Muse nun kaye la ɲɔgɔn bita ɲa
3
Wole musenu, wole tugun ni wo majigi wo la kayenu ye, alako wo la kayenu minnu bele dɛnkɛnɛyaren Marige la kuma ma, wonu tugun ni naa ma dɛnkɛnɛyabaga la wole musenu tagamanɲa sabu la, hali wo ma kuma yo fɔ anu ye, 2 anu ni wo la malasaniyaŋɛ nun ɲalakilaŋɛ tun de yen. 3 Musenu, wo la mamajaboe kana fatan wo la mamakite kɛɲa ma, iko kun dare, sanu tololadeŋɛ, sanu kɔniŋɛ, ka wo ma kuta majabureŋɛnu. 4 Musenu, wo la ɲiɲa ni ma jusu ɲinmaya, jusu sɛɛya nun sabare le la. Ɲiɲa le wo la min te tiɲa. Wolo sɔdula kolo Ala ye. 5 Fɔlɛ tɔ musu saniyandeŋɛnu ka anu yɛtɛ majabu ɲɔgɔnna le. Anu be anu hakkile toren Ala ma, anu be anu yɛtɛ majigila anu la kayenu ye, 6 iko Sara ka a ma ki min na: a ka a la kaye Iburahima biliya, a be a fɔla le a ma: «N tige». Awa kɔtɛ, wole tugun bata ma a la den musereŋɛnu la, ka wo tota ko ɲinma mala, wo mɛn bele sɔnna kilan yo ni wo hakkile ɲatadon.7 Wole kayenu tugun, wo ni wo la musenu bita bita ɲa ɲinma le la. Wo ni a fahamu, muse sɛnbɛ ma kolo iko kaye tɛŋɛ. Kaye ni muse biliya, bayi, wo bɛ le be kɛɛ dɔndɔ jiganna, min be maren kise la, Ala be min diila a la fonisireya butɔ. Wo ni wo la musenu biliya, alako wo kana kɔrɔrɔ Ala mataraŋɛ butɔ.
Bɛnɲɔgɔya la ko
8 Wo bɛ butɔ, wo ni bɛn ɲɔgɔn ma, hanige dɔndɔ ni to wo tɛma, anun nɛɛnɛdɔndɔya kanunteya. Wo ni kinikini ɲɔgɔn ma. Wo mɛn ni wo yɛtɛ majigi ɲɔgɔn ye. 9 Wo kana wali koroŋɛ ɲɔgɔ wali koroŋɛ la. Wo kana nanire ɲɔgɔ nanire la. Kɔnɔ, wo ɲan bɛnta le wo ni a ma duba la. ⸂Wo ni a lɔn⸃ wo be keleren wolo la, alako wo ni duba sɔtɔ kɛɛ la. 10 Kitabue ko:
«Min be diren simaya diyama ye,
anun sɛɛwa ɲinma be min tɔ,
wo tigi ni mɛnni a da ma, a kana kuma koron fɔ,
janfa kuma kana bɔɔ a da tɔ.
11 A ni bɔɔ ko koroŋɛ kɔma,
a ni ko ɲinma le ma,
a ni jususa ɲini, a ni sɔ wolo kɔma.
12 Bayi Marige ɲa be sɔren telenbaganu le la,
a tole be sɔren anu la Ala mataraŋɛ la.
Kɔnɔ ko koron malanu kan, a te a ɲa ɲinma sɔ anu la, fɔ a ni anu kɛlɛ.»a
Marige la wale anun dɛnkɛnɛyabaganu la biliya sa koe a ma
13 Ka wo katata ko ɲinma le ma koe la, wo juse bɛ labɛndeŋɛ la, hali ko koron malá dɔndɔ si nɔ wo tɔɔrɔla ba? 14 Hali mɔgɛnu tagata wo tɔɔrɔ wo la teleŋɛ la ko sabu la, wolo si ma wo ye hɛra la. Wo kana kilan anu la, wo juse kana bɔɔ. 15 Kɔnɔ wo ni wo Marige Ala la mɔgɔ masubɛreŋɛ biliya wo juse tɔ. Wo ni wo tabɛn tɛmuɛ bɛ alako mɔgɛnu tini wo maɲininka wo yili be sɔren fen min na, wo ni nɔ a ɲatabɔla anu ye. 16 Wo ni wo kuma fɔ jusu sɛɛya la anun biliya butɔ. Wo ni wo ma jusu beeya la, alako wo jaguenu minnu be wo makumala anu ni wo tɔɲɛgɛ wo tagamanɲa la Ala la mɔgɔ masubɛreŋɛ ye, wonu ni to maluya tɔ. 17 Ka Ala ka a lagiri, i ni tɔɔrɔ ko ɲinma sabu la, wolo fisa i la tɔɔrɔ la ko koroŋɛ sabu la.
18 Ala la mɔgɔ masubɛreŋɛ tugun tɔɔrɔta le dɔndɛ la junubenu la ko la. Ale min mu telenbaga la, a ka wo ma telenbalenu le ye. A ka wo ma le alako a ni wo madon Ala la. Anu ka a bale faga, kɔnɔ Ala Hakkile ka a nɛɛ lasaagi a ma. 19 A tagata wo Ala Hakkile barikɛ tɔ a la kunnawuli kuma fɔdula mɔgɛnu ye minnu be geele tɔ, 20 minnu bata balan nun Ala kulɛ lakamalila. Ala ka anu kɔnɔn nun Annabi Nuha be kuluŋɛ banbanna wagate min tɔ, mɔgɔ sagin pɛti le naata kisi kuluŋɛ butɔ je kunma. 21 Wo koe bata ma misale la dɛnkɛnɛyabaganu la malasuwɛ koe la je tɔ. Wo malasuwɛ koe butɔ, wo mɔ be malakise sɔtɔla kɛ wagate, Ala la mɔgɔ masubɛreŋɛ Isa la malawule le sabu la. Dɛnkɛnɛyabaganu la malasuwɛ te nɔgɛ bɔɔ anu bale ma, kɔnɔ ka min be lasuwɛla je tɔ, wo tigi be Ala mataranna a juse le ni beeya a ye. 22 Isa bata yɛlɛ Ala bolo ɲinma tɔ arijanna. Malekanu, kuntigenu, anun sɛnbɛmanu, anu bɛ be a la yamɔre kɔtɔ.