Pɔlu to koe Kɔrɛnti saa tɔ
18
Wo kɔma, Pɔlu bɔɔta Atɛni a tagata Kɔrɛnti saa tɔ.
2 A ka Yahude do taran ɲɔ, a tɔgɔ Akila, a sɔtɔta Pɔntu jamanɛ tɔ le. A be bɔɔren nala bɔɔla Itali jamanɛ tɔ, anun a la muse Pirisila, bayi Rɔmu mansa banba Kulodu dun bata Yahude bɛ yamɔri, ka a fɔla anu ni bɔɔ Rɔmu saa butɔ. Awa, kafuɲɔgɔya tota wonu nun Pɔlu tɛma.
3 Anu tota ɲɔgɔn na anu ni wale ma, bayi anu bɛ be wali mɔɔle dɔndɔ le mala: tantaa bon bolo ɲiɲalanu le mu anu la.
4 Sulen lɔ́gɛ́ bɛ, Pɔlu be kumala Yahudenu la kawandi ma boŋɛ butɔ, a be katala a ni Yahudenu lalaa anun minnu ma ma Yahudenu la.
5 Silasi nun Timote to keta ɲɔ bɔɔla Masedoni duge tɔ, Pɔlu tota kuma lake tun de tɔ, a be seedeɲɔgɔya bɔɔla Yahudenu ye, ka a fɔla Isa mu Ala la mɔgɔ masubɛreŋɛ le la.
6 Kɔnɔ anu wulita a digii ma anu be a mananila. Wo butɔ, a ka a la doroke konkon, banbaŋɛ bɔɔta, a ka a fɔ anu ye, a ko: «Ka wo samata, wole len gbaa mu! Nde bata wo kote bɔɔ n kunma! Kɔtɛ n si naa taga sii gbɛtɛ mɔgɛnu ma.»
7 Wo butɔ, a bɔɔta ɲɔ, a donta kaye do la boŋɛ tɔ, a tɔgɔ Titiyusi Susutusi. Wo be donden Yahudenu la diina tɔ. A la boŋɛ be kawandi ma boŋɛ kɛnna le.
8 Awa, kawandi ma boŋɛ kuntige Kirisipisi, anun a la denbaya bɛ dɛnkɛnɛyata Marige ma. Kɔrɛnti kaa siyama to be Pɔlu la kuma mɔɛla, ande tugun mata dɛnkɛnɛyabaga la, anu lasuwɛta je tɔ.
9 Lun do sue tɔ, Pɔlu kibota. Marige kumata a ye wo kiboe tɔ, a ko: «I kana kilan, i kana i mɔdɛ jen, i ni to kumala!
10 N be i kɔma, mɔgɔ yo bole te ke i ma, a ni ko koroŋɛ ma i la. I ni wakkilɛ bayi jama banba si naa ma n tɛŋɛ la kɛ saa butɔ.»
11 Pɔlu ka san dɔndɔ kari wɔɔrɔ ma ɲɔ, a tota anu kawandila Ala la kuma la.
12 Wo ka a taran, Galiyon be maren dugu mansa la Akayi duge kunma. Awa wo wagate le, Yahudenu wulita Pɔlu digii ma hanige dɔndɔ la, anu ka a doni kiiti sa boŋɛ tɔ,
13 anu ko: «Kɛ kaye be mɔgɛnu hakkile firifirila, aa anu ni Ala batu kɛɲa do ma, sariya bele min fɔren.»
14 Pɔlu to dita kumare fɔlɔla, Galiyon ka a fɔ Yahudenu ye, a ko: «Ee wole Yahudenu, ka a ka telenbaliya le ma nun, ka wo ma wali koroŋɛ mɔɔle do, n bɛnta le n ni n tolomasɔ nun wo la koola.
15 Kɔnɔ wo to be sɔsɔre mala kuma nun tɔgɛnu anun wo tɛn sariya le la ko la, wo be wole len ma. Nde te sɔn wo ɲɔgɔn koenu makiitila!»
16 Wo butɔ, a ka anu bee anu ni bɔɔ kiiti sa boŋɛ tɔ.
17 Wo kɔma, anu bɛ ka kawandi ma boŋɛ kuntige Sositɛni bita, anu ka a botege kiiti sa boŋɛ tɔ ɲɔ. Galiyon dun haju bele wo koe hali dɔndɔ ma.
Pɔlu saagi koe Antiyoki saa tɔ
18 Awa wo kɔma, Pɔlu ka tele siyama tugun ma ɲɔ. A saarata ɲɔ nɛɛnɛdɔndɛnu la wagate min tɔ, a nun Pirisila anun Akila jigita kulun banba butɔ, tagala Siri jamanɛ mafanna. Wo ka a taran, a bata a kuŋɛ si Sankareya bakki dala, bayi a ka lahire jigan nun Ala ye.
19 Anu tagata ke Efɛsi saa tɔ, Pɔlu ka a tagamanɲɔgɛnu to ɲɔ le. Ale donta kawandi ma boŋɛ tɔ, a nun Yahudenu sumunta.
20 Anu be a madiyala a ni wagati do ma ɲɔ, kɔnɔ wo ma a kuŋɛ jigan.
21 A saarata anu la, a ko: «Ka Ala sɔnta, n mɛn si tana wo bata.»
22 Awa, a bakkita kulun banba tɔ, a bɔɔta Efɛsi tagala Sesare saa tɔ. A bɔɔta ɲɔ, a yɛlɛta Darisalamu a ka dɛnkɛnɛyabaga jama ban kɔntɔnna, a mɛn jigita Antiyoki saa tɔ.
23 A ka wagati do ma ɲɔ, a mɛn ka kila tabita, a be Galati nun Firigi dugenu takuntula saa nun saa, a tota talibenu lalimaniyala.
Apolosi la ko Efɛsi saa nun Kɔrɛnti saa tɔ
24 Wo ka a taran, Yahude do tagata ke Efɛsi, a tɔgɔ Apolosi. A sɔtɔta Alɛsandiri saa tɔ le. A kusan kumala, a mɛn be Ala la kitabuenu karanden han.
25 Ale kaye be Marige Isa la kila lɔnden. A be yantɛren wo la Hakkile Saniyandeŋɛ la, a be Isa la koenu fɔla, a be mɔgɛnu karanna wo tɔ a kɛɲa ma. Kɔnɔ a ka Yaya la malasuwɛ la ko pɛti le lɔn.
26 A ka kawandi fɔlɔ limaniya la Yahudenu kawandi ma boŋɛ butɔ. Pirisila nun Akila ka a lamɔɛ wagate min tɔ, anu ka a madon anu la, anu ka Ala la kila kɔtɔ ɲatabɔ a ye a kɛɲa ma ka tanbi a fɔlɔnɛŋɛ la.
27 Wagate do latanbireŋɛ, a sɔgɔ ka a bita, a ni tanbi kela Akayi duge tɔ. Wo butɔ, Efɛsi nɛɛnɛdɔndɛ diinaɲɔgɛnu ka sɛbɛre lasanba Akayi talibenu ma anu ka anu lalaa, ka a fɔla anu ni a labɛn a ɲinma la. A la kereŋɛ ɲɔ, minnu mata dɛnkɛnɛyabaga la Ala la hinnɛnteya sabu la, a ka wonu dɛman koola,
28 bayi a be nɔ sɔtɔla Yahudenu ma sɛnbɛ la kɛnɛ tɔ, a be a yitala kitabue tɔ, aa Isa le mu Ala la mɔgɔ masubɛreŋɛ la.