Pɔlu to koe Efɛsi saa tɔ
19
Apolosi be Kɔrɛnti wagate min tɔ, Pɔlu ka a la kila tajokki a ka kɔnkɛ jamanɛnu takuntu, han a tagata ke Efɛsi. A ka talibe donu taran ɲɔ.
2 A ka anu maɲininka, a ko: «Wo dɛnkɛnɛyata wagate min tɔ, wo ka Ala Hakkili saniyandeŋɛ sɔtɔ le ba?» Anu ka a jaabi: «Mɔ ɲan ma wo mɔɛ betunna, ka Hakkili saniyandeŋɛ be.»
3 Wo butɔ, a ka a fɔ anu ye, a ko: «Wo lasuwɛta suwɛ mɔɔle miniman na?» Anu ka a jaabi: «Yaya be malasuwɛ min mala, wo mɔɔle le.»
4 Awa, Pɔlu ka a fɔ, a ko: «Yaya ka malasuwɛ min ma, wo ka a yita mɔgɛnu bata tuubɛ. Wo butɔ, a tota a fɔla jama ye, aa min be nala ale tanbi kɔma, anu ni dɛnkɛnɛya wolo ma. Awa wolo be tabɛnden Isa ma.»
5 Anu la wo kuma mɔɛreŋɛ, anu lasuwɛta je tɔ Marige Isa tɔgɛ la.
6 Pɔlu to ka a bole sa anu kuŋɛ ma, Ala Hakkili saniyandeŋɛ nata jigi anu ma: anu fɔlɔta sii gbɛtɛnu la kumanu fɔla, anun nabiyonmɛ kuma.
7 Fayida, wo kayenu bɛ si mɔgɔ tan nun fila bɔɔ.
8 Wo tanbi kɔma, kari saba kɔtɔ, Pɔlu ni kɛnɛ donna Yahudenu kawandi ma boŋɛ butɔ, a be kumala limaniya la. Wo butɔ, a tota Ala la mansabaya la ko ɲatabɔla anu ye, a be katala a ni mɔgɛnu manɔ minnu be anu tolomasɔren a la.
9 Kɔnɔ donu hakkile be bɛlɛyaren anu ma sɔn dɛnkɛnɛyala, anu mɛn ni to kuma koroŋɛ fɔla Isa ma jama ɲala, ka a fɔla a la kila maɲin. Awa, Pɔlu bɔɔta anu kunma, a ka talibenu jigan a dana ma Tiranusi la karan boŋɛ tɔ, a tota anu kawandila tele yo tele.
10 Wo tota mala han san fila. Wolo ka a ma, Yahude ba, minnu ma ma Yahude la ba, minnu bɛ be sabatiren Asi duge tɔ, anu bɛ ka Marige la kuma mɔɛ.
11 Wo tɛmuɛ, Ala be kabanako banbanu mala mɔgɛnu ye Pɔlu fɛ,
12 han anu tota fakɛlɛnu anun wali kutanu magala a bale la, ka anu sa bandibaganu ma. Wolo ka a ma, bandenu bɔɔta anu ma, jinna koroŋɛnu tugun bɔɔta anu kɔma.
Sewa la den kayireŋɛnu la ko
13 Wo tɛmuɛ, Yahude mamatagamanna donu tugun be ɲɔ, minnu be jinna beela ka anu bɔɔ mɔgɛnu kɔma. Wonu tugun katata Marige Isa tɔgɛ lawalila jinnatɔɛnu kunma, anu ko: «N bata wo yamɔri, wo bɔɔ Isa tɔgɛ la, Pɔlu be min na ko lakela mɔ ma!»
14 Yahude sarika lakela kuntigi banba, min tɔgɔ Sewa, wo la den kayiren wɔrɔwila le be wo mala.
15 Kɔnɔ jinna koroŋɛ ka anu jaabi, a ko: «N ka Isa la ko lɔn, n ka Pɔlu la ko mɔɛ, kɔnɔ wole, ɲɔmɔ le wole kan na?»
16 Jinna koroŋɛ be kaye min na, wo boeta anu ma, a ka anu bɛ nɔ, a ka sɛnbɛ sɔtɔ anu kunma han anu tɛsɛŋɛ mabaareŋɛ borita ka bɔɔ wo boŋɛ tɔ.
17 Yahudenu ba, minnu ma ma Yahudenu la ba, minnu bɛ be sabatiren Efɛsi, wonu bɛ ka lɔn sɔtɔ wo koe ma, kilaŋɛ tugun ka anu bɛ bita; wo butɔ, anu be Marige Isa tɔgɛ lakoloyala koola.
18 Minnu be maren dɛnkɛnɛyabaga la, wonu siyama tota tagala, anu be anu la ko koron mareŋɛnu talɔnna, anu be anu fɔla kɛnɛ tɔ.
19 Minnu ka dureya ma, wonu tugun siyama ka anu la kafanu madɛn, anu tota anu bintanna a bɛ ɲala. Anu ka wo kafanu sɔŋɛ kɔnti, anu ka a taran kaalise kole wulu bi loolu le mu.
