Hɔrɔya 21

Bani Isirayila kaanu la jonya sariya

Ala mɛn ka a fɔ: «Sariyanu le mu kɛnu la, i be minnu sala anu ɲakɔtɔ: 2 I tini Hebure jon dɔndɔ san, a be san wɔɔrɔ jonya wale le mala i ye. A san wɔrɔwilaɲɔgɛ, a bɛnta a ni hɔrɔya hali a ma fenfen dii. 3 Ka a dɔrɔn de nata, a dɔrɔn de be bɔɔla jonya tɔ. Ka a nun a la muse le nata, anu bɛ le be bɔɔla jonya tɔ. 4 Ka a tige le ka muse ɲini a ye, wo ka den kayireŋɛnu sɔtɔ a ye, ka wo ma den musereŋɛnu, wo muse nun a la deŋɛnu be mala a tige tɛŋɛ le la, ale dɔrɔn de be hɔrɔyala. 5 Kɔnɔ ka wo joŋɛ ka a fɔ a beeyareŋɛ la, a ko: ‹N tige nun n na muse anun n na den kayireŋɛnu di n ɲɛ, n bele diren hɔrɔyala›, 6 ka a tagata wo fɔ, a tige ni Ala to anu tɛma, a ni a takkɛ bonda la, ka wo ma, bonda firɛmuɛ, a ni naa a tole sɔgɔ tɔntɔbɛɲɛ la. Wo butɔ, joŋɛ be naala tola a tige le la yamɔre kɔtɔ kudai.

7 Kaye do tini a la den musereŋɛ mayita, a ni ma joŋɛ la, a bele hɔrɔyala le de iko jon kayenu. 8 Ka den musereŋɛ la ko kanunteya banta a marige ye, min ka a ma nun a la muse la, a marige bɛnta a ni a to a baaba le ni a kunka. A ma bɛn a ni a mayita luntaŋɛ ma. Ka a ka wo ma, a bata wo den musereŋɛ janfa. 9 Ka a ka den musereŋɛ san a ni a dii a la den kayireŋɛ le ma, a bɛnta a ni sariya latagaman iko a be a latagamanna a tɛn den musereŋɛnu kunma ki min na. 10 Ka a nata naa jon musu do jigan, a kana fenfen bɔɔ a la musu fɔlɛ la dɔmɛ nun a la donfeŋɛnu la, anun a la lɔ́gɛ́. 11 Ka a ma wo ko sabanu ma a ye, wo muse si nɔ bɔɔla a bolo a ma fenfen dii, a ma nɛgɛ bɔɔ.

Minnu bɛnta fagala

12 Min tini mɔgɛ botege a ka a faga, wo be wo tigi tugun fagala le. 13 Kɔnɔ, ka a taranta a ma a ma teunteya le la, fɔ Ala le ka a laɲini a ye, n si saanu yita wo la, a si nɔ a kuŋɛ taakula ka min na. 14 Kɔnɔ, ka min ka a lawuli a ma, a ka a mɔgɔɲɔgɛ faga teunteya la, hali a tagata a kuŋɛ taaku n na sarika bintandula le la, a bɛnta wo ni wo tigi bita, wo ni taga a faga.

15 Min tini a baaba botege ka wo ma a nɛɛnɛ, wo be wo tigi fagala le.

16 Min tini mɔgɔ wunde kanka, a tagata a mayita, ka wo ma, anu ka a taran a bolo, wo be wo tigi fagala le.

17 Min tini a baaba fɛɛya ka wo ma a nɛɛnɛ, wo be wo tigi fagala le.

Botegere anun mamaba

18 Mɔgɔ fila tini kɛlɛ, doe ka doe bun kure la, ka wo ma, a ni a wuttɛ, kɔnɔ a ni taga taran a ma faga, a sata a bandiya la; 19 ka a mɛn si nɔ wulila, a ni a matagaman tungare fɛ bara tɔ, min ka a botege, kiite bata bɔɔ wo kunma. Fɔ bandibaga ka mɛ min berenu ma a la bandiya butɔ, doe bɛnta a ni wonu sɔŋɛ dii, a mɛn bɛnta a ni a dandan han a ni kendeya.

20 Min tini a la joŋɛ botege dɔkkɛ la, a mata kayi la, a mata musu la, ka a fagata ɲɔ kisanna, a bɛnta le anu ni a tɛŋɛ yɔgɔ a marige ma. 21 Fɔ ka a tota han tele dɔndɔ, ka wo ma tele fila a be baluren, anu te tɛn yɔgɛ ma a marige ma bitugun, bayi a ka a san de.

22 Kayenu tini be kɛlɛla, anu tagata garin buumamuse do la, a bue naata wuli a la wo butɔ, a ka deŋɛ sɔtɔ a ma ke, kɔnɔ fenfen koron ma muse masɔtɔ, wo butɔ muse la kaye tini sɔŋɛ min fɔ, ka kiiti salanu sɔnta wo la, min keta a ma, wolo be sariya lawalila. 23 Kɔnɔ ka ko do tagata muse tugun masɔtɔ, nɛ sɔŋɛ mu nɛ le la. 24 Ɲa sɔŋɛ mu ɲa le la, ɲiŋɛ sɔŋɛ mu ɲiŋɛ le la, bole sɔŋɛ mu bole le la, kɛŋɛ sɔŋɛ mu kɛŋɛ le la. 25 Bintaŋɛ sɔŋɛ mu bintaŋɛ le la, mamaba sɔŋɛ mu mamaba le la, luubɛre tugun sɔŋɛ mu luubɛre le la.

26 Min tini a la joŋɛ botege a ɲa tɔ, han i ka a ɲa tiɲa, a muse le ba, a kaye le ba, i bɛnta i ni a hɔrɔya. A ɲa la tiɲa le be mala a kunka la. 27 Ka min ka a la joŋɛ ɲin dɔndɔ kati, a muse le ba, a kaye le ba, i bɛnta i ni a hɔrɔya. A ɲiŋɛ la kate le be mala a kunka la.

28 Ninge tini mɔgɛ bɔɔti, a mata musu la a mata kayi la, ka a ka wo mɔgɛ faga, wo ninge bɛnta mabunna han a ni faga, a sube te dɔmɔ. Ningi tige tɛn yo te to a tɔ. 29 Kɔnɔ ka wo ninge darita le mɔgɛnu bɔɔtila, anu bata a tige lalɔn, a be tagaren taranden a tige ma a kanta, ka wo ninge ka mɔgɛ faga, kayi ba, musu ba, a bɛnta wo ninge ni mabun. Ningi tige tugun bɛnta a ni faga. 30 Kɔnɔ wo butɔ, ka anu ka sariya yo sa ningi tige ma, a nɛ kunka la, a bɛnta le a ni wo bɛ dii. 31 Ka ninge naata dendeŋɛ do bɔɔti, den museren ba, den kayiren ba, han bi wo sariya dɔndɛ le. 32 Kɔnɔ ka ninge ka jon kaye le bɔɔti go, ka a ka jon muse le bɔɔti go han a fagata, kaalise kole bi saba le be donna jon tige bolo, anu ni naa ninge mabun.

33 Mɔgɛ tini kɔlɔŋɛ da laka, a ma a tagun, ka wo ma, ka min nata kɔlɔŋɛ soe, a ma a dataguraŋɛ sa a la, ka ninge jigita a tɔ ka wo ma sofale, 34 kɔlɔn tige bɛnta wo kolofeŋɛ sɔŋɛ diila a tige ma, ale ni to kolofen fagareŋɛ la.

35 Mɔgɛ la ninge tini taga a filaɲɔgɛ tɛŋɛ tugu, a ka a faga, anu be wo ninge mayitala le, anu ni a nafule fatan, anu ni wo ningi fagareŋɛ tugun fatan ɲɔgɔn ma. 36 Kɔnɔ ka a tagata taran, a be lɔnden kɛ ninge darita le bɔɔtire mala, a tige ma a kanta, a bɛnta a ni ningi do gbɛtɛ don a filaɲɔgɛ bolo a faliŋɛ la, ale ni wo ningi fagareŋɛ jigan.

Kolofen kanka koe

37 Ka min tagata ningi dɔndɔ kanka, ka wo ma saaka dɔndɔ, ka a tagata a faga le, ka wo ma a ka a mayita le, a bɛnta a ni ningi loolu le lasaagi wo ningi dɔndɛ faliŋɛ la, ka wo ma, saaka naani le mu saaka dɔndɔ faliŋɛ la.»