23
Pɔlu ka a ɲa banban Yahude kuntigenu ma a ɲinma la, a ko: «N bareŋɛnu, nde han bi, n be tagamanna Ala ye jusu beeya le la mɔɔle bɛ la.»
2 A to ka wo fɔ, minnu be sɔren a kɛnna, sarika lakela kuntigi banba Ananiyasi ka wonu yamɔri anu ni a bantilan.
3 Wo butɔ, Pɔlu ka a fɔ a ye, a ko: «Ala be naala ile le botegela, ile min si to iko bon koloŋɛ min be beeyaaren, kɔnɔ a butɔ be nɔgɔren. I be sigiren n makiiti koe la Ala la sariya kɛɲa ma, kɔnɔ i bele sɔren wo sariya kɔma, bayi i be yamɔre sala n botege koe la!»
4 Minnu be sɔren a kɛnna, wonu ka a fɔ: «I bata Ala la sarika lakela kuntigi banba le fɛɛya go!»
5 Pɔlu ka a fɔ, a ko: «N bareŋɛnu, n ma a lɔn ka a fɔla, a mu sarika lakela kuntigi banba le la. A be sɛbɛren de: aa i kana kuma koroŋɛ fɔ i la jama kuntige ma.a»
6 Pɔlu to ka a lɔn ka a fɔla mamadɛŋɛ sɔngɔ dɔndɛ mu Sadusinu le la, sɔngɛ doe Farisinu, a ka a kulɛ mayɛlɛ anu tɛma, a ko: «N bareŋɛnu, nde mu Farisi kaye le la, n mɛn mu Farisi kaye la den kayireŋɛ le la. N to be laaren a la, Ala si naa fagabaganu lawuli le, wo be n makiitila wolo la bi.»
7 A to ka wo fɔ, ɲɔgɔn masɔ́sɛ́ donta Farisinu nun Sadusinu tɛma; mamadɛŋɛ fatanta fila la.
8 Bayi Sadusinu be a fɔla, aa faga kɔma, aa wuli yo bele, anu mɛn ko hali maleka yati bele, anun anu la muluŋɛ tugun bele, kɔnɔ Farisinu kan be laaren wonu bɛ be.
9 Awa, sɔnkɛ banba wulita. Sariya karamɔgɛ donu wulita, minnu mu Farisinu la, anu ka sɔsɔre ma sɛnbɛ la, anu ko: «Mɔle ma ko koron yo yen kɛ kaye la. Tumado maleka do kumata a ye, ka wo ma a la muluŋɛ.»
10 Sɔsɔre to be koloyala, sɔɔri mansa banba kilanta, anu kana naala Pɔlu mafarala. Wo butɔ, a ka sɔɔrenu yamɔri anu ni taga a bɔɔ anu tɛma sɛnbɛ la, ka a talasaagi sɔɔrenu la daaka tɔ.
11 Wo sue tɔ, Marige bɔɔta Pɔlu ma, a ka a fɔ a ye: «Wakkilɛ! I ka n na ko seedeɲɔgɔya bɔɔ Darisalamu ki min na, a fɛrɛ bele fɔ i ni ma tugun n seede la Rɔmu saa tɔ ɲɔgɔnna.»
Janfa makiti koe Pɔlu kunma
12 Ɲɔ to kɛnɛta, Yahude donu ka janfa makiti anu ka anu kali, aa anu te dɔmɔre ma, anu te je min fɔ anu tini Pɔlu faga.
13 Minnu ka wo janfa makiti, anu siyata mɔgɔ bi naani ko.
14 Anu tagata ke sarika lakela kuntigenu ma, anun Yahude kayibanu. Anu ka a fɔ wonu ye: «Mɔ bata mɔ kali Ala la a ɲinma la, mɔ te fenfen dɔmɔ fɔ mɔ tini Pɔlu faga.
15 Awa kɔtɛ, wole nun Yahude kuntigenu bɛ ni sɔɔri mansa banba madiya, a ni naa a nati wo ye, iko wo be diren a la ko tefila le koola; mɔle tugun, yannun a ni sutuya yan na, mɔ bata mɔ tabɛn a faga koe la.»
16 Kɔnɔ Pɔlu barenmuse la den kayireŋɛ ka wo sakkɛ ko kuma mɔɛ. A tagata don sɔɔrenu la daaka butɔ, a ka wo fɔ Pɔlu ye.
17 Wo butɔ, Pɔlu ka sɔɔri kuŋɛ dɔndɔ kele, a ka a fɔ a ye: «Kɛ kamareŋɛ doni sɔɔri mansa banba dula, kuma do be a bolo a si min fɔ a ye.»
