Junubutɔɛ la junube kafari koe
32
Dauda la mɔgɛ lakaran beete do le ka.
Hɛra be mɔgɛ ye, min junube bata bɔɔ a ma,
min na wali koroŋɛ bata kafari.
2 Hɛra be mɔgɛ ye, Alatala te min bita a la wali koroŋɛ la ko la,
anun mamafue bele min hakkile tɔ.
3 N to ma n na wali koroŋɛ talɔn, n ma nɔ bɔɔla tɔɔrɛ tɔ.
Tele tɔ bɛ n be kɛnɛ tɔɔrɔla le nun.
4 I bata i bole sa n ma nun, ka n ɲagankata sue nun tele.
N bata nagasi iko tele be sɔren kifeŋɛ min ma janfue butɔ.
I sulen.
5 Awa, n nata n na junube yita i la,
n ma n na wali koroŋɛ dogon bitugun.
N bata a fɔ: «Fɔ n ni n na junube ɲakaran ile Alatala ye.»
Ile Alatala bata n na junube kote bɔɔ n ma.
I sulen.
6 Wolo mu, mɔgɔ telendeŋɛ bɛ bɛnta anu ni i táran a wagate.
Ka tɔɔrɛ koloyata iko banbaraŋɛ, a te fenfen ma anu la.
7 Alatala, ile le be maren n suturalá la.
I mɛn si n natanga suunɛ ma.
N si ɲagalin sɔnkɛ layɛlɛ le i la malakise sabu la i be min bɛ maren n ɲɛ.
I sulen.
8 A bɛnta wo ni kila min jokki, n si wo lakaran de a la.
N si n hakkile to le wo la ko ma, n mɛn si wo lasii le.
9 Wo kana to iko soee, ka wo ma sofale hakkili bɔnɛ,
min te latagaman fɔ mɔgɛ ni karafue ladon a da tɔ.
10 Ko dumɛndeŋɛ siyama be mandiren mɔgɔ koroŋɛ ye,
kɔnɔ min be laaren Alatala la,
a la fonisireya si wo tigi lamilin de.
11 Mɔgɔ telendeŋɛnu, wo sɛɛwa Alatala la, wo mɛn ni ɲagalin.
Wo Ala tantu ɲagaliŋɛ butɔ wo kulɛ mayɛlɛreŋɛ la,
wole minnu juse be telenden a ye.