Jama bɛ Kunsara Luŋɛ la ko
16
Harona la den fila to fagata anu yɛtɛ lakoloya sabue la Alatala ma, Alatala kumata Musa ye:
2 «A fɔ i kɔtɔ Harona ye, a tini don hɔrɔma dingira tanta butɔ, a kana tanbi parawan bakkureŋɛ kɔma tɛmuɛ bɛ, han ka don ɲɔ dula saniyandeŋɛ fisamante tɔ, alako a kana faga. Bayi, nde be bɔɔla luuture tɔ ɲɔ le, lahire seedeɲɔgɔya kankira be ka min na, junubu kafare dataguraŋɛ be saren kankira min da la.
3 Harona si don min fɛ, wolo mu ka: tuura base nun saaka kontoŋɛ base. Tuura be naala bɔɔla junubu kafari sarika la, saaka kontoŋɛ be naala bɔɔla sarika bintannɛŋɛ la.
4 Harona si doroki banba saniyandeŋɛ lajigi a ma, a geseputu nɛŋɛ. A ni kurute geseputu nɛŋɛ don, a ni a tɛ takiti tɛtakitiraŋɛ geseputu nɛŋɛ la, a ni a kuŋɛ tarɛ kuntarɛfeŋɛ la. Kuta saniyandeŋɛnu le mu wonu la, a si minnu lajigi a ma, fɔ a tini ban a kola je la wagate min tɔ.
5 Isirayila jama ni sikulu fila don a bolo junubu kafari sarika la, anun saaka konton dɔndɔ sarika bintannɛŋɛ la.
6 Harona ni tuura nati min si naa ma a yɛtɛ junubu kafari sarika la, ale nun a la denbaya kunsara la.
7 A ni wo sikulu fila sɔ Alatala ɲala, hɔrɔma dingira dondula.
8 A ni tonbola ma wo sikulu fila la ko tɔ. Dɔndɛ si ma Alatala tɛŋɛ la, jɔnɔn doe ni naa laboloka.
9 Tonbola ka sikule min masubɛ Alatala tɛŋɛ la, Harona ni wo bɔɔ junubu kafari sarika la.
10 Tonbola ka sikule min masubɛ a ni laboloka, wo bele fagala. Harona ni wo sɔ Alatala ɲala, a ni naa ma sikulu bolokanɛŋɛ la janfue tɔ junube kunsara la.
11 Awa, Harona ni wo tuura fɔlɔ bɔɔ a tɛn junubu kafari sarika la, a ni ma ale nun a la denbaya kunsara la. A ni wo tuura kannatɛgɛ junubu kafari sarika la.
12 A ni sorayi bintanfeŋɛ lafa ta kenbue la, min be jiganden sarika bintandula kunma nde Alatala ɲala. A mɛn ni sorayi munge bolo ɲa fila jigan. A ni wo bɛ doni parawan kɔma min be dula saniyandeŋɛ nun dula saniyandeŋɛ fisamante fatanden.
13 A la kereŋɛ ɲɔ, Harona ni wo sorayi bintan ɲɔ, nde Alatala ɲala. Wo sorayi siise min be yɛlɛla, a ni seedeɲɔgɔya kankira dataguraŋɛ madogon Harona la. Wolo si a ma a te faga.
14 A ni tuura base do jigan a bolo soliŋɛnu la, a ni a lasulen kankira dataguraŋɛ ma, tele yɛlɛ mafanna. A mɛn ni a lasulen kunɲama wɔrɔwila duge tɔ wo dataguraŋɛ ɲatɔ.
15 Wo kɔma, a ni bɔɔ, a ni naa sikule kannatɛgɛ jama la junubu kafari sarika la. A ni a base doni parawan bakkureŋɛ kɔma la. A ni wo base lasulen lahiri kankira dataguraŋɛ ma, anun duge tɔ wo dataguraŋɛ ɲatɔ, iko a ka tuura base ma ki min na.
16 Dula saniyandeŋɛ fisamante be kunsara sɔtɔla ɲɔgɔnna le, Isirayila kaanu la saniyanbaliya la, anu la ko koroŋɛnu, nun anu la junubenu la ko la. Harona ni naa a ma ɲɔgɔnna hɔrɔma dingira tanta butɔ tɔɛ tugun ye, bayi a be sɔren Isirayila kaanu saniyanbalenu tɛma.