18 Wo butɔ, sɔɔri kuŋɛ ka kamareŋɛ doni sɔɔri mansa banba ye, a ko: «Pɔlu gelemanɛ ka n kele, a ka a fɔ n ɲɛ, aa n ni kɛ kamareŋɛ nati i bata; kuma do be a bolo, aa a ni a fɔ i ye.»
19 Sɔɔri mansa banba ka kamareŋɛ bole bita, a tagata a fɛ sɔngɔ, a ka a maɲininka, a ko: «Fen de be i ye i ni a fɔ n ɲɛ?»
20 A ko: «Yahudenu bata bɛn a ma, anu ni i madiya, i ni Pɔlu doni Yahude kuntigenu la mamadɛŋɛ tɔ sinan, iko anu be diren a la ko tefila le koola.
21 Kɔnɔ i kana sɔn anu bolo, bayi mɔgɔ bi naani anun do anu tɛma be sakkɛ lakotiren a ye: anu bata anu kali, aa anu te dɔmɔre ma, anu te ji min fɔ anu tini a faga. Anu bata ban anu tabɛnna, anu be ile len kɔnɔnden kɔtɛ, i ni anu sago sa.»
22 Awa, sɔɔri mansa banba ka kamareŋɛ da mapɛnpɛn, a ko: «I kana a fɔ mɔgɔ yo ye ka a fɔla i bata kɛ fɔ n ɲɛ.» Wo kɔma, a ka a boloka.
23 Wo kɔma, a ka sɔɔri kun fila kele, a ka a fɔ anu ye, a ko: «Wo ni sɔɔre kɛmɛ fila tabɛn, anun sɔɔri so laborilanu bi wɔrɔwila, anun kala filila kɛmɛ fila; sagafu tini tanbi wo bɛ ni taga han Sesare saa tɔ.
24 Wo mɛn ni soeenu tabɛn, wo ni Pɔlu sigi wo kunma, ka a doni jususa butɔ dugu mansa Felikisi bata.»
25 Wo kɔma, a ka kaide sɛbɛ, a ko wo tɔ:
26 «Nde Kulodu Lisiyasi be ile dugu mansa ɲinma Felikisi kɔntɔnna.
27 Yahudenu ka kɛ kaye le bita, anu dita a fagala. N to ka a mɔɛ a mu Rɔmu kaa le la, n nun sɔɔrenu tagata a lakisi.
28 Anu be a siɲɛren kuŋɛ min kunma, n to be diren wo lɔnna, n ka a doni Yahude kuntigenu la mamadɛŋɛ tɔ.
29 N ka a taran, anu be ɲɔgɔn sɔsɔla anu la sariya ka minnu la ko la, anu be a siɲɛren wolo la, kɔnɔ a bele fenfen koron maren a bɛnta fagala min na, ka wo ma a ni sa geele tɔ.
30 N to lalɔnta ka a fɔla, Yahudenu bata janfa makiti kɛ kaye kunma, n ka a lasanba i ma kisanna. N ka a siɲɛrelanu tugun yamɔri, koe min be anu ye a la ko tɔ, anu ni taga wo fɔ ile ɲala.»
31 Awa, sɔɔrenu ka Pɔlu jigan, iko anu ka anu yamɔri ki min na, anu ka a doni sue tɔ Antipatiri saa tɔ.
32 Wo tabantaka, sɔɔrenu ka a to so laborilanu bolo, wonu ni tanbi a fɛ, ande tugun saagita anu la daaka tɔ.
33 So laborilanu la kereŋɛ Sesare saa tɔ, anu ka kaide don dugu mansa Felikisi bolo, anu ka Pɔlu tugun dantɛgɛ a ye.
34 Mansa to banta sɛbɛre karanna, a ka ɲininkare ma, Pɔlu bɔɔta jamanɛ min tɔ. A to bata a lɔn a bɔɔta Silisi duge tɔ le, a ka a fɔ,
35 a ko: «I siɲɛrelanu tini na wagate min tɔ, n si i maɲininka.» Wo butɔ, a ka yamɔre sa, anu ni Pɔlu kanta mansa boŋɛ tɔ Herodu ka min sɔ nun.