Ala be barikɛ min sala mansa ma
21
Dauda la beete do le ka, beeti bɔɔlanu la kuntige ye.
2 Ee Alatala, mansa bata sɛɛwa i sɛnbɛ la;
a mɛn bata ɲagalin a banba la, bayi i bata a lakisi.
3 I bata a juse diyanankoe ma a ye;
i ma balan a la mamataraŋɛ la.
I sulen.
4 Bayi i bata a labɛn nɛɛma banba la;
i bata mansa kufunɛ sanunɛŋɛ sigi a kunma.
5 A ka simaya ɲini i la, i ka wo dii a ma;
a la simaya si mɛ han.
6 A la biliya bata koloya i la kise sabu la;
i bata kunnawule nun nɔɔra sa a ma.
7 I to be a kɛnna, i be a lasɛɛwala;
i be barikɛ sala a ma kudai.
8 Mansa be yigi saren Alatala le ma;
Ala min mayɛlɛta, wo la kanunteya sabu la, a te naa lamaga feu.
9 I bole be nala i jaguenu bɛ masɔtɔla le;
i bolo ɲinma be nala i kɔnnanu masɔtɔla.
10 I tini i fan nabɔɔ lun min na,
i si anu bintan ta banba tɔ.
Alatala la dumɛ butɔ, a si anu halagi;
ta ni anu dɔmɔ.
11 I ni anu bɔnsɛnu tugun halagi anu ni bɔɔ dunuya;
anu wo yuruyanu ni sama adamadeŋɛnu tɛma.
12 Hali anu ka ko koroŋɛ nátá anu juse tɔ i mafanna,
anu ka janfa min kiti, wo te naa gasɛ;
13 bayi i si i la ndakanu fili anu ma,
i ni anu bee.
14 Alatala, yandi i ni wuli i ni i sɛnbɛ yita;
mɔ ni beete bɔɔ ka i sɛnbɛ matɔgɔ.