Alatala bata n bɔɔ n kilan koe bɛ tɔ
34
Dauda to ka a yɛtɛ ma dakue la mansa Abimelɛki ɲala, alako a ni a boloka,a wo boloka tanbi kɔma, Dauda ka kɛ beete bɔɔ.
2 N si Alatala batu tɛmuɛ bɛ;
a tantu koe si to n da tɔ wagate bɛ.
3 N si Alatala matɔgɔ n juse tɔ,
tɔɔrɔbaganu si na wo mɔɛ, anu ni sɛɛwa.
4 Ee, wole nun nde ni Alatala biliya.
Wo mɔ ni a tɔgɛ lakoloya.
5 N ka Alatala mataran a nata n jaabi,
a ka n na kilaŋɛ bɛ bɔɔ n ma.
6 Minnu ka anu ɲa sɔ Alatala la, anu nɔɔrɔta;
anu te malu abada.
7 Ka nde tɔɔrɔbaga ka n kulɛ labɔɔ, Alatala ka wo mɔɛ;
a si n nakisi le, a ni n bɔɔ wo tɔɔrɛ bɛ tɔ.
8 Alatala la maleka be Ala ɲalakilannanu lamilinden,
a be anu kantala alabalawɛ ma.
9 Ee, wo a fɛlɛ ba Alatala kaɲin de!
Hɛra be mɔgɛ ye, min hakkili be sɔren a la.
10 Wo kilan Alatala la, wole a la saniyanbaganu,
bayi ka minnu kilanta a la, anu te fo fenfen na.
11 Jata deŋɛ si nɔ fola feŋɛ la a ni tɔɔrɔ kɔnkɛ la,
kɔnɔ Alatala ɲinilá kan te fo fenfen ɲinma la.
12 N na deŋɛnu, wo na, wo ni wo tolomasɔ n kulɛ la.
N ni wo lakaran Alatala ɲalakilaŋɛ la.
13 Simaya yanfama sɔgɔ be ɲɔmɔ le la?
Ɲɔmɔ le be diren tola sɛɛwa tɔ tɛmuɛ bɛ?
14 Awa, fɔ i ni mɛnni i da le ma, i kana kuma koron fɔ,
ka wo ma janfa kuma.
15 Wo ni bɔɔ ko koroŋɛ kɔma, wo ni ko ɲinma le ma.
Wo ni jususa ɲini, wo ni sɔ wolo kɔma.
16 Alatala ɲa be a batulanu la,
a tole be anu diri kulɛ la.
17 Alatala be a kɔ sɔren ko koron malanu la,
alako a ni anu tɔgɛ lamuttɛ duge kunma.
18 Telenbaganu minnu ka anu kulɛ labɔɔ a ma, Alatala ka wonu kulɛ mɔɛ.
A ka anu lakisi, a ka anu bɔɔ anu la tɔɔrɛ bɛ tɔ.
19 Alatala be mɔgɛnu kɛnna, minnu juse bata tɔɔrɔ,
a be mɔgɛnu lakisila, minnu juse bata makasa.
20 Telenbaganu la tɔɔrɛ siyata,
kɔnɔ Alatala si anu lakisi le, ka anu bɔɔ anu la tɔɔrɛ bɛ tɔ.
21 A ni anu kole bɛ mɛnni,
hali dɔndɔ te kati.
22 Ko koroŋɛ le be ko koron malá fagala.
Minnu be telenbaganu kɔnna wonu si naa anu la junube sɔŋɛ sɔtɔ.
23 Alatala la jondeŋɛnu, minnu be tangare ɲinila a la,
a si wonu kunka le, hali dɔndɔ te kiiti koroŋɛ sɔtɔ.