Jihadi saginɲɔgɛ: tugumɛnu
10
Awa, Alatala ka a fɔ Musa ye, a ko: «Taga don Firauna bata, bayi nde len be ale nun a la walilanu hakkile labɛlɛyaren, alako n ni n na kɛ kabanakoenu yita anu la.
2 Wo butɔ, n be Misira kaanu ɲagankatala a koroŋɛ la ki min na, n be kabanakoenu minnu yitala anu bata, i si wo ɲamakaran i la deŋɛnu ye, anun wonu tugun tɛn deŋɛnu ye, alako wo ni a lɔn, nde len mu Alatala la.»
3 Awa, Musa nun Harona tagata don Firauna dula, anu ka a fɔ a ye, anu ko: «Alatala, Heburenu la Ala la kuma le ka, a ko: aa i be balanna i fan majigila a ye han tɛmu miniman? A mɛn ko: aa i ni a la jama boloka, anu ni taga a batu dula.
4 Ka i bele sɔnden a la jama bolokala, awa sinan a si tugumɛnu latugu le i la duge bɛ tɔ.
5 Anu si dugu kole bɛ mabutin de, duge kan do kan te nɔ yenna. Sangi kure ka balue tɔɛnu minnu to wo ye, anu si wo bɛ dɔmɔ le, anun lɔgɛnu minnu fɛtɛnta ɲagama butɔ.
6 Anu si naa i la boŋɛnu nun i la walilanu la boŋɛnu lafa le, han Misira kaanu bɛ la boŋɛnu. Han bi, i baabanu nun wonu tugun baabanu ma wo siila ɲɔgɔn yen bɔɔla anu daata.»
Musa ka a kɔ sɔ, a bɔɔta Firauna dula.
7 Wo kɔma, Firauna la walilanu ka a fɔ a ye, anu ko: «Kɛ kaye be mala wo mɔ jihadi sabue la han muntuma? Kɛ kayenu boloka, anu ni taga Alatala batu, anu la Ala. Han bi ile ma a lɔn ba Misira be halagila?»
8 Wo butɔ, anu tagata Musa nun Harona kele saagi koe la Firauna dula. Wo ka a fɔ anu ye: «Awa, wo taga, wo ni Alatala batu, wo la Ala. Kɔnɔ ɲɔmɔnu le ɲan bɛnta tagala?»
9 Musa ka a jaabi, a ko: «Mɔ nun mɔ la kamareŋɛnu, anun mɔ la mɔgɔbanu le be tagala, anun mɔ la den kayireŋɛnu nun mɔ la den musereŋɛnu, nun mɔ la kolofen lanmanu nun a banbanu, bayi wo lɔ́gɛ́ be mala mɔ ye Alatala la sale le la.»
10 Firauna ka a fɔ anu ye, a ko: «Awa, ale Alatala ni wo kanta de! kɔnɔ n te wo la denbayanu boloka iko wole. N bata a lɔn mira ɲinma bele wo hakkile tɔ.
11 Wolo mu, n te anu boloka! Kayenu tun de be tagala, wo ni taga Alatala batu, bayi wo be diren wolo ye.»
Anu ka anu bee Firauna ɲala.
12 Wo kɔma, Alatala ka a fɔ Musa ye, a ko: «I bole lafonti Misira duge kunma, tugumɛnu ni na tugu Misira duge la. Anu ni ɲagama kutaŋɛ bɛ dɔmɔ duge tɔ, sangi kure be minnu toren.»
13 Awa, Musa ka a la tungare lafonti Misira duge kunma, Alatala ka fɔɲɛ labɔɔ duge kunma ka bɔɔ tele yɛlɛ, su muru tele muru. Wo tabantaka saguma, tele yɛlɛ fɔɲɛ ka tugumɛnu nati.
14 Tugumɛnu banba jigita, anu tuguta Misira jamanɛ dula bɛ la. Han bi wo tugumɛ siila banba mɔɔle ma yen nun fɔlɔ, a mɛn siila te yen bitugun.
15 Anu ka dugu kole bɛ mabutin han duge finta. Ɲagama kutaŋɛ min bɛ tota duge tɔ anun lɔgɔ wole, sangi kure ka minnu bɛ to, anu ka wo bɛ dɔmɔ. Yanba kutan yo ma to lɔgɛnu kanna anun kifeŋɛnu kanna anu ma min dɔmɔ Misira duge bɛ tɔ.
16 Wo butɔ, Firauna ka Musa nun Harona kele teriya la, a ka a fɔ anu ye, a ko: «N bata junube sɔtɔ Alatala la, wo la Ala, anun wole la.
17 Kɔtɛ, yandi i ni diɲa n na junube ma kɛ biyase tugun. Wo Marigi Alatala mataran n ɲɛ, alako tun a ni n bɔɔ kɛ jihade tɔ.»
18 Wo kɔma, Musa bɔɔta Firauna dula, a tagata Alatala matarandula.
19 Alatala ka fɔɲɔ bɛlɛŋɛ ɲamatelen tele yɛlɛ ma, wolo ka tugumɛ bɛ makɔ, a tagata anu lajigi Kulunyuma ba tɔ. Hali tugumɛ dɔndɔ a ma to Misira jamanɛ bɛ tɔ.
20 Kɔnɔ Alatala ka Firauna hakkile labɛlɛya. Firauna ma sɔn bani Isirayila kaanu bolokala anu ni taga.
Jihadi kɔnɔntɔɲɔgɛ: dibe
21 Awa, Alatala mɛn ka a fɔ Musa ye, a ko: «I bole sɔ saŋɛ la, dibi belebele ni jigi Misira duge tɔ, han i te nɔ i bolo butɔ yenna.»
22 Wo butɔ, Musa ka a bole sɔ saŋɛ la, dibi bilima jigita Misira duge bɛ tɔ han tele saba.
23 Wo tele saba butɔ, dodo ma do yen, mɔgɔ yo mɛn ma bɔɔ a be ka min na. Kɔnɔ bani Isirayila kaanu kan bata be kɛnɛren.
24 Firauna ka Musa kele, a ka a fɔ a ye, a ko: «Wo taga, wo ni Alatala batu. Wo nun wo la denbayanu si nɔ tagala le, kɔnɔ wo la kolofen lanmanu, anun a banbanu si to le yan.»
25 Kɔnɔ Musa ka a jaabi, a ko: «Ade! ile len be kolofeŋɛnu tugun donna mɔ bolo mɔ be minnu bɔɔla Alatala ye sarika la, mɔ la Ala.
26 Mɔ nun mɔ la wɔɔrɛnu le be tagala. Hali toro dɔndɔ mɔ te a to yan, bayi mɔ be sarikanu jiganna ande len tɔ Alatala ye, mɔ la Ala. Kɔnɔ mɔ ma a lɔn betunna mɔ be min diila Alatala ma sarika la, han mɔ tini ke ɲɔ wagate min tɔ.»
27 Kɔnɔ Alatala ka Firauna hakkile labɛlɛya, Firauna ma sɔn anu bolokala anu ni taga.
28 Firauna ka a fɔ Musa ye, a ko: «Bɔɔ n kɛnna! I yɛtɛ matanga i kana sɔ n kɛnna bitugun. Ka n ka i yen lun min na, i si faga le.»
29 Musa ka a jaabi, a ko: «I to bata a fɔ ɲɔgɔnna, i te n yen i kɛnna bitugun.»