Bannanu lasii koe
5
Kɔtɛ, wo wo tolomasɔ, wole bannanu. Wo ni di, wo ni belebele, bayi gbalue le be nala wo ma!
2 Wo la bannaya be tiɲala. Kisenu bata wo la kutanu dɔmɔ.
3 Wo la sanuɛ nun kaalise bata korikori. Wo be mala seede le la wo ye, ka a fɔla ka halage tagata wo bale tugun bita, a si wo bale bintan iko ta. Wo bata harige madɛn kɛ wagate, kɔnɔ wagati tɔɛ le mu.
4 Wo wo tolomasɔ, wole minnu be balanden wo la sɛnɛ tɛgɛlanu sɔŋɛ diila. Wo wali sɔŋɛ kulɛ be bɔɔla, wo la walilanu diri kulɛ tugun bata ke Marige Ala tole ma, dunuya bɛ da mansa.a
5 Wo la dunuya takunte butɔ, wo be wo diyanankoenu tun de tɔ. Wo be wo yɛtɛ le tun nafala iko kolofen kɛndeŋɛnu min kannatɛgɛ luŋɛ bata ke.
6 Telenbaganu minnu ɲan bele sɔren nun wo jusukuŋɛ tɔ, wole le ka anu tɔɲɛgɛ, han kiiti koroŋɛ bata sa anu ma, anu ni faga.
Dɛnkɛnɛyabaganu la timiladiya
7 Awa, n nɛɛnɛdɔndɛnu, wo ni diɲa han Marige Isa be tasaagila nala lun min na. Wo ni diɲa iko sɛnɛ salá be diɲala ki min na. Sangi kun fɔlɛ ni na, a ni duge laɲigin, a ni to nala han sangi tɔɛ, kifeŋɛnu ni wolo han anu ni ke a si tɔnɛ sɔtɔ anu tɔ ki min na. Wo bɛ sɛnɛ salá be diɲaren.
8 Wole tugun ni diɲa, wo ni sɛnbɛ don, bayi Marige na luŋɛ bata sutuya.
9 N nɛɛnɛdɔndɛnu, wo kana wo madi wo kafuɲɔgɛ la ko la, ka wo ma kiite tini sa, a te diya wo la. Wo ni a lɔn, a banba bele toren Kiiti salá ni na.
10 N nɛɛnɛdɔndɛnu, wo ni wo hakkile to nabiyonmɛnu ma minnu ka kawande ma Marige tɔgɛ la. Wo ni anu jigan misale la, anu to diɲata, anu timiladiyata tɔɔrɛ butɔ.
11 Wo mɔ ka a lɔn hɛra be mɔgɛ ye min be a timiladiyala tɔɔrɛ butɔ. Wo bata a mɔɛ Ayuba ka a timiladiya ki min na. Wo mɛn bata a yen Marige ka min nagiri a ye a la tɔɔrɛ tanbi kɔma. Marige la hinnɛnteya anun a la kinikinɛ kolo.
Wo la kuma ni ma tɔɲa la
12 Awa, n nɛɛnɛdɔndɛnu, n be min mabanbanna wo ye koola, wo ɲan kana wo kali saŋɛ la, wo kana wo kali duge la, wo kana wo kali fenfen mɔɔli do la. Wo tini a fɔ «iyon», a ni ma tɔɲa le la. Wo tini a fɔ «ade», a ni ma tɔɲa le la. Ka wo ma, kiite tini sa, a te bɛn wo ye.
Ala mataraŋɛ koe bɛ butɔ
13 Mɔgɛ be wo ɲaama ba min be tɔɔrɔren? Wo tigi ni Ala mataran. Mɔgɛ be wo ɲaama ba min be ɲagalinden? Wo tigi ni Ala tantu beete bɔɔ.
14 Mɔgɛ be wo ɲaama ba min be bandiren? Wo tigi ni dɛnkɛnɛyabaga jama kuntigenu kele, anu ni Ala mataran a ye, anu ni tule do madon a ma Marige tɔgɛ la.
15 Ala mataraŋɛ min be fatanden dɛnkɛnɛya la, a si bandibaga lakendeya le. Ka a taranta a ka junube ma nun, Marige si a kafari le.
16 Awa, wo ni wo la junubenu fɔ ɲɔgɔn ye, wo ni Ala mataran ɲɔgɔn ye, alako wo ni kendeya. Telenbaga be Ala mataraŋɛ min mala, wo Ala mataraŋɛ la wale sɛnbɛ kolo.
17 Eliya mu nabiyonmɛ le la, kɔnɔ adamadeŋɛ le mu iko wo mɔle. A to ka Ala mataran a juse bɛ la alako sange kana na, sange ma boe duge tɔ han san saba kari wɔɔrɔ.b
18 Wo tanbi kɔma, Eliya mɛn ka Ala mataran, sange mɛn ni na. Saŋɛ ka sange boloka, duge kifeŋɛnu nata naa wolenu labɔɔ.c
Mɔgɔ samareŋɛ lasaagi koe Ala ma