Sarika base la ko sariya
17
Alatala kumata Musa ye, a ko:
2 «A fɔ Harona nun a la deŋɛnu ye, anun Isirayila kaanu bɛ, i ko, Alatala be kɛ yamɔre le saren.
3 Ka Isirayila kaa min ka ninge, ka wo ma saaka, ka wo ma baa bɔɔ sarika la daaka tɔ, ka wo ma daaka kɔma,
4 kɔnɔ a ma a doni hɔrɔma dingira dondula tɔ, alako a ni a dii Alatala ma sarika la hɔrɔma dingira dula, wo tigi be tola le iko faga malá. Wo tigi to bata base labɔɔ, a bɛnta le a ni labɔɔ jama ɲaama.
5 Kɛ yamɔre be a yitaren de, Isirayila kaanu ma bɛn anu ni sarika bɔɔ wula butɔ. Fɔ anu ni kanunteya sarika nati sarika lakelá dula Alatala ɲala a la hɔrɔma dingira tanta dondula.
6 A la kereŋɛ ɲɔ, sarika lakelá ni wo base wussɛ Alatala la sarika bintandula sɔngɔnu ma, sarika bintandula min be hɔrɔma dingira tanta dondula ɲakɔtɔ. A mɛn ni kɛ́ŋɛ́ bintan, a kuɲɛ ni diya Alatala ye.
7 Isirayila kaanu te sarika bɔɔ sikule kuyenɛŋɛnu ye bitugun. Wo be maren janfanteya le la Ala mafanna. Wole go, wo bɔnsɛ go, yamɔre le mu wo ye min te tiɲa abada.
8 Wo butɔ, i ni a fɔ anu ye a ɲinma la, i ko, Isirayila kaa, ka wo ma luntaŋɛnu minnu be sabatiren anu tɛma, ka a ka sarika bintannɛŋɛ bɔɔ, ka wo ma sarika gbɛtɛ,
9 a ni a doni hɔrɔma dingira tanta dondula ɲakɔtɔ, alako a ni a dii Alatala ma. Ka a ma wo ma, a tigi si bɔɔ le a la jama ɲaama.
10 Ka Isirayila kaa do, ka wo ma luntaŋɛ do min be sabatiren Isirayila kaanu tɛma, ka a ka kolofeŋɛ min yo basi min, n si n ɲamatelen wo tigi ma, n ni naa a labɔɔ a la jama ɲaama;
11 bayi sube nɛɛ be a base le tɔ. Nde bata base le dii wo ma, a ni ma wo ye kunsara la wo nɛɛ la ko tɔ, base min be bɔɔla sarika la, sarika bintandula kunma. Iyon, base le mu kunsara la.
12 Wolo mu, n bata wole Isirayila kaanu yamɔri, mɔgɔ yo kana base min wo tɛma. Luntaŋɛnu minnu be sabatiren wo tɛma, wonu tugun kana base min.
13 Ka Isirayila kaa do, ka wo ma luntaŋɛ min be sabatiren wo tɛma, ka a ka sube do faga, ka wo ma kondeŋɛ do, min be ladagɛren a ni dɔmɔ, a ni wo base bɔn duge tɔ, a ni bangue sa a kunma,
14 bayi sube nɛɛ be a base le tɔ. Wolo mu, n bata Isirayila kaanu yamɔri, wo kana subu base yo min, bayi sube nɛɛ be a base le tɔ. Min yo ka wo ma, a si naa labɔɔ le Isirayila jama ɲaama.
15 1A mata Isirayila kaa la ba, a mata luntaŋɛ la ba min be wo tɛma, ka mɔgɔ do ka sube dɔmɔ min bata faga a yɛtɛ ma, ka wo ma subu do ka min faga, wo tigi ni a la kutanu ko je la, a mɛn ni a yɛtɛ ko. A te saniyan fɔ wura la.
16 Kɔnɔ ka a ma a la kutanu ko, a mɛn ma a bale ko, wo saniyanbaliya si to le a kunma.»