Isa la kiilá Piyɛri ka kitabu fɔlɛ min sɛbɛ
Kɔntɔre
1
Bataakɛ le mu ka, a be fatanden nde Piyɛri le la, Ala la mɔgɔ masubɛreŋɛ Isa la kiilá. N bata wo kɔntɔn, wole dɛnkɛnɛyabaga masubɛreŋɛnu minnu be malansanden luntanya la kɛ jamanɛnu butɔ: Pɔntu duge, anun Galati, Kapadosi, Asi nun Bitini. 2 Baaba Ala ɲan to be koe bɛ lɔnden de yannun a ni ma, wolo mu a ka wo masubɛ, a Hakkile saniyandeŋɛ bata wo kɛrɛkɛrɛ, alako wo ni Ala la mɔgɔ masubɛreŋɛ Isa kulɛ labatu, wo ni saniyan a la base punpundeŋɛ sabu la. Ala mu hinnɛ nun jususa lakoloyala wo ye.Abada kise
3 Tantue be Ala ye, wo mɔ Marige Isa Ala la mɔgɔ masubɛreŋɛ Baaba Ala. A bata kinikini wo mɔ ma koola, han a ka a ma wo mɔ ni tasɔtɔ a nama la Isa la malawule sabu la. A to ka Isa lawuli faga ma, wolo ka a ma yige be wo mɔ ma, yige min te ban. 4 A ka a ma wo mɔ ni tasɔtɔ a nama la, alako wo mɔ ni kɛɛ saniyandeŋɛ sɔtɔ min te ban, a te tiɲa. Wo kɛɛ le be mandiren wo ye arijanna butɔ. 5 Ala si wo makanta le a sɛnbɛ la wo la dɛnkɛnɛya sabue la, han wo ni naa kise sɔtɔ, a bata wuli abada kise min nabɔɔla wo ma wagati tɔɛ la. 6 Wo butɔ, wo ni sɛɛwa, hali a be lagiriren wo ye tɔɔrɛ mɔɔle bɛ ni wo juse makasa kɛ wagatindeŋɛ kɔtɔ. 7 Wo ko bɛlɛŋɛnu si a ma le a ni lɔn ma, wo la dɛnkɛnɛya bata sabati a ɲinma la. A be mulunden sanuɛ le la min be sala ta tɔ a boee ni bɔɔ. Hali sanuɛ si tiɲa le, kɔnɔ wo la dɛnkɛnɛya kan sɔdula kolo wo ko. Isa Ala la mɔgɔ masubɛreŋɛ tini a yɛtɛ labɔɔ lun min na, wo si mamatɔgɛ, kunnawule nun biliya sɔtɔ wo tuma. 8 Wo bata Isa kanu hali wo to ma a yen; hali wo to bele a yenden tugun, wo be laala le a la, han ka sɛɛwa. Sɛɛwa belebele le mu, a ɲan te fɔ. 9 Wo be dɛnkɛnɛya tɔnɛ sɔtɔla sɛɛwa butɔ, dɛnkɛnɛya tɔnɛ min be tabɛnden kise ma.
Nabiyonmɛnu la kuma
10 Nabiyonmɛnu yati ka nabiyonmɛ kuma fɔ nun wo kɔɔre la ko tɔ, Ala be min diiren wo ma. Anu be katala nun, anu be durukɔtɔla a ɲinma la anu ni lɔn sɔtɔ wo kise la ko ma. 11 Ala Hakkili saniyandeŋɛ ka Ala la mɔgɔ masubɛreŋɛ la tɔɔrɛ yita anu la, anun a be nala kunnawule min sɔtɔla wo tanbi kɔma. Nabiyonmɛnu ka tefira ma anu ni wo koenu na wagate lɔn, anun anu na kɛɲa. 12 Ala ka a yita anu la, aa anu bele wo kiilanu fɔla anu la wo wagate mɔgɛnu le dɛman koe la. Wole le la ko be a maren anu be wo kiilanu fɔren. Wo tanbi kɔma, mɔgɔ do gbɛtɛnu nata wo kibaru ɲinma fɔ wo ye kɔtɛ Ala Hakkili saniyandeŋɛ sabu la, min be bɔɔren saŋɛ tɔ. Hali malekanu yati le be diren wo kuma kɔtɔ lɔnna.