20 Marige tota a la kuma layiriwala sɛnbɛ la ɲɔgɔnna le, a mɛn be nɔ sɔtɔla.
21 Wo koenu ban kɔma, Pɔlu ka a nátá Ala Hakkile barikɛ tɔ, a ni taga Darisalamu. Wo butɔ, fɔ a ni Masedoni duge nun Akayi duge takuntu betunna. A mɛn ka a fɔ: «Ka n bɔɔta Darisalamu a fɛrɛ bele fɔ n ni ke Rɔmu saa banba tɔ tugun.»
22 Wo butɔ, a ka a dɛmanna mɔgɔ fila Timote nun Eraseti lasanba Masedoni duge tɔ, kɔnɔ ale tota betunna Asi duge tɔ.
Sɔnkɛ min mata Efɛsi saa tɔ
23 Wo wagate, ɲatadon banba mata Marige la kila la ko la.
24 Wo ka a taran kaye do be ɲɔ, a tɔgɔ Demeturisi, a be kaalise le ɲiɲala. Kuye muse min tɔgɔ Aritemi, a be wo batu boŋɛ mɔɔle lanmanu le botegela kaalise la, a ni tɔnɔ banba sɔtɔ wo tɔ a la walilanu ye.
25 Lun do, a ka a la walilanu madɛn, anun a waliɲɔgɛnu, a ka a fɔ: «N kafuɲɔgɛnu, wo bɛ ka a lɔn, ka a fɔla wo mɔ be mɔ harige sɔtɔla kɛ wale le tɔ.
26 Wo be a yenna, wo mɛn be a mɔɛla fɔla Efɛsi saa dɔrɔn ma, fayida a bata ke Asi duge bɛ tɔ, kɛ Pɔlu bata mɔgɔ siyama majuguya ka anu hakkile firifiri, a be a fɔla aa mɔgɛ bole be minnu ɲiɲala, aa batufeŋɛ ma wonu la.
27 Wo mɔ hanmɛ koola, wo mɔ la kɛ wale kana ma mɔ ma fufafu la. Wo tun ma, fɔ kuye musu banba Aritemi batu boŋɛ tugun kana kunnatiɲa. Asi duge bɛ nun dunuya mɔgɛnu bɛ be kɛ min batula, a biliya koe tugun kana tiɲa.»
28 Anu to ka wo mɔɛ, anu dumɛnta koola, anu bakkuta sɔnkɔ layɛlɛla, anu ko: «Efɛsi kaanu la kuye Aritemi, a kolo!»
29 Saa bɛ ɲatadonta. Anu ka Pɔlu tagamanɲɔgɛnu Gayusi nun Arisitariki Masedoni kaanu bita, anu borita anu fɛ mira dɔndɔ la tagala saa mamadɛndula tɔ.
30 Pɔlu dita donna jama madɛndeŋɛ kunma, kɔnɔ ɲɔ talibenu ma sɔn.
31 Asi duge kuntige minnu mu a jatigenu la, wonu donu tugun ka kiila sɔ a ma, anu ka a lasii, aa a kana don mamadɛndula tɔ.
32 Ɲatadoŋɛ bata to mamadɛŋɛ tɔ: donu be sɔnkɔla ko do la, donu tugun be sɔnkɔla ko do tugun na; mɔgɔ siyama ɲan ma mamadɛŋɛ kuŋɛ lɔn.
33 Tɛmu do latanbireŋɛ, Yahudenu ka Alɛsandiri sɔ ɲatɔ, mɔgɛ donu tugun ka koe ɲatabɔ a ye. Wo ka mamasabare ma a bole la, bayi a dita le Yahudenu kunma fɔla jama ye.
34 Kɔnɔ, jama to ka a lɔn a mu Yahude le la, anu bɛ labɛndeŋɛ ka sɔnkɛ layɛlɛ, anu be belebelela han wagati fila ɲɔgɔn, anu ko: «Efɛsi kaanu la kuye Aritemi, a kolo!»
35 Kɔnɔ a tɔɛ la, wo saa sɛbɛri malá nɔta jama masabarila, a ko: «Efɛsi kaanu, mɔgɔ miniman ma a lɔn ka a fɔla, Efɛsi saa mu kuye musu banba Aritemi batu bon kantala le la, anun kure tugun min boeta ka bɔɔ saŋɛ tɔ min mu a mulunɲɔgɛ la?
36 Mɔgɔ yo te nɔ kɛ koenu sɔsɔla, wolo mu wo bɛnta le sabarila. Wo kana fenfen ma hakkilibɔnɔya la.
37 Wo bata kɛ kayenu nati yan, kɔnɔ anu ma kuye batu boŋɛ butɔfeŋɛ kanka, anu ma tana kuma fɔ mɔ la kuye muse tugun kunma.
38 Awa kɔtɛ, ka Demeturisi nun a waliɲɔgɛnu be diren mɔgɔ do siɲɛla, kiiti sa luŋɛnu be, kiiti salanu tugun be ɲɔ: wo taga ɲɔ siɲɛre madula.
39 Ka wo be diren ko do gbɛtɛ tugun ye, wo tugun si ɲabɔ wo mɔ la mamadɛn luŋɛ min be mala a kɛɲa ma.
40 Min be tanbiren bi, wo mɔ hanmɛ anu kana wo mɔ bita murutɛ koe ma, bayi tɔɲa yo bele wo mɔ bolo mɔ si nɔ min ɲatabɔla kɛ malamaga la ko la.» Sɛbɛri malá to ka kuma ban, a ka jama boloka.