Malasenu
5
Dɛnkɛnɛyabaga kuntigenu minnu be wo tɛma, n bata wo lalimaniya. Kuntige le mu nde tugun na iko wole. N be Ala la mɔgɔ masubɛreŋɛ la tɔɔrɛ la seedeɲɔgɔya bɔɔla. A la nɔɔra be nala yitala lun min na, nde tugun si biliya sɔtɔ le wo butɔ. 2 N bata wo lalimaniya, wo ni wo hakkile to Ala la jama ma min be wo la mamakantare butɔ, iko kolofen kantalá be mɛnnila a la wɔɔrɛ ma ki min na. Wo ni dɛnkɛnɛyabaganu dankun wo hanige la, wo kana a ma iko anu tini wo karahan. Wo kana a ma nafule la ko miila la. Wo ni a ma wo juse bɛ la. 3 Wo kana dɛnkɛnɛyabaganu yamɔri a bɛlɛma la, minnu bata taaku wo la. Wo ni ma misale la dɛnkɛnɛyabaga kuruŋɛnu ye. 4 Kolofen kantalá fisamante le tini na, a si wo kunnawuli, a ni nɔɔra dii wo ma min te fɛɛya.5 N bata wole fonikenu tugun nalimaniya, wo ni wo yɛtɛ majigi wo la kayibanu ye.
Wo bɛ ni wo yɛtɛ majigi ɲɔgɔn ye, bayi a be sɛbɛren de:
«Ala be fan nakoloyalá kɛlɛla le,
kɔnɔ a be hinnɛla le yɛtɛ majigilá kan na.» a
6 Wo butɔ, wo ni wo yɛtɛ majigi Ala sɛnbɛma ye, alako a ni wo la ko mayɛlɛ a wagate. 7 Wo ni wo la kɔntɔfile bɛ don a bolo, bayi a si a hajue to wo la ko ma.
8 Wo ni wo hakkile to wo yɛtɛ ma, wo ni wo yɛtɛ mɛnni. Wo jague Sentanɛ be koe bɛ mala alako a ni wo la ko tiɲa, a be toren de iko jata min be ŋurɛla, a be mɔgɛ ɲinila a ni a dɔmɔ. 9 Wo ni sɔ dɛnkɛnɛya kɔma pen, wo ni kata alako a kana nɔ sɔtɔ wo ma. Wo ka a lɔn, wo dɛnkɛnɛyaɲɔgɛ minnu be dunuya butɔ, anu bɛ be tɔɔrɔren kɛ ɲagankata mɔɔle le la.
10 Ka wo banta tɔɔrɔla wagatinden, Ala hinnɛnte si naa wo la ko tabɛn, a ni wo lalimaniya, a ni sɛnbɛ dii wo ma, a ni wo lasabati. Ale le be wo keleren wo ni to a la nɔɔra kɔtɔ abada a la mɔgɔ masubɛreŋɛ Isa kɔma. 11 ⸂Mamatɔgɛ nun⸃ sɛnbɛ be ale le ye abada. A be ɲɔgɔnna le yati!
Saara kuma
12 Silasi, min be toren n ɲɛ iko n nɛɛnɛdɔndɛ min bata timiladiya, wolo ka n dɛman kɛ bataakɛndeŋɛ sɛbɛ koe la wo ma. N ni wo lalimaniya kɛ bataakɛ la, n ni seedeɲɔgɔya bɔɔ ka a fɔla wo be Ala la hinnɛ yati le kɔtɔ.