Mɔgɛ lafisaya koe a filaɲɔgɛ ko
2
N nɛɛnɛdɔndɛnu, wo to be dɛnkɛnɛyaren wo mɔ Marige Isa nɔɔrɔ tige le ma, Ala la mɔgɔ masubɛreŋɛ, wo kana mɔgɛnu lafisaya ɲɔgɔn ko.
2 Wo mɔ ni mɔ mira kɛ misale ma: Mɔgɔ do nata wo la mamadɛndula, kurunda sanunɛŋɛ be a bole la, kuta malanna be lajigiren a ma. Fondobɔnɛ tugun nata, kuta nɔgɔreŋɛ be lajigiren a ma.
3 Ka wo ka kuta malanna tige lasɛnɛ biliya le la, wo ni naa a fɔ a ye, «Yandi, na i majigi yan, dula ɲinma le mu ka,» kɔnɔ wo ka a fɔ fondobɔnɛ kan ye, «He, taga sɔ kala,» ka wo ma, «Na sigi duge tɔ yan,»
4 wo butɔ wo bele mɔgɛ lafisayaren de ɲɔgɔn ko wo la ba? Mira koroŋɛ minnu be wo juse tɔ, wo bele a nátáren de wo la?
5 N nɛɛnɛdɔndɛ kanunteŋɛnu, wo wo tolomasɔ n na. Ala bata mɔgɛnu masubɛ minnu be maren fondobɔnɛnu la dunuya kɛɲa ma, alako anu ni ma banna mɔgɛnu la dɛnkɛnɛya kɛɲa ma. Ala bata anu masubɛ alako anu ni barikɛ sɔtɔ a la mansabaya butɔ. Wolo be lahiriren mɔgɛnu ye minnu be Ala kanuren.
6 Kɔnɔ wole, wo be fondobɔnɛnu mayola. Adun, banna mɔgɛnu le yati be wo tɔɔrɔla! Anu be wo sabaala ka taga kiiti salá dula.
7 Wo to sɔta Isa kɔma, a tɔgɛ fɔta wo kunma, a fɔ koe la «Isayanka». Bɔ ande bannanu yati bele wo tɔgɔ ɲinma mabɔsila ba?
8 Wo ni Mansa Alatala la sariya le labatu han a daŋɛ, iko a be sɛbɛren ki min na kitabue tɔ, ko: «I ni i mɔgɔɲɔgɛ kanu iko i yɛtɛ wunde.»a Ka wo ka wo ma, wo bata sɔ ko ɲinma kɔma.
9 Kɔnɔ ka wo ka mɔgɛ donu lafisaya ɲɔgɔn ko, wo bata junube ma. Sariya le be wo makiitila, ka a fɔla wo bata ma sariya sɔsɔlanu la.
10 Ka mɔgɛ ka sariya bɛ labatu kɔnɔ a ka dula dɔndɔ sɔsɔ, wo tigi bata sariya bɛ sɔsɔ.
11 Bayi, min ka a fɔ, «I kana jeena ma,» ale le mɛn ka a fɔ, «I kana faga ma.» Hali i ma jeena ma, kɔnɔ ka i ka faga ma, wo butɔ i bata ma Ala la sariya sɔsɔlá la.
12 Awa, wo ni kuma, wo mɛn ni tagaman iko minnu be nala makiitila sariya la min be hɔrɔya diila mɔgɛ ma.
13 Kiiti luŋɛ, Ala te kinikini mɔgɛ ma min ma kinikini a mɔgɔɲɔgɛnu ma. Kinikinɛ sɛnbɛ kolo kiite ko.
Dɛnkɛnɛya nun a walenu
14 N nɛɛnɛdɔndɛnu, ka mɔgɛ ka a fɔ aa a be dɛnkɛnɛyaren, kɔnɔ a bele kɛwali ɲinma mala, wo sɔdula mu fen de la ba? Wo dɛnkɛnɛya mɔɔle si nɔ a lakisila ba?
15 Ka feete bata wo nɛɛnɛdɔndɛ do bita, lun go lun balu koe kɔntɔfili be a ma,
16 mɔgɔ do ni to wo tɛma a ni a fɔ a ye, «Wakkilɛ, kima bɔɔ kuta do lajigi i ma, i ni balue ɲini i ni a dɔmɔ han i ni fa, awa Ala mu i telenna hɛra tɔ,» kɔnɔ wo bɛ butɔ wole dɛnkɛnɛyabaganu wo ma a la kɔntɔfile bɔɔ, wo kuma sɔdula mu fen na ba?
17 Awa, dɛnkɛnɛya tugun be ɲɔgɔnna le. Ka a taranta a bele mɔgɛ tuntunna wali ɲinmanu ma koe la, wo dɛnkɛnɛya ɲusu yo bele.
18 Kɔnɔ mɔgɔ do si nɔ a fɔla, «Ile, dɛnkɛnɛya tige le mu i la, kɔnɔ nde ko ɲinma malá le mu n na.» Awa, kata i ni i la dɛnkɛnɛya yita n na hali wali ɲinma bele. Kɔnɔ nde kan, n si n na dɛnkɛnɛya yita i la n na wali ɲinmanu le sabu la.
19 I be laaren a la, aa Ala dɔrɔn de. Awa, wo kaɲin koola, kɔnɔ hali jinnanu be laaren wo la, adun anu be sɛrɛnden kilaŋɛ la.
20 Ile hakkilibɔnɛ, a lɔn tun, dɛnkɛnɛya min te ko ɲinma labɔɔ, a ɲusu yo bele!
21 Fen de ka a ma mɔ benba Iburahima mata telenbaga la Ala ɲala? A ma fatan a la wali ɲinmanu le la ba? Bayi, Iburahima ka a la den kayireŋɛ Isiyaka dii Ala ma ka a sa sarika bintandula kunma a ni a kannatɛgɛ.
22 I bata a yen, Iburahima la dɛnkɛnɛya nun a waliɲa le be walila. Wali ɲinma le be dɛnkɛnɛya lakamalila.
23 Wo butɔ, a mata iko a be sɛbɛren Kitabue tɔ ki min na, «Iburama dɛnkɛnɛyata Ala ma, wolo ka a ma Ala ka a bita mɔgɔ telendeŋɛ la.»b Iburahima tɔgɛ fɔta «Ala kanunteŋɛ».
24 Wo bata a yen ⸂kɔtɛ⸃, ka mɔgɛ be dɛnkɛnɛya tun de tɔ, wolo pɛti bele a mala Ala ni a jigan telenbaga la, fɔ ka a ka wali ɲinma tugun ma.
25 Rakabi langbe muse tugun, a to ka bani Isirayila la kiilanu labɛn a bata, a ka anu dɛman anu ni bɔɔ kila gbɛtɛ la,c a la wo wale ɲinma le ma a ma ba Ala ka a jigan telenbaga la?
26 Adamadeŋɛ tini faga, a bali bangue nun foofe bele kafuren bitugun, a sɔdula bele. Dɛnkɛnɛya tugun, ka a nun wali ɲinma bele kafuren, a sɔdula bele.