Dɛnkɛnɛyabaga mɔgɔ bita ɲa
5
Ka kayiba ka koe ma min maɲin, i kana a lajarabi kuma koroŋɛ la, kɔnɔ i ni malase dii a ma iko i sɔtɔ baaba. I ni malase dii kamareŋɛnu ma iko i nɛɛnɛdɔndɔ kayimanu. 2 Musu mɔgɔbanu lasi iko i sɔtɔ nɛɛnɛ. Den musereŋɛnu tugun nasi iko i nɛɛnɛdɔndɔ baren musenu, i ni wo ma saniyaŋɛ mɔɔle bɛ butɔ.Furuɲa musenu la ko
3 Furuɲa musenu dankun a ɲinma la biliya butɔ, minnu be anu dɔrɔn ma. 4 Kɔnɔ furuɲa muse min ka deŋɛ ka wo ma mamareŋɛ sɔtɔ nun, fɔ wo furuɲa muse la deŋɛnu nun mamareŋɛnu ni degen betunna anu la dɛnkɛnɛya lawali koe la ka anu baaba la fɔgɛ dankun, alako anu ni anu sɔtɔbaganu la wali ɲinma yɔgɛ lasaagi anu ma, bayi wolo di Ala ye. 5 Furuɲa muse min be toren mɔgɔ yo bele min si a dankun, a be toren a dɔrɔn ma, wo tigi be a yige toren Ala le ma. Sue nun tele, a be Ala mataranna, a ni a madi a ma wagate bɛ. 6 Kɔnɔ furuɲa muse min be a nii diya koenu le tun jokkiren, wo be toren de iko fagabaga, hali a be foofila.
7 I ni anu yamɔri wo la, alako anu ni ma mɔgɛnu la, kɔnɔ yo bele min na. 8 Ka mɔgɛ ma sɔn a la denbaya dankunna a ɲinma la, sɔkkɔfɛrɛ a sɔtɔɲɔgɔ masutuŋɛnu, wo tigi bata dɛnkɛnɛya boloka, a la koronya bata tanbi mɔgɔ dɛnkɛnɛyabale la.
9 Furuɲa muse min si nɔ sɛbɛla furuɲa musenu ɲaama minnu bɛnta dɛmanna, fɔ a ni ma furuɲa muse le la min na simaya bata tanbi san bi wɔɔrɔ la, min be kayi dugu dɔndɔ le dɔrɔn maren. 10 A bɛnta a ni malɔn a la wali ɲinmanu la: a ka a la deŋɛnu dankun a ɲinma la; mɔgɛnu minnu be tanbila a bata, a ka wonu tugun dankun ka anu lasɛnɛ a ɲinma la, a mɛn ka dɛnkɛnɛyabaganu kɛŋɛnu lako; a ka tɔɔrɔbaganu dɛman; a ka a yɛtɛ tadii wali ɲinma mɔɔle bɛ ma koe la.
11 Kɔnɔ wo kana furuɲa sunkutuŋɛnu tɔgɛ sɛbɛ, bayi anu la diyanankoenu si anu layanfaya Ala la mɔgɔ masubɛreŋɛ la, anu mɛn be diren tasaagila sigila kayi do ye. 12 Wo butɔ, anu si ma tiɲari malá la, bayi anu bata anu la lahiri fɔlɛ tiɲa anu ka min jigan Isa ye. 13 Anu mɛn bele fenfen mala, fɔ ka taga bon nun bon tɔ, anu ni anu madari fuyanteya la. Bɔɔ wo la, anu be kumanu mafɔla le tun, anu be koenu le fɔla minnu bele anu ye kila tɔ. Koe minnu ma bɛn fɔla, anu be a mafɔla ɲatiri ɲatiri. 14 Wolo mu, n be diren furuɲa muse sunkutuŋɛnu ni tasaagi sigila kayi dugu, anu ni deŋɛnu sɔtɔ, anu ni anu la fɔgɛ latagaman. Wo butɔ, anu kana fɛrɛ dii mɔ jaguenu ma anu ni mɔ nani. 15 Bayi furuɲa muse donu ɲan bata bɔɔ kila ɲinma ma, anu bata Sentanɛ jokki.
16 Ka furuɲa musenu be dɛnkɛnɛyabaga do gabila tɔ, wo dɛnkɛnɛyabaga bɛnta a ni anu dankun, a kana anu la ko kote to dɛnkɛnɛyabaga kuruŋɛ ma, alako dɛnkɛnɛyabaga kuruŋɛ ni nɔ furuɲa muse doenu dɛmanna minnu be anu dɔrɔn ma.
Kuntigenu la ko malase
17 Ka kuntigenu ka dɛnkɛnɛyabaga jama latagaman a ɲinma la, a bɛnta dɛnkɛnɛyabaganu ni anu biliya, anu mɛn ni anu sɔŋɛ dii a ɲinma la, sɔkkɔfɛrɛ kuntigenu minnu be wakkilɛren Ala la kuma kawandi ma koe la, anu mɛn ni mɔgɛnu lakaran a la. 18 Wo butɔ, kitabue ko: «Ka ninge be i la tɔwa tɔnsɛnu matɛnna sɛnɛ tɔ alako a kole ni bɔɔ, i kana a da kiti tɔnsɔ dɔmɔ koe la.»a A mɛn ko: «Walilá bɛnta le a ni a sɔŋɛ sɔtɔ.»b 19 Wo kana sɔn kuntige makiitila seede dɔndɔ pɛti ma, fɔ seede fila ka wo ma saba. 20 Ka minnu bata ko tiɲa, wo ni a fɔ anu ye jama bɛ ɲala, alako doenu ni kilan ko tiɲa koe la.
21 N bata i yamɔri kɛ la, Ala nun Marige Isa a la mɔgɔ masubɛreŋɛ, nun a la maleka masubɛreŋɛnu ɲala. I ni kɛ koenu labatu, wo butɔ i kana mɔgɛnu latanbi ɲɔgɔn na, i kana mɔgɔ yo lafisaya mɔgɔ ko. 22 I kana teriya i bole sa koe la mɔgɛ kuŋɛ tɔ i ni wale taaku a la dɛnkɛnɛyabaga kuruŋɛnu tɔ. I kana basan mɔgɛnu la junubu koenu fɛ. I ni i yɛtɛ makanta saniyaŋɛ butɔ.
23 I kana je le tun min de. I bue la ko sabu la, i to be kɛnɛ bandila, i ni beere donden tugun min.