22
«N baabanu nun n kɔtɔnu, n be n fan de kunma fɔla wo ye kɔtɛ, wo ni wo tolomasɔ wo la.»
2 Anu to ka a kulɛ mɔɛ, a be Hebure kuma fɔla anu ye, anu mɛn ka anu mɔdɛ ka fisaya fɔlɔnɛŋɛ ko. Wo butɔ, Pɔlu ko:
3 «Yahude le mu nde la, n sɔtɔta Tarisi le, Silisi duge tɔ, kɔnɔ n koloyata Darisalamu saa tɔ yan de, n karanta Gamaliyɛli le bolo, a ka n nakaran wo mɔ benbanu la sariya la a kɛɲa yati ma. Ala la ko hanmɛre be n na nun, iko wole bɛ be ki min na bi.
4 Mɔgɛnu minnu be sɔren Isa la kila kɔma, n kitita wonu ɲagankata koe la, han n ni anu faga. N ka kayenu anun musenu kiti, n ka anu sa geele tɔ.
5 Sarika lakela kuntige banba nun Yahude kuntigenu bɛ mu n seede la. Wonu yati ka sago dii kaide don n bolo tagala mɔ bareŋɛnu ma Damasi saa tɔ. Wo butɔ, n tagata ɲɔ, alako talibenu minnu be ɲɔ, n ni wonu tugun kitireŋɛ nati Darisalamu ka anu ɲagankata.
6 Awa, n be kila kunma wagate min tɔ, n to be sutuyala saa la, tele be kunna, nɔɔra banba bɔɔta saŋɛ tɔ kisanna, a la malaŋɛ ka n namilin.
7 N boeta duge tɔ, n ka kulɛ do mɔɛ, a be a fɔla n ɲɛ: ‹Sɔlu, Sɔlu, i be kitiren n ɲagankata koe la fenna?›
8 N ka a jaabi: ‹Marige, i mu ɲɔmɔ la?› A ka a fɔ n ɲɛ aa Isa Nasarɛti kaa le mu ale la, n be kitiren min ɲagankata koe la.
9 Awa, n nun minnu be ɲɔgɔn na, anu ka nɔɔra kan yen, kɔnɔ anu ma kulɛ mɔɛ min be kumala n ɲɛ.
10 N ka a fɔ: ‹Marige, n ni fen ma?› A ka a fɔ n ɲɛ, aa n ni wuli n ni taga Damasi saa tɔ. Aa a be n yamɔrila koe min bɛ la, n ni a ma, anu si wo koenu bɛ fɔ n ɲɛ ɲɔ.
11 N to bele fenfen yenna wo nɔɔra malaŋɛ sabu la, n nun minnu be ɲɔgɔn na, wonu ka n bita n bole ma, han n keta Damasi saa tɔ.
12 Kaye do be wo saa tɔ, a tɔgɔ Ananiyasi, Ala ɲalakilanna le mu a la, a mɛn be Musa la sariya bitaren. Tɔgɔ ɲinma be a la Yahudenu bɛ bolo minnu be Damasi saa tɔ.
13 Wo nata ke n ma, ka sɔ n kɛnna, a ka a fɔ n ɲɛ: ‹N bareŋɛ Sɔlu, i ɲa ni laka!› N ɲa lakata ɲɔ kisanna, n ka n ɲa layɛlɛ a la.
14 A mɛn ko: ‹Mɔ benbanu la Ala bata ile masubɛ, i ni a sagoe lɔn, i ni Telenbaga yen, i ni a kulɛ mɔɛ a faŋɛ da tɔ,
15 bayi i ka koe minnu yen, i ka anu mɔɛ, i si naa ma wonu seede la mɔgɛ bɛ ɲala.
