma ma? 18 Bayi, kitabue tugun ko:
«Ka telenbaganu kisi koe bɛlɛyata,
Ala lɔnbalenu nun junubutɔɛnu kan be tola kama le?» b
19 Wo butɔ, ka Ala sagoe le mu mɔgɛnu ni ɲagankata, awa wo tiginu bɛnta anu ni anu yɛtɛ la ko bɛ to anu da mansa ma, min na lannanteya te tiɲa, anu ni to ko ɲinma mala.