Joŋɛnu nun anu marigenu
6
Dɛnkɛnɛyabaganu minnu be jonya tɔ, anu ni anu marigenu jigan mɔgɔ biliyareŋɛnu la, alako Ala tɔgɛ nun mɔ la karaŋɛ kana mayo. 2 Joŋɛnu minnu marigenu be maren dɛnkɛnɛyabaganu la, hali anu marigenu to be maren anu nɛɛnɛdɔndɛ diinaɲɔgɛnu le la, a ma bɛn anu ni anu la kuma bɔtɔboe wo la. A bɛnta anu ni anu la yamɔrenu labatu a ɲinma la, tanbi koe la a fɔlɛ la, bayi wo marigenu minnu be anu la wale tɔnɛ sɔtɔla wo la, anu mu dɛnkɛnɛyabaganu le la, anu be kanuren.Bɛlɛya bɛ be masɔtɔla nafule la ko sabu le la
Awa, i ni mɔgɛnu lakaran kɛ la, ka anu lalimaniya. 3 Ka a taranta mɔgɔ do be ɲɔ, min be mɔgɛnu lakaranna mɔɔle do la, a bele mɔ Marige Isa Ala la mɔgɔ masubɛreŋɛ la kuma telendeŋɛnu yati le jokkiren, anun karaŋɛ min nun Ala ɲalakilaŋɛ si bɛn, 4 awa wo tigi bata a yɛtɛ lakoloya, a ma fenfen lɔn. A sɔgɔ be a la tun, a ni kuma kutu sɔgɔ, anu ni kuma masaba han. Wolo be miilanteya natila, bɛsɛnkɔnnɛya, ɲɔgɔn fɛɛya, anun ɲɔgɔn tɔɲɛgɛ koe. 5 Mɔgɛnu ni to sɔnkɔsɔnkɔla anu la hakkilibɔnɔya la, anu te tɔɲa yo lɔn bitugun. Anu hakkile be a ma, diina la munanfaŋɛ mu min na, harige banba sɔtɛ le wo la. ⸂I ni i mɛnni wonu ma.⸃
6 Adun tɔɲa le mu, diina la munanfaŋɛ kolo, ka a taranta dɔ mɔgɛ ka a wasadon a harige ma. 7 Mɔ ma na fenfen fɛ kɛ dunuya, mɔ mɛn be tasaagila le fenfen bele mɔ bolo. 8 Wo butɔ, dɔmɛ nun donfeŋɛ min be mɔ bolo, wo bɛnta a ni mɔ wasa. 9 Kɔnɔ mɔgɛnu minnu be diren bannaya ye, wonu si tantan de tun han anu ni bita jule tɔ. Anu ni naa miila anu diyanankoenu ko koroŋɛnu makilandeŋɛ siyama ma. Wo diyananko koroŋɛnu le be mɔgɛ kunnatiɲala, a ni naa halagi. 10 Nafulu sɔgɛ be maren wali koroŋɛ bɛ liile le la. Donu to miilata nafule ma, wolo mu anu ka dɛnkɛnɛya boloka, anu nata anu fan tɔɔrɔ a koroŋɛ la.
Dɛnkɛnɛya kunma kɛlɛ ma koe
11 Kɔnɔ ile min be maren Ala la mɔgɛ la, i ni i mabori wo koe mɔɔlenu la. I ni teleŋɛ, Ala ɲalakilaŋɛ, dɛnkɛnɛya, kanunteya, limaniya anun jusu sɛɛya jokki. 12 I ni dɛnkɛnɛya kɛlɛ́ ɲinma le ma. I ni abada kise bita. I be keleren wo kise le ma, i be a seedeɲɔgɔya bɔɔren seede siyama le ɲala. 13 N bata i yamɔri Ala ɲala, min be niilamanu bɛ labalula, n bata i yamɔri Ala la mɔgɔ masubɛreŋɛ Isa ɲala, min ka seedeɲɔgɔya ɲinma bɔɔ Pɔnsu Pilati ye nun,a 14 n ko i ni Ala la sariya labatu kɔnɔ yo bele i la, sikkɛ kana to i ma.b I ni to wo mala han mɔ Marige Isa, Ala la mɔgɔ masubɛreŋɛ be a yɛtɛ labɔɔla lun min na 15 Ala be diren a ye wagate min tɔ.
Ale le mu hɔrɔma tige la,
ale le dɔrɔn mu koe bɛ kuntige la,
mansanu la Mansa,
marigenu la Marige.
16 A dɔrɔn de te faga yen,
a be sabatiren dula nɔɔrareŋɛ le tɔ,
mɔgɔ te nɔ a madonna ka min na,
mɔgɔ yo ma a yen, mɔgɔ yo te nɔ a yenna.
Biliya nun sɛnbɛ be a bolo abada. Amina.
Bannanu lasi koe
17 Bannanu yamɔri kɛ dunuya, anu kana anu yɛtɛ lakoloya, anu kana anu la lannanteya sa anu la bannaya ma min bele nala mɛla, kɔnɔ anu ni a sa Ala le ma, min be koe bɛ diila mɔ ma a yiriwareŋɛ la alako mɔ ni sɛɛwa. 18 A fɔ anu ye, anu ni ko ɲinma le ma, anu la hinnɛnteya ni yiriwa, anu ni kɔɔrenu ma anu la harige la, anu ni fonisireya ma mɔgɛnu ye. 19 Anu ni wo bɛ ma anu la sinan ɲatɔ sige la, harige min si ma harige ɲinma la, alako anu ni naa abada kise sɔtɔ.
Saara kuma
20 Timote, i ni mɛnni koe ma min be taakuren i la. I ni i yɛtɛ matanga diina lɔnbalenu la fufafu kumanu ma, anun anu be kuma minnu fɔla iko lɔnnɛ be anu bolo, a taranta mɔgɔ masɔsɔ kuma le mu a la. 21 Minnu be wo mira mɔɔle mafatanna wonu donu nata yanfaya dɛnkɛnɛya la.
Ala mu a la hinnɛ tola i fɛ! ⸂Amina.⸃