16 Awa, i be fen de kɔnɔnden kɔtɛ? Ile wuli, i ni Marige tɔgɛ mataran, i ni suwɛ je tɔ, alako i junubenu ni bɔɔ i ma.›
17 Wo kɔma, n saagita Darisalamu. N be Ala mataraŋɛ tɔ wagate min tɔ Ala batu bon banba butɔ, n ka laamute yen n ɲakɔtɔ iko kiboe:
18 n ka Marige yen, a be a fɔla n ɲɛ, aa n ni teriya bɔɔla Darisalamu, bayi n tini seedeɲɔgɔya kuma min fɔ a la ko tɔ, aa yan kaanu te naa wo bita.
19 N ka a fɔ: ‹Kɔnɔ Marige, anu faŋɛ ka a lɔn, minnu be dɛnkɛnɛyaren i ma kawandi ma boŋɛnu bɛ tɔ dɔndɔ dɔndɔ, nde yati be wonu sala le geele tɔ, n be anu botegela le.
20 Anu be Etiyɛn nɛ bɔɔla wagate min tɔ min ka i la ko seedeɲɔgɔya bɔɔ, nde yɛtɛ tugun be sɔren ɲɔ, n be sɔnden a faga koe la, n be a fagalanu la doroki banbanu kantala.›
21 Kɔnɔ Marige ka a fɔ n ɲɛ: ‹Taga tun, bayi nde le be i kiila dula yanfama tɔ sii gbɛtɛ mɔgɛnu ma.› »
22 Awa, mɔgɛnu be anu tolomasɔla Pɔlu kulɛ la a ɲinma la, kɔnɔ a to ka kɛ kuma tɔɛ fɔ, anu ka sɔnkɛ layɛlɛ, anu ko: «Kɛ kaye mɔɔle ni faga! A balureŋɛ ma bɛn tola!»
23 Anu be sɔnkɛ layɛlɛla, anu be anu la kutanu lafilila, anu be banbaŋɛ kasanna kantɔ.
24 Wo butɔ, sɔɔri mansa banba ka yamɔre sa Pɔlu ladon koe la sɔɔrenu la daaka tɔ, a mɛn ko anu ni a botege lonba la a ni kuma, alako jama be sɔnkɛ layɛlɛla a ma surute min na, a ni wo lɔn.
25 Anu ka a kiti a botege koe la wagate min tɔ, sɔɔri kuŋɛ min be sɔren ɲɔ, Pɔlu ka a fɔ wo ye: «Ka wo ka mɔgɛ botege lonba la min mu Rɔmu kaa la, a ma makiiti betunna, sariya le wo la ba?»
26 Sɔɔri kuŋɛ la wo mɔɛreŋɛ, a ka a madon sɔɔri mansa banba la, a ka a lasaagi a ma, a ko: «Kɛ mɔgɛ mu Rɔmu kaa le la! I si fen ma kɔtɛ?»
27 Wo butɔ, sɔɔri mansa banba tagata Pɔlu ɲininka, a ko: «A fɔ n ɲɛ, Rɔmu kaa yati le mu ile la ba?» A ko: «Iyon.»
28 Sɔɔri mansa banba ka a jaabi, a ko: «Nde ka nafule banba le bɔɔ, n ka hɔrɔya sɔtɔ, n mata Rɔmu kaa la.» Pɔlu ko: «Kɔnɔ nde be sɔtɔren hɔrɔya le tɔ.»
29 Bɔɔla wo fɔta, minnu be naala Pɔlu botegela nun a ni kuma, wonu ka anu matuntun a la kisanna. Sɔɔri mansa banba to bata a lɔn Pɔlu mu Rɔmu kaa le la, ale tugun kilanta bayi bata ban a kitila.
Pɔlu makiiti koe
30 Wo tabantaka, sɔɔri mansa banba ka sarika lakela kuntigenu, anun Yahude kuntigenu bɛ yamɔri, anu ni naa madɛn, bayi Yahudenu be Pɔlu siɲɛren koe min na, a sɔgɔ be a la, a ni tɔɲa lɔn wo tɔ. Wo butɔ, a ka Pɔlu fulen, a ka a nati a ka a sɔ anu tɛma.