Pɔlu nun Silasi la tola Tesaloniki saa tɔ
17
Wo kɔma, Pɔlu nun Silasi ka Anfipoli saa nun Apoloni saa matagaman, anu mɛn tagata don Tesaloniki saa butɔ. Yahudenu la kawandi ma boŋɛ do be ɲɔ.
2 Pɔlu donta anu kunma, iko a darita a mala ki min na, a ka Ala la sɛbɛre ɲatabɔ anu ye sulen lɔ́gɛ́ saba lɔgɔkun saba kɔtɔ.
3 A be kitabue fasarila, a be a yitala a ko, a fɛrɛ yo bele fɔ Ala la mɔgɔ masubɛreŋɛ ni tɔɔrɔ, a mɛn ni tawuli fagabaganu tɛma. A ko: «N be Isa min na ko lakela wo ma ka, ale le mu Ala la mɔgɔ masubɛreŋɛ la.»
4 Yahude donu laata a la anu tɔ, anu kafuta Pɔlu nun Silasi ma, anu nun Girɛki jama banba tugun minnu be kilanden Ala la, anun musu tɔgɔ bɔɔreŋɛnu siyama.
5 Kɔnɔ bɛsɛnkɔnnɛya tota Yahude siyama ye, anu ka kayi koroŋɛ mɔgɔ fufafue donu jigan anu fɛ, anu ka jama madɛn, anu ka saa bɛ ɲatadon, wo butɔ anu tagata mɔgɛ do la boŋɛ bita, a tɔgɔ Jason; anu be Pɔlu nun Silasi ɲinila ɲɔ, alako anu ni anu labɔɔ jama madɛndeŋɛ ye.
6 Anu to ma anu yen, anu ka Jason yɛtɛ le sabaa anun nɛɛnɛdɔndɛ donu, anu ka anu doni saa mansanu dula. Anu be sɔnkɛ layɛlɛla, anu ko: «Kɛ mɔgɛnu minnu ka dunuya bɛ lamurutɛ, anu bata na yan tugun.
7 Adun Jason bata anu yigiya! Rɔmu mansa banba la yamɔrenu be min natɔnden, anu bɛ be wo mala, anu ko aa mansa gbɛtɛ do be ɲɔ, min tɔgɔ Isa.»
8 Wo kumanu ka saa mansanu nun jama tɔɛ juse layɛlɛ.
9 Anu ka kunkafeŋɛ bita Jason nun doenu bolo nafule la, jɔnɔn anu ka anu boloka.
Pɔlu nun Silasi to koe Bereya saa tɔ
10 Wo sue tɔ kisanna, nɛɛnɛdɔndɛ diinaɲɔgɛnu ka Pɔlu nun Silasi lataga Bereya saa tɔ. Anu la kereŋɛ ɲɔ, anu donta Yahudenu la kawandi ma boŋɛ tɔ.
11 Bereya Yahudenu juse fisa kuma bitala Tesaloniki Yahudenu ko: anu be kɛɲɛla le Ala la kuma lamɔɛ koe la, lun go lun anu be Ala la sɛbɛre masoela, alako anu ni a lɔn, min be fɔla anu ye, ka a be ɲɔgɔnna yati le.
12 Wolo ka a ma, anu siyama dɛnkɛnɛyata: musu tɔgɔ bɔɔreŋɛnu siyama nun kaye siyama be anu tɔ minnu ma ma Yahudenu la.
13 Kɔnɔ Tesaloniki Yahudenu to ka a mɔɛ Pɔlu be Ala la kuma lakela Bereya saa tɔ tugun, anu tagata ɲɔ tugun anu tota jama lamagala ka a ɲatadon.
14 Wo butɔ, nɛɛnɛdɔndɛnu ka Pɔlu lasanba kisanna, a ni taga ba dala, kɔnɔ Silasi nun Timote tota Bereya saa tɔ.
15 Minnu be Pɔlu masɔla, wonu ka a doni han Atɛni saa butɔ. Anu saagi wagate, Pɔlu saarata anu la, a ko aa Silasi nun Timote ni teriya anu ni na a taran Atɛni ɲɔ.