17 Fanni Harona be donden hɔrɔma dingira tanta butɔ kunsara ma koe la, mɔgɔ yo kana to hɔrɔma dingira butɔ han a tini bɔɔ wagate min tɔ. A ni ale nun a la denbaya kunsara, anun Isirayila jama bɛ.
18 A ni bɔɔ bara tɔ, a ni taga sarika bintandula min be nde Alatala la hɔrɔma tanta dondula ɲatɔ, a ni kunsara bɔɔ wo sarika bintan dula ye. A ni tuura nun sikule base do jigan, a ni a sa binanu ma minnu be sarika bintandula tunku naanɛ ye.
19 A ni base do lasulen a bolo soliŋɛnu la sarika bintandula ma kunɲama wɔrɔwila, alako a ni saniyan Isirayila kaanu la saniyanbaliya sabu la.
20 Dula saniyandeŋɛ fisamante yo, hɔrɔma dingira tanta butɔ tɔɛ yo, sarika bintandula yo, Harona tini ban kunsara mala wo bɛ ye, a ni naa sikule doe madon min ma faga.
21 A ni a bolo fila sa wo sikule kun tɛma, a ni Isirayila kaanu la saniyanbaliya, anu la ko koroŋɛnu, anun anu la junube bɛ yita nde Alatala la. A ni wo kote bɛ sa sikule kunma. Mɔgɔ do be ɲɔ, anu ka min sɔ nun. Harona ni sikule don a bolo, a ni a doni janfue butɔ, a ni a boloka ɲɔ.
22 Wo sikule be junube bɛ donila a kunma janfue tɔ, a bolokata ka min na.
23 Wo tanbi kɔma, Harona ni don hɔrɔma dingira butɔ, a ni a la kuta gesepute nɛŋɛ bɔɔ a ma, a ka min don nun yannun a ni don dula saniyandeŋɛ fisamante tɔ. A ni wonu to ɲɔ.
24 A ni taga a bale ko je la dula do tɔ ka min be saniyanden, a ni kuta gbɛtɛnu don. A tini wo ban, a ni bɔɔ, a ni sarika bintannɛŋɛ fila bɔɔ, dɔndɛ a yɛtɛ tɛŋɛ, doe jama tɛŋɛ. Wo butɔ a si kunsara sɔtɔ le a yɛtɛ ye anun jama ye.
25 Kɛ́ŋɛ́ min be junubu kafari sarika ma, a ni naa wo bintan sarika bintandula kunma.
26 Min ka sikule boloka janfue tɔ, wo bɛnta a ni naa a la kutanu ko, a ni a bale ko, jɔnɔn a ni saagi daaka butɔ.
27 Tuura nun sikule minnu be bɔɔren junubu kafari sarika la, anu base mata kunsara sarika la dula saniyandeŋɛ fisamante tɔ, anu bɛnta anu ni wonu doni daaka kɔma la. Anu bolé yo, anu sube yo, anun anu jaaɲɛ bɛ ni bintan ta la.
28 Min be anu bintanna, a ni naa a la kutanu ko, a ni a bale ko je la, jɔnɔn a ni saagi daaka butɔ.
29 Sariya le wo la wo ye min te tiɲa abada. Wo kari wɔrɔwilaɲɔgɛa tele tan luŋɛ, wo ni sun wo lun, wole nun mɔgɛnu min be sabatiren ɲɔ kɔnɔ anu ma ma Isirayila kaanu la, wo kana wali yo ma wo lun.
30 Bayi a si ma kunsara luŋɛ la wo ye, alako wo ni saniyan, wo la junubu bɛ ni kafari Alatala ɲala.
31 Wo lun be mala wo ye sulen luŋɛ yati le la, anun sali luŋɛ. Wo ni sun wo lun. Wo sariya te tiɲa abada.
32 Ala be min masubɛren, a be a sɔren sarika lakelá kuntigiya la, wo tigi le be wo kunsarala. A baaba tota wale min mala nun, ale tugun ni a ma. Wo lun, a ni sarika lake kuta saniyandeŋɛnu don.
33 A ni kunsara ma dula saniyandeŋɛ fisamante ye, hɔrɔma dingira tanta butɔ tɔɛ, sarika bintandula, sarika lakelanu nun Isirayila jama bɛ ye.
34 Kɛ sariya te tiɲa abada, alako san yo san kunsara ni ma Isirayila kaanu ye anu la junube bɛ la ko la.»
Awa, anu ka Alatala la yamɔri bɛ bita iko a ka a fɔ Musa ye ki min na.