Fɛsitu la Pɔlu makiiti koe
25
Awa, dugu mansa Fɛsitu keta Sesare saa tɔ ɲɔ wagate min tɔ, tele saba tanbi kɔma, a bɔɔta ɲɔ, a yɛlɛta Darisalamu.
2 Sarika lakela kuntigenu nun Yahudenu la kuntigenu ka anu madi a ma Pɔlu la ko la ɲɔ.
3 Anu tota a madiyala a ɲinma la alako a ni anu diyanankoe ma anu ye, a ni Pɔlu kele Darisalamu, bayi a sɔgɔ be anu la anu ni a sakkɛ kila tɔ ka a faga.
4 Kɔnɔ Fɛsitu ka anu jaabi, a ko: «Pɔlu be makankanden Sesare saa tɔ le. Nde yati si taga le ɲɔ kɔtɛ.»
5 A mɛn ko: «Nde nun wo la kuntige donu ni jigi ɲɔ ɲɔgɔn na. Ka a tagata taran kɛ kaye ka ko koron do le ma, wonu si nɔ anu madila wo koe la n bata.»
6 Fɛsitu la toe anu tɛma, a ma tanbi tele tan na tumado tele sagin, jɔ a tajigita Sesare. Wo tabantaka, a sigita a la mansa tintiŋɛ tɔ, a ka yamɔre sa Pɔlu nati koe la.
7 Wo la nareŋɛ, Yahude minnu nata kabɔɔ Darisalamu, wonu ka a lamilin anu tota a tɔɲɛgɛla anu be ko bɛlɛŋɛ siyama sala a kunma, anu ma nɔ minnu seedeɲɔgɔya yitala.
8 Wo kɔma, Pɔlu fɔlɔta a yɛtɛ kunma fɔla, a ko: «N ma junubu ko sɔtɔ Yahudenu la sariya butɔ, ka wo ma Ala batu bon banba la, ka wo ma Rɔmu mansa banba la.»
9 Kɔnɔ Fɛsitu to be diren de Yahudenu diyanankoe mala, a ka Pɔlu maɲininka, a ko: «I si sɔn ba i ni yɛlɛ Darisalamu, i ni taga makiiti kɛ koenu ma n ɲala ɲɔ?»
10 Pɔlu ko: «N be sɔren Rɔmu mansa banba le la kiiti sa dula tɔ ka, a bɛnta n ni makiiti ka min na. N ma sariya yo tiɲa Yahudenu ma, iko ile to yati be a lɔnden a ɲinma la.
11 Ka n ka sariya tiɲa, ka wo ma n bata ko do ma n bɛnta fagala min na, n te balan faga koe la. Kɔnɔ kɛnu be n tɔɲɛgɛla koe minnu la, ka wo hali dɔndɔ ma ma tɔɲa la, awa mɔgɔ yo te nɔ n tola anu sagoe tɔ. Kɔtɛ, n ni tanbi Rɔmu mansa banba bata.»
12 Wo butɔ, Fɛsitu nun a la malasiilanu sumunta, wo kɔma a ka a fɔ Pɔlu ye, a ko: «I ko i ni tanbi Rɔmu mansa banba bata, awa, i si taga le Rɔmu mansa banba bata.»
Pɔlu yita koe Agiripa nun Berinisi la
13 Tele donu tanbi kɔma, mansa Agiripa nun a barenmuse Berinisi tagata Sesare saa tɔ, Fɛsitu kɔntɔndula.
14 Anu to be tele siyama mala ɲɔ, Fɛsitu ka Pɔlu la ko dantɛgɛ mansa Agiripa ye, a ko: «Kaye do le be yan, Felikisi ka min to geele tɔ.
15 N be Darisalamu wagate min tɔ, sarika lakela kuntigenu nun Yahudenu la kayibanu ka anu madi n ma wo la ko la, anu be n madiyala n ni a faga.
16 N ka wonu jaabi, n ko: Rɔmu kaanu la naamuŋɛ bele ɲɔgɔnna, ka mɔgɛ boloka tun, fɔ ka wo tige nun a fan madilanu ni to kandula dɔndɔ, alako koe min be saren wo tigi kunma, a bɛnta a ni fɛrɛ sɔtɔ a yɛtɛ kunma fɔɛ la.
17 Wo butɔ, mɔ nun anu to nata yan, n ma kɔnɔn yo ma, fɔ wo tabantaka n sigita n na mansa tintiŋɛ tɔ, n ka yamɔre sa ale kaye nati koe la.
18 Fan madilanu to ka a dantɛgɛ sa, nde yili be ko koroŋɛ min ma nun, wo hali dɔndɔ ma sa ale kaye kunma.
19 Kɔnɔ anu nun a be ɲɔgɔn sɔsɔla anu la diina tun de la ko la, wolo be tabɛnden Isa do la ko ma, min fagata. Ale Pɔlu kan be a fɔla aa a be baluren.
20 Awa, nde to bele a lɔnden a bɛnta n ni kɛ koenu tefi ki min na, wolo ka a ma, n ka a maɲininka ka a si sɔn tagala Darisalamu, alako a ni makiiti ɲɔ kɛ koenu la.
21 Kɔnɔ Pɔlu to ka a fɔ aa a ni mandi han a ni tanbi Rɔmu mansa banba bata, ale ni a la ko makiiti, wo butɔ n ka yamɔre sa a ni mandi geele tɔ han n ni a lasanba Rɔmu mansa banba ma.»
22 Wo kɔma, mansa Agiripa ka a fɔ Fɛsitu ye: «A sɔgɔ be nde tugun na, n yɛtɛ ni wo kaye kumari kulɛ mɔɛ.» Fɛsitu ko: «I si a mɔɛ sinan.»
23 Wo tabantaka, mansa Agiripa nun Berinisi nata kɔmasɔlanu banba fɛ, sɔɔri mansa banbanu be wonu ɲaama, anun saa butɔ kuntigenu, anu bɛ donta kiiti sa boŋɛ tɔ. Dugu mansa Fɛsitu la yamɔre la, anu ka Pɔlu nati.
24 Awa, Fɛsitu ko: «Mansa Agiripa nun mɔgɛ minnu bɛ be madɛnden mɔ fɛ yan, wo be kɛ kaye yenden, Yahude jama bɛ ka anu fan madi min na ko la kabɔɔ Darisalamu saa butɔ han yan. Anu be anu kulɛ mayɛlɛla ka a fɔla, a ma bɛn a ni balu bitugun.
25 Kɔnɔ nde kan bata a yen, a bele fenfen maren a bɛnta a ni faga min na. Kɔnɔ ale yati to bata a fɔ aa a ni tanbi Rɔmu mansa banba bata, awa, nde tugun bata sɔn a lasanba koe la.
26 N nɔn bele kuma kende yo sɔtɔren min si sɛbɛ mɔ kuntige ma ale la ko tɔ. Wolo mu, n ka a labɔɔ wo ɲala, kɔnɔ sɔkkɔfɛrɛ nɔn ile mansa Agiripa, alako kɛ ɲininkare tini ban wagate min tɔ, n ni kuma do sɔtɔ n si min sɛbɛ.
27 N na mira tɔ, i tini be gelemanɛ lasanbala mansa banba dula, i ma a yita anu ka anu madi min na, hakkilimaya wale ma wo la.»