Pɔlu la kawandi ma Atɛni saa tɔ
16 Awa, Pɔlu be Silasi nun Timote kɔnɔnden Atɛni wagate min tɔ, a to ka a yen ɲɔ saa be faren kuyenu la, wo ka a mɔnɛ han.
17 Wo butɔ, a tota tagala kawandi ma boŋɛ tɔ, a nun Yahudenu nun Ala ɲalakilan mɔgɛnu be kuma masabaala ɲɔgɔn tɛma ɲɔ; a mɛn be tagala makite tɔ lun go lun, a be minnu taranna ɲɔ, a nun wonu tugun be kumala.
18 Lɔnnɛ ɲinilanu donu be ɲɔ, anu be minnu ma Epikiri anun Sitoyisi karamɔgɛnu, wonu donu tugun bɛnta a ma anu be a sɔsɔla. Donu ko: «Kɛ bure be diren fen kuma fɔla?» Donu tugun ko: «A be maren iko a be jamanɛ donu la batufeŋɛnu le la ko lakela.» Anu ka wo fɔ, bayi a be Isa la kibaru ɲinma anun fagabaga lawuli koe lakela anu ma.
19 Anu ka a jigan anu ka a doni dula do tɔ ka min tɔgɔ Areyopasi, anu ko: «I be diina nama min na ko fɔla, mɔ be diren mɔ ni a lɔn.
20 I to be ko nama donu lanala mɔ tole tɔ, wolo mu mɔ be diren mɔ ni wo koenu kɔtɔ lɔn.»
21 A taranta, Atɛni dugudeŋɛnu bɛ nun ɲɔ luntaŋɛnu bele fenfen tɔ, fɔ ka mira nama fɔ, ka wo ma ka a lamɔɛ.
22 Awa, Pɔlu sɔta Areyopasi kuntigenu tɛma, a ka a fɔ, a ko: «Atɛni kaanu, n bata a yen batu koe di wo ye mɔɔle bɛ la han a tanbita a tɔ.
23 N be saa takuntula wagate min tɔ, n to be wo la batufeŋɛnu lasagala, n ka sarika bɔɔ dula do yati yen de, kɛ sɛbɛre le be a ma: ‹Batufeŋɛ min bele lɔnden, a tɛŋɛ le kɛ la.› Awa, wo be min batula wo bele a lɔnden, nde be wolo la ko fɔla wo ye.
24 Ala min ka dunuya nun a butɔ feŋɛ bɛ da, ale len mu saŋɛ nun duge Marige la. Wolo mu, batu boŋɛ minnu be ɲiɲaren bole la, a te sabati wonu butɔ.
25 Mɔgɛ tugun te wale ma Ala ye a bole la, Ala haju yo bele mɔgɛ la dɛmare ma, bayi ale len be nɛ diila mɔgɛ bɛ ma, anun foofe, anun koe bɛ.
26 A ka see bɛ ma benba dɔndɔ le bɔnsɛ la, anu ni sigi duge dula bɛ tɔ, ale yɛtɛ ka anu la simaya nun anu sigidulanu naaniŋɛ sa.
27 A ka wo ma, alako anu ni ale Ala le ɲini, alako tumado anu si timitama, ka kata ka a yen. Adun, a ma yanfa wo mɔ hali dɔndɔ la,
28 bayi ale le be wo mɔ nɛ labaluren, mɔ be koe bɛ mala ale le sabu la, ale le be mɔ lasabatiren. Wo la jele donu tugun ka a fɔ ɲɔgɔnna, anu ko: ‹A bɔnsɛ le mu wo mɔle tugun na.›
29 Awa, wo butɔ, Ala bɔnsɛ to mu wo mɔle min na, a ma bɛn wo mɔ ni mɔ mira ka a fɔla, Ala be maren de iko kuye sanunɛŋɛ, kaalise, ka wo ma kure la, mɔgɛ be min malasɛren a yɛtɛ la mira la a bole la.
30 Ala ma wo koe lɔnbaliya wagatenu jigan, kɔnɔ kɔtɛ, a be mɔgɛ bɛ yamɔrila dula bɛ tɔ, anu ni tuubɛ.
31 Wo butɔ, a bata lɔgɔ dɔndