Malalɔn koe jihadi tanɲɔgɛ la
11
Wo ka a taran, Alatala ka a fɔ nun Musa ye, a ko: «N si naa jihadi tɔɛ lasanba le Firauna nun Misira kaanu ma. Ka wo koe mata, Firauna si naa wo boloka le yan feu wo ni taga. A ɲan si naa wo bee le dɔndɛ la yan.
2 I ni kuma bani Isirayila jama ye, i ko: kayenu nun musenu bɛ ni a sigiɲɔgɛ Misira kaa táran fondo kaalisinɛŋɛnu la anun a sanunɛŋɛnu.»
3 Alatala ka a ma, Misira kaanu hinnɛta bani Isirayila kaanu la. Misira jama anun Firauna la walilanu ɲan ka biliya banba dii le Musa ma Misira duge tɔ.
4 Awa, Musa ka a fɔ Firauna ye, a ko: «Alatala la kuma le ka, a ko: aa su tɛma tini sutuya, a si naa tanbi le Misira saa tɛma.
5 Den fɔlɛ bɛ si faga le Misira duge butɔ, a be fɔlɔren Firauna la den fɔlɛ ma min be naala sigila nun a la mansa tintiŋɛ tɔ, ka taga ke jon muse ma min be walila dɛgɛ bunten dula, wo tɛŋɛ tugun si faga le, sa Misira kolofeŋɛnu la den fɔlɛ bɛ kunma.
6 Wo tɛmuɛ, diri banba si naa ma Misira duge bɛ tɔ, min siila ma ma betunna, a siila mɛn te ma ɲɔ bitugun.
7 Kɔnɔ bani Isirayila kaanu bata, i te wule hali dɔndɔ ŋurɛ kulɛ mɔɛ mɔgɛ ma, ka wo ma kolofeŋɛ ma. Wo butɔ wo si a lɔn Alatala ka tɛtɛgɛbɔɛ min ma Misira kaanu anun bani Isirayila kaanu tɛma.
8 Wo butɔ, i la kɛ walilanu bɛ si na le anu ni kimisirin n kɛn kɔtɔ, anu ni a fɔ n ɲɛ nde nun n na jama bɛ ni bɔɔ anu la duge tɔ. Wo kɔma, n si naa bɔɔ.» Wo butɔ, Musa bɔɔta Firauna kunma a be dumɛnden han.