Dɛnkɛnɛyabaganu la saniyaŋɛ
13 Wolo mu, fɔ wo ni wo tabɛn, wo ni wo hakkile to koe ma wo be nala min mala: wo ni wo hakkile to wo yɛtɛ ma, wo ni wo yili bɛ sɔ Ala la kɔɔre ma, a be min diila wo ma Ala la mɔgɔ masubɛreŋɛ Isa na luŋɛ. 14 Wo ni to iko deŋɛ min be tola a baaba sagoe tɔ. Wo butɔ, wo kana sɔ wo hanige koroŋɛnu kɔma iko wo be a mala ki min na nun yannun wo be Isa lɔnna wagate min tɔ nun. 15 Wo ni saniyan wo la tagamanɲa bɛ tɔ, iko Ala min be wo keleren, a be saniyanden ki min na. 16 Bayi a be sɛbɛren kitabue tɔ: «Wo ni saniyan, bayi nde be saniyanden.»a 17 Wo be Ala mataranna, wo be a fɔla a ma «Baaba», Ala min be mɔgɛ bɛ makiitila a la wale ma, a te do lafisaya do ko. Wo butɔ, wo be wagatindeŋɛ min mala luntanya la kɛ dunuya bangu munge kunma, wo wagatindeŋɛ butɔ wo ni to tagamanna Ala ɲalakilaŋɛ le la. 18 Wo ka a lɔn, wo to be kunkaren wo la fufafu walenu le la wo benbanu ka wo madegen min na, wo bele kunkaren ko le sabu la min si tiɲa, iko sanuɛ ka wo ma kaalise. 19 Wo be kunkaren Ala la mɔgɔ masubɛreŋɛ base le sabu la, min sɔdula kolo. A be a yɛtɛ base bɔɔren sarika la, a base be tola iko saaka ɲinma tɛŋɛ kɔnɔ yo bele min na. 20 Ala bata a masubɛ yannun dunuya ni da, kɔnɔ a ka a yita dunuya kɛ wagati tɔɛ mɔgɛnu le la, a ni wole le munanfan. 21 Wo dɛnkɛnɛyata Ala ma ale le sabu la, Ala ka min nawuli faga ma, a ka kunnawule dii a ma. Wo butɔ, wo ni laa Ala la, wo ni wo hakkile sɔ a ma.
22 Wo bata tɔɲa jokki, wo bata saniyan, alako kanunteya beeyareŋɛ ni to wo juse tɔ wo nɛɛnɛdɔndɔ diinalanu la ko la. Awa, wo ni ɲɔgɔn kanu le yati wo juse bɛ la. 23 Wo ni wo ma bayi wo bata tasɔtɔ a nama la Ala la kuma balureŋɛ sabu la. Wo kuma be misaliren sugu kole le la min te tiɲa. Sugu kole doenu si sa duge tɔ, anu ni ban ɲɔ. Kɔnɔ Ala la kuma kan te ban feu, a si to ɲɔ ⸂abada⸃. 24 Bayi a be sɛbɛren kitabue tɔ:
«Adamadeŋɛ bɛ be misaliren kifeŋɛ le la.
⸂Mɔgɛ⸃ la nɔɔra be toren de iko kifeŋɛ feere.
Kifeŋɛ si fasaya le, a feere ni boe.
25 Kɔnɔ Marige la kuma kan be mɛla le abada.»b
Awa, kɛ kuma be tabɛnden kibaru ɲinma le ma min bata fɔ wo ye.