Pɔlu la bataakɛ fɔlɛ tagala Timote ma
Kɔntɔri ma koe
1
Bataakɛ le mu ka, a be fatanden nde Pɔlu le la. N mu Ala la mɔgɔ masubɛreŋɛ Isa la kiilá do le la. Mɔ lakisilá Ala ka n sɔ wo wale le la, anun ⸂Marige⸃ Isa, Ala la mɔgɔ masubɛreŋɛ, mɔ hakkile be sɔren min ma. 2 N be kɛ bataakɛ sɛbɛla ile Timote le ma, min be maren n na deŋɛ la, dɛnkɛnɛya kɛɲa ma. Baaba Ala nun mɔ Marige Isa, Ala la mɔgɔ masubɛreŋɛ, anu ni hinnɛnteya nun jususa dii i ma, anu ni kinikini i ma.Timote la kiilaya
3 N ka i yamɔri min na n to be tagala Masedoni duge tɔ wagate min tɔ nun, n mɛn ni tasaagi wo fɔla i ye, n ko i kana bɔɔ Efɛsi de! Bayi kawandi malá donu be ɲɔ, anu bele mɔgɛnu karanna tɔɲa le la. Awa, i ni anu latɔn wo ma koe la. 4 I ni a fɔ anu haju kana to tariguenu ma, anun anu benbanu la ko fɔ koe ma, min dan bele. Wo koenu si kumare lasiya le, kɔnɔ anu te Ala la wale lataga ɲatɔ dɛnkɛnɛya butɔ. 5 Awa, n ka wo yamɔre dii le, alako kanunteya ni yiriwa, kanunteya min be fatanden jusu saniyandeŋɛ anun sondon beeyareŋɛ la, anun dɛnkɛnɛya filankafuya bele min tɔ. 6 Donu ka wo kila boloka, ka kuma fufafue jokki, han anu bɔnɔta. 7 Anu be diren mala sariya karamɔgɛnu le la, kɔnɔ anu be min fɔla, anu bele fahamu sɔtɔren wo ma. Anu bele lɔn sɔtɔren koenu ma anu be minnu fɔla sɛnbɛ la. 8 Mɔ ka a lɔn yati Ala la sariya kaɲin, ka a lawalita iko a bɛnta lawalila ki min na. 9 Mɔ mɛn be lɔn sɔtɔren kɛ koe ma: sariya bele saren mɔgɛnu le ye minnu be telenden Ala ye. A be mɔgɛnu le ye minnu bele sɔnden sariya jokkila, a be mɔgɔ murutɛreŋɛnu le ye, mɔgɛnu minnu bele sɔnden Ala ma, anun junubutɔɛnu. Sariya be saren mɔgɛnu le ye minnu bele Ala anun a la koenu biliyala. A be mɔgɛnu le ye minnu be anu baaba ka wo ma anu nɛɛnɛ fagala, anun mɔgɔ fagalanu bɛ. 10 Sariya be saren jeena malanu tugun ye, anun kayenu minnu nun anu kayiɲɔgɛnu be kafula saɲɔgɔya butɔ, anun mɔgɛ minnu be anu mɔgɔɲɔgɛnu bitala ka anu mayita, anun foniyantenu, anun mɔgɛ minnu be anu kalila foniya kunma, anun mɔgɛ minnu bɛ be Ala la sariya kende masɔsɔla koenu tɔ. 11 Kɛ kawande nun Ala nɔɔra nun hɔrɔma tige la kibaru ɲinma, a bɛ be kuma dɔndɔ le fɔren, kibaru ɲinma min nake koe be taakuren n na.
Marige la hinnɛnteya Pɔlu ye
12 N bata mɔ Marige Isa tantu, Ala la mɔgɔ masubɛreŋɛ min bata sɛnbɛ dii n ma. A ka a yen kuma dɔndɔ tige le mu n na, wolo mu a ka n sɔ a la wale la. 13 A fɔlɛ la nun, n be a fɛɛyala nun, n ni a la mɔgɛnu ɲagankata, n ni a la ko ladufen. Kɔnɔ hali wolo mu, a kinikinita n ma, bayi a ka a lɔn n be wo bɛ mala a lɔnbaliya nun dɛnkɛnɛyabaliya le la nun. 14 Marige la hinnɛnteya bata yiriwa a banba la. N nata dɛnkɛnɛya nun kanunteya sɔtɔ Isa le sabu la, Ala la mɔgɔ masubɛreŋɛ. 15 Tɔɲa kuma beeyareŋɛ pɔsi le mu ka, mɔ bɛ bɛnta mɔ ni laa min na: Ala la mɔgɔ masubɛreŋɛ Isa be naren dunuya, a ni junubutɔɛnu lakisi. Nde be maren wo junubutɔɛnu la mɔgɔ fɔlɔfɔlɛ le la. 16 Kɔnɔ Ala kinikinita n ma. Wo kinikinɛ butɔ, nde min be maren junubutɔɛ la nun ka tanbi mɔgɛ bɛ la, Isa Ala la mɔgɔ masubɛreŋɛ ka a la diɲa bɛ yita n na, alako wo ni ma misale la mɔgɛnu ye minnu be nala dɛnkɛnɛyala a ma, anu ni kise sɔtɔ dan bele min na. 17 Wo butɔ, Ala mu a mala, ale abada Mansa, min te faga, mɔgɔ yo te min yen, ale min mu Ala dɔrɔn na, biliya nun tantue ni to a ye kudai. Amina.
Pɔlu la Timote yamɔri koe
18 N na den Timote, n bata kɛ yamɔre taaku i la. Yamɔre le mu min be tabɛnden kuma ma Ala ka min najigi dɛnkɛnɛyabaganu ma anu ni a fɔ i la ko tɔ. Awa, i ni i mira wo kumanu la minnu fɔta nun i kunma, alako i ni sɛnbɛ sɔtɔ i ni kɛlɛ́ ɲinma ma 19 dɛnkɛnɛya nun sondon beeyareŋɛ la. Donu bata wo boloka. Wolo ka anu la dɛnkɛnɛya tiɲa. 20 Himene nun Alɛsandiri be wonu ɲaama. Wonu jihadi koe la, n ka anu to Sentanɛ bolo betunna, han anu ni naa a talɔn a ma bɛn anu ni Ala sɔsɔ.