Tɔɔrɔbaga la Alatala matɔgɔ koe a nɛ kisi kɔma
116
Alatala di n ɲɛ.
A be n kulɛ mɔɛla, a be n na mamataraŋɛnu mɔɛla.
2 A be a tolomasɔren n na.
N si a mataran de n na simaya bɛ butɔ.
3 N be n nii makɛlɛ le tɔ nun,
aligiyama mira bata to n ɲɛ,
kilaŋɛ nun jusu bɔɛ tun de be n na nun.
4 Kɔnɔ n ka n kulɛ mayɛlɛ Alatala tɔgɛ la,
n bata a madiya: «Ee Alatala! n nakisi kɛ ɲagankata ma!»
5 Alatala hinnɛta n na.
Wo mɔ Marige Ala telenta, a mɛn kinikininte.
6 Alatala si mɔgɛnu kanta le minnu te nɔ anu yɛtɛ kunma kɛlɛ mala.
Sɛnbɛ yo bele n na nun, kɔnɔ a ka n nakisi.
7 Awa, n juse ni sa kɔtɛ,
bayi Alatala bata ko ɲinma ma n ɲɛ.
8 Iyon, i ka n nɛ lakisi faga ma,
i ka ɲaje bɔɔ n ɲa tɔ, i ka n natanga kɛn natuge ma.
9 Kɔtɛ, Alatala ɲa be n na, a be n yenden
n be tagamanna ki min na dunuya mɔgɔ balureŋɛnu tɛma.
10 N be dɛnkɛnɛyaren de,
hali n to be nagasila nun,
11 han n ka a fɔ n juse mafureŋɛ la:
«Mɔgɛ bɛ mu foniyante le la.»
12 Alatala ka wali ɲinmanu min bɛ ma n ɲɛ,
n si nɔ a lasagila a ma kama le?
13 Awa, n ni Alatala matɔgɔ.
A to ka n nafulen, n ni malafulen pɔɔte mayɛlɛ a tantu koe la.
14 Lahirenu minnu be n nun Alatala tɛma, n si anu lakamali le,
a la jama bɛ ɲala.
15 Alatala la lannante mɔgɛ la faga koe,
a bele maren ko lanmandeŋɛ la a ye!
16 Ee Alatala, n bata i táran,
bayi nde i la jondeŋɛ, n bata n timiladiya i ye.
I la jon muse tugun na deŋɛ le mu n na.
I bata n kiti jule fulen.
17 N si sarika bɔɔ i ye i la walisa koe la.
Ile Alatala, n si i tɔgɛ tantu le.
18 Lahirenu minnu be n nun Alatala tɛma, n si anu lakamali le,
a la jama bɛ ɲala.
19 N si wo ma le Alatala la batu boŋɛ tatta banba butɔ,
Darisalamu jama be madɛnna ka min na.
Wo Alatala tantu!