Ala ka min bɛ da, a bɛ kaɲin
4
Hakkili saniyandeŋɛ ka a fɔ le a beeyareŋɛ pɔsi la: wagati tɔɛ la baŋɛ, donu si naa dɛnkɛnɛya boloka le, anu ni sɔ fan majanfa hakkilenu kɔma, anun karaŋɛnu minnu be fatanden jinna koroŋɛnu la. 2 Mɔgɔ foniyante filankafuenu be anu majanfala le anu la kumanu la. Wo foniyantenu hakkile bata dese iko i tini miraŋɛ dundu bafata lakunɛndeŋɛ la, anu ɲan te nɔ ko ɲinma nun koroŋɛ fatanfasila bitugun. 3 Anu be tɔŋɛ sigila futu ma koe le la, anun dɔmɛ donu dɔmɔ koe la. Kɔnɔ Ala le be wo dɔmɛnu daren mɔgɛnu ye, alako dɛnkɛnɛyabaganu minnu be lɔn sɔtɔren tɔɲa la ko ma, anu ni nɔ a dɔmɔla ka Ala tantu. 4 Ala ka min bɛ da, a bɛ kaɲin. Fenfen ma bɛn a ni aɲɛ kɔnɔ ka i be fenfen min jiganna i ni Ala tantu wo la. 5 Wo butɔ, Ala la kuma fɔ koe nun duba le be a mala ko saniyandeŋɛ la.Isa la walilá ɲinma
6 I ni i nɛɛnɛdɔndɔ diinalanu lakaran kɛ koenu la, musu nun kaye. Wo butɔ, i si ma Isa Ala la mɔgɔ masubɛreŋɛ la walilá ɲinma la, i si a yita le ka a fɔla, dɛnkɛnɛya kumanu anun kawande ɲinma le bata to i ye iko balue, i ka minnu karan koe jokki a kɛɲa ma. 7 Kɔnɔ i tuntun fufafu tariguenu la dɛnkɛnɛya bele min tɔ. I ni tirin Ala ɲalakilan koe la han i ni dari. 8 Mɔgɛ tini be tirinna a bali bangue lawali koe la, wo tugun sɔdula be ɲɔ. Kɔnɔ Ala ɲalakilaŋɛ, wolo sɔdula fisa a bɛ ko. Wo butɔ, min be kilanna Ala la, kise bata lahiri wo tigi ye kɔtɛ anun ɲatɔ. 9 Tɔɲa kuma beeyareŋɛ pɔsi le mu wo la, bɛ bɛnta a ni laa min na. 10 Wolo yati be a maren, mɔ be walila a bɛlɛma la, mɔ be malatiriŋɛ mala, bayi mɔ be mɔ yige saren Ala ma, Ala min be baluren. Ale le mu bɛ lakisilá la, sɔkkɔfɛrɛ dɛnkɛnɛyabaganu. 11 Yamɔrenu le mu wo la, i bɛnta i ni mɔgɛnu lakaran min na.
12 Mɔgɔ yo kana yo i la kamarenya ma, kɔnɔ i ni ma misale la dɛnkɛnɛyabaganu ye i la kumanu tɔ, i yɛtɛ la tagamanɲa, i la kanunteya, ⸂i hakkile⸃, i la dɛnkɛnɛya nun i la saniyaŋɛ kɛɲa ma. 13 I ni a fɛlɛ koola i ni kɛnɛ kitabue karanna mɔgɛnu ye minnu be dɛnkɛnɛyaren, han n be nala tɛmuɛ min tɔ. I ni limaniya dii anu ma, i ni anu lakaran. 14 I kana ɲina Ala la kɔɔre ma, min be i ma. I ka wo sɔtɔ nabiyonmɛya kuma le sabue la min fɔta i la ko tɔ, wo tɛmuɛ le kayibanu ka anu bole sa i kuŋɛ ma. 15 Awa, n ka i yamɔri min na, a bɛnta i ni wo sa i juse tɔ, i ni wo wale bɛ ma a maɲa ma. Wo butɔ, bɛ si a yen de, i la ko be tagala ɲatɔ ki min na. 16 I ni i yɛtɛ mɛnni a ɲinma la, anun i la jama lakaran koe. Wo butɔ, ka i tota wo lawalila, i yɛtɛ si kise sɔtɔ le, anun minnu ka anu tolomasɔ i la.