Jama saniyandeŋɛ
2
Wo butɔ, wo ni ko koroŋɛ mɔɔle bɛ boloka. A mata foniya la ba, filankafuya, miilanteya, anun mɔgɔ tɔgɔtiɲa mɔɔle bɛ, wo ni a bɛ boloka. 2 Ala la kuma ni diya wo ye iko bɔɔbɔ nɛnbɛlɛŋɛ be diren a nɛɛnɛ singi je ye ki min na. Ala la kuma be toren de iko singi je beeyareŋɛ. Ka wolo mata wo ye balue la, wo la koloya si sabati le. 3 Wo to be Ala la kuma mɔɛren wo la, wo ɲan bata Marige la hinnɛ do nɛmunɛmu.a4 Wo be wo madonna Marige Isa la min be misaliren kure la min be baluren. Mɔgɛnu ka a aɲɛ le, kɔnɔ Ala kan be ale le masubɛren, a sɔdula kolo Ala ɲakɔtɔ. 5 Wo be wo madonna a la, wo butɔ wole tugun be mala kurenu le la minnu be baluren, kurenu minnu be sɔla Ala la nɔɔra boŋɛ la. Wo mɛn be mala le sarika lakelá jama saniyandeŋɛ la, wo ni wo yɛtɛ bɔɔ sarika la Ala ye, Ala batue sarika min di a ye a la mɔgɔ masubɛreŋɛ Isa sabu la. 6 Wo butɔ, kɛ-lɛ be sɛbɛren kitabue tɔ:
«N bata kure do masubɛ, min sɔdula kolo.
N be a sigila Siyɔn de,
a ni ma tunku tɔ kure la.
Min tini dɛnkɛnɛya a ma, wo tigi te naa malu.»b
7 Kɛ kure sɔdula kolo wole dɛnkɛnɛyabaganu ye. Kɔnɔ kitabu dula do be a fɔren dɛnkɛnɛyabalenu ye, a ko:
«Bon sɔlanu ka kure min aɲɛ,
wolo be maren boŋɛ fondoma sigi kure la.»c
8 A mɛn be fɔren:
«Kure le mu mɔgɛnu si anu kɛn natugu min na,
kure le mu min si mɔgɛnu laboe.»d
Anu to bele sɔnna Ala la kuma bitala, wolo mu anu si boe. Ala bata wo lagiri anu ye. 9 Kɔnɔ Ala bata wole kan ma bɔnsɔ masubɛreŋɛ la, a ka wo ma mansa la sarika lakela jama la. Wo be maren jama saniyandeŋɛ le la, a ka wo ma a tɛŋɛ yati la. A ka wo kele, a ka wo labɔɔ dibe tɔ, wo ni to a la nɔɔra malanná butɔ. A ka wo bɛ ma le alako wo ni a la wali makaabɛreŋɛnu la ko fɔ. 10 Fɔlɛ tɔ nun, wo bele maren Ala la jama la nun, kɔnɔ kɔtɛ wo bata ma Ala la jama la. Fɔlɛ tɔ nun, kinikini yo bele wo ye nun, kɔnɔ kɔtɛ Ala la kinikinɛ bata kamali wo ye.
Dɛnkɛnɛyabaganu tagamanɲa
11 N kanunteŋɛnu, wo be maren luntaŋɛnu la minnu be yigiyaren kɛ dunuya bangu munge kunma. Wo butɔ, n be wo madiyala le, wo ni wo yɛtɛ latanga dunuya diyanankoe koroŋɛnu ma, bayi anu be wo kɛlɛla Ala la kila kunma. 12 Wo la tagamanɲa ni bɛn a ɲinma la dunuya mɔgɛnu tɛma. Wo butɔ, hali anu ka wo tɔɲɛgɛ le wali koroŋɛ ma koe la, anu ni wo la wali ɲinma le tun yen, anu le tugun si naa Ala biliya le dantɛgɛ sa luŋɛ.
Sɔn koe kuntigenu ma
13 Awa, kuntige minnu bɛ be mɔgɛnu tɛma, wo ni wo yɛtɛ majigi anu ye wo Marige la ko sabu la. Yamɔre be donden ande le bolo, a mata mansa banba la ba, mɔgɛ min na mansaya sɛnbɛ kolo mansa bɛ ko, 14 a mata gominɛnu la ba mansa banba be minnu sɔren, anu ni mɔgɛnu makiiti minnu be ko koroŋɛ mala, anu mɛn ni mɔgɛnu tugun matɔgɔ minnu be ko ɲinma mala. 15 Ala be diren a ye ɲɔgɔnna le yati: wo la ko ɲinma ma koe si hakkilibɔnɛnu da balan anu la hakkilibɔnɔya tɔ. 16 Wo ni tagaman de iko mɔgɛnu minnu bata hɔrɔya sɔtɔ, kɔnɔ wo hɔrɔya kana a ma de wo ni to ko koroŋɛ tɔ, fɔ wo ni ma Ala la jondeŋɛ la. 17 Wo ni mɔgɛ bɛ biliya, wo ni wo nɛɛnɛdɔndɛnu kanu. Wo ni kilan Ala la. Wo ni mansa banba biliya.
Isa la tɔɔrɛ misale
18 Joŋɛnu, wo ni wo yɛtɛ majigi wo marigenu ye. Wo ni anu biliya koe bɛ tɔ: marige minnu kaɲin, anu hinnɛta, kɔnɔ hali marige minnu tugun na ko mabɛlɛ. 19 Bayi, ka wo bata sɔn Ala la ko ma, ka wo tagata tɔɔrɛ lamuɲu, ko ɲinma le mu wo la. Wo butɔ, wo be tɔɔrɔren hali wo bele koko tiɲaren. 20 Kɔnɔ ka a taranta wo ka ko koroŋɛ ma, anu nata wo ɲagankata, ka wo tagata wo lamuɲu, wo munanfaŋɛ yo bele wo ye. Kɔnɔ ka wo ka ko ɲinma kan ma, wo nata tɔɔrɔ, ka wo tagata a lamuɲu, wolo mu ko ɲinma banba la Ala ɲala. 21 Wo be keleren wolo la, bayi Ala la mɔgɔ masubɛreŋɛ tugun tɔɔrɔta le wo mɔ ye. A ka misale to wo ye, alako wo ni a ladegen.
22 «A ma junubu ma,
a ma janfanteya kuma fɔ.»e
23 Anu to ka a nani, a ma a tɛŋɛ ɲɔgɔ. Anu to ka a tɔɔrɔ, a ma kɔnkɔre kuma fɔ. A ka a la ko kiite bɛ don Kiiti salá telendeŋɛ le bolo. 24 Isa yɛtɛ ka wo mɔ la junubenu doni a bali bangue tɔ, a banbanta lɔgɔ bangalandeŋɛ tɔ. Junube be toren nun mɔ ye iko mɔ tige. Isa la faga sabue ka ma, a banta mɔ nun junube tɛma feu, alako wo mɔ ni to teleŋɛ tɔ kɔtɛ. Wo bata kendeya sɔtɔ a la mamabanu sabu la.f 25 Wo be toren de nun iko kolofen nabolokareŋɛnug, kɔnɔ kɔtɛ, wo bata saagi wo kantalá ma, min be a hakkile toren wo nɛɛ ma.