Dula saniyandeŋɛ lanpu sigifeŋɛ
24
Alatala kumata Musa ye, a ko:
2 «I ni Isirayila kaanu yamɔri, anu ni oliwiye tulu ɲinma nati i ye min be sala lanpue tɔ, alako lanpuenu minnu be sigiren lanpu sigifeŋɛ tɔ hɔrɔma dingira tanta butɔ, anu ni to bitaren wagate bɛ.
3 Harona ni a hakkile to lanpuenu ma minnu be ɲɔla parawan banba sɔngɔ la, parawan min be bakkuren a ni dula saniyandeŋɛ fisamante dogon. Lahiri seedeɲɔgɔya kankira be ɲɔ le. Harona ni a ma lanpuenu ni bita nde Alatala ɲala bɔɔla wura la han saguma tɛmuɛ bɛ tɔ. Sariya le mu wo la wo nun wo bɔnsɛ ye abada.
4 Awa, Harona ni a hakkile to kɛ lanpuenu ma minnu be sigiren lanpu sigifeŋɛ sanunɛŋɛ kunma nde Alatala ɲakɔtɔ.»
Dɛgɛ sareŋɛnu Ala tabɛŋɛ tɔ
5 Ala mɛn ko: «Wo ni sugu kolo ɲinma tugureŋɛ ɲiɲa dɛgɛ tan nun fila la, dɛgɛ yo dɛgɛ boroŋɛ ɲa fila.
6 Wo ni anu sa ɲɔgɔn kunma sanu teebile kunma sa fila: wɔɔrɔ ni to sɔngɔ, wɔɔrɛ doe ni to sɔngɔ.
7 Wo ni sorayi ɲinma sa dɛgɛ sareŋɛnu sɔngɔ, a ni to bintanna nde Alatala ye. Wo butɔ, a ni ma tɔnkuma la wo dɛgɛnu faliŋɛ la.
8 Sulen lɔ́gɛ́ bɛ dɛgɛ namanu ni kɛnɛ sala nde Alatala ɲala teebile la. Sarika lakelanu be wo mala Isirayila kaanu bɛ tɔgɛ le la. Lahiri lakotireŋɛ le mu wo la Isirayila kaanu ye abada.
9 Wo dɛgɛnu be naala mala Harona nun a la deŋɛnu tɛŋɛ le la, anu ni anu dɔmɔ dula saniyandeŋɛ do tɔ. Bayi, sarika min be bintanna nde Alatala ye, a faliŋɛ le mu. Wo butɔ, sarika le mu min be saniyanden han a tanbita a tɔ. Sariya le mu min te tiɲa abada.»
Alatala tɔgɛ fɛɛya koe
10 Wo ka a taran, mɔgɛ do be Isirayila kaanu tɛma, a nɛɛnɛ mu Isirayila kaa le la, a baaba Misira kaa. A ka a madon Isirayila kaa do la, kɛlɛ boeta anu tɛma.
11 Wo butɔ, wo Isirayila muse la deŋɛ ka Alatala tɔgɛ fɛɛya, a ka a nani. Ale mɔgɛ nɛɛnɛ tɔgɔ le Selɔmiti, Dibiri la den musereŋɛ, Dan bɔnsɛ. Wolo mu, anu ka a doni Musa dula.
12 Anu ka a kanta a kantaɲa ɲinma la han Alatala da ni a la ko ɲatabɔ anu ye.
13 Awa, Alatala kumata Musa ye, a ko:
14 «Jama ni narili malá doni daaka kɔma la. Minnu be wo narile mɔɛren, anu bɛ ni anu bolenu sa a kuŋɛ tɔ. Jama bɛ ni naa a mabun kure la han a ni faga.
15 I mɛn ni a fɔ Isirayila kaanu tugun ye, mɔgɔ min yo ka Ala nani, wo junube kote si to a kunma.
16 Min ka nde Alatala tɔgɛ fɛɛya, jama bɛ ni a mabun kure la han a ni faga tekku. A mata luntaŋɛ la ba, a mata takaŋɛ la ba, a ni faga Ala tɔgɛ fɛɛya koe la.
17 Min tini mɔgɛ faga, ale tugun ni faga tekku.
18 Min tini mɔgɔ do la kolofeŋɛ faga, a ni a faliŋɛ don a bolo. Nɛɛ faliŋɛ mu nɛɛ le la.
19 Min tini a kafuɲɔgɛ maba, ale tugun ni maba wo mɔɔle la.
20 Kate sɔŋɛ mu kate le la. Ɲa sɔŋɛ mu ɲa le la, ɲiŋɛ sɔŋɛ mu ɲiŋɛ le la. A ni ma iko a ka a ma a kafuɲɔgɛ la ki min na.
21 Min tini mɔgɛ la kolofeŋɛ faga, a bɛnta a ni a faliŋɛ dii, kɔnɔ min tini a mɔgɔɲɔgɛ faga, wo tigi tugun bɛnta a ni faga.
22 Luntaŋɛnu anun takaŋɛnu, sariya mɔɔli dɔndɔ le be anu bɛ ye. Nde le mu Alatala la, wo Marige Ala.»
23 Musa to ka wo kuma fɔ Isirayila kaanu ye, anu ka wo narili malá doni daaka kɔma la, anu ka a mabun kure la han a fagata. Wo butɔ, anu ka Alatala la yamɔre bita iko Alatala ka Musa yamɔri ki min na.