Ala la yamɔri taŋɛnu
20
Awa, kuma le ka, Ala ka min bɛ fɔ bani Isirayila jama ye, a ko:2 «Nde len mu Alatala la, i la Ala. Nde len ka i labɔɔ Misira duge tɔ, i be jonya tɔ ka min na nun.
3 I kana batufen yo batu fɔ nde Alatala.
4 I kana fenfen malasɛ a kuye kima, fenfen min mulunta saŋɛ tɔ fondonu la kantɔ, ka wo ma fenfen min mulunta duge tɔ fondonu la, ka wo ma fenfen min mulunta duge kɔtɔ fondonu la je tɔ. 5 I kana sujudu wo koe mɔɔlenu ye, i kana anu batu. Bayi nde len mu Alatala la, i la Ala, n tɔɔnɛta. Minnu be n kɔnna, n si wonu bɔnsɛ bita le anu baabanu la tiɲarenu la han yɛlɛman saba han naani. 6 Kɔnɔ minnu be n kanula, anu mɛn be n na yamɔrenu makantala, n be n na kanunteya lakotila wondelen ye han yɛlɛman wulu dɔndɔ.
7 I kana nde Alatala tɔgɛ fɔ bɔtɛrɛbɔya la, i la Ala, bayi nde Alatala te to n ma mɔgɛnu bita minnu be wo koe mɔɔle mala.
8 I hakkile to sulen lɔ́gɛ́ la ko ma, i ni a to a dana ma. 9 I ni i la wale bɛ ma tele wɔɔrɔ kɔtɔ. 10 Kɔnɔ tele wɔrɔwila luŋɛ bɛ mu sulen lɔ́gɛ́ le la, nde Alatala i la Ala la lɔgɔ masubɛreŋɛ. I te wali yo ma wo lɔ́gɛ́ tɔ, a mata ile len na ba, a mata i la den kayireŋɛ le la ba, i la den musereŋɛ ba, i la jon kaye ba, i la jon muse ba, i la kolofeŋɛnu ba, sa i la luntaŋɛ kunma min be i la saa tɔ, hali dɔndɔ te wali wo tele wɔrɔwila luŋɛ. 11 Bayi nde Alatala ka saŋɛ nun duge nun ba nun a butɔ feŋɛnu bɛ da tele wɔɔrɔ le kɔtɔ. Tele wɔrɔwila luŋɛ n ka n sulen. Wolo ka a ma, n ka barikɛ sa sulen lɔ́gɛ́ la ko tɔ, n ka a to a dana ma.
12 I ni biliya sa i baaba nun i nɛɛnɛ ma, alako i ni simaya yanfama sɔtɔ duge tɔ, nde Alatala i la Ala be duge min diila i ma.
13 I kana nɛ bɔɔ.
14 I kana jeena ma.
15 I kana kankaya ma.
16 I kana seedeɲɔgɔya labita foniya la i mɔgɔɲɔgɛ kunma.
17 I kana miila fenfen ma min mu i mɔgɔɲɔgɛ bolofeŋɛnu la, a mata a la boŋɛ la ba, a mata a la muse la ba, a mata a la jon kaye la ba, a mata a la jon muse la ba, ka wo ma a la ninge, ka wo ma a la sofale, i kana miila fenfen ma.»
18 Bani Isirayila kaanu bɛ be balamantaŋɛ kulɛ mɔɛla, anun bina fe kulɛ, anu bɛ be sangi malaŋɛ anun siise yenden min be yɛlɛla kɔnkɛ tɔ. Wo koe ka anu bɛ lasɛrɛn, anu tota sɔren kan yanfama tɔ. 19 Anu ka a fɔ Musa ye: «Ile ká kɛnɛ kumala mɔ ye, mɔ si i kulɛ lamɔɛ le, kɔnɔ Alatala kan kana kuma mɔ ye, ka wo ma mɔ si faga le.» 20 Kɔnɔ Musa ka a fɔ jama ye: «Wo kana kilan, bayi ka wo ka a yen Ala be naren wo ma ka, a be wo mafɛlɛla le, alako a la ko kilaŋɛ ni to wo tɔ, wo kana junubu koe ma.» 21 Bani Isirayila jama be sɔren dula yanfama tɔ, kɔnɔ Musa kan ka a madon luuture dibireŋɛ la, Ala be ka min na.
Sarika bɔɔ dula sariya
22 Alatala ka a fɔ Musa ye, a ko: «I be kɛ-lɛ fɔla bani Isirayila kaanu ye: ‹Wole yati ka a yen, n bata kuma wo ye bɔɔla saŋɛ tɔ. 23 Wo kana kuye yo ɲiɲa kaalise la, ka wo ma sanuɛ, wo ni a ma wo la batufeŋɛ la nde faliŋɛ la. 24 I ni kɛnɛ sarika bɔɔ dula sɔla n ɲɛ bangue la n batu koe la. I ni kolofen lanma nun a banba bɔɔ sarika bintannɛŋɛ nun kanunteya sarika la wo sarika bɔɔ dula kunma. N ka kan do kan yita i la n batu koe la, n si barikɛ to i la ko tɔ ɲɔ. 25 Wo butɔ, ka i be sarika bɔɔ dula sɔla n ɲɛ kure kan na, i kana a sɔ kuru malasɛreŋɛnu la, bayi ka i ka kurenu malasɛ i la walifeŋɛnu la, i bata a manɔgɔ. 26 I kana n na sarika bɔɔ dula mayɛlɛ ko, alako i kana mɔgɛnu ŋayibo minnu be yɛlɛla sarika bɔɔ dula kunma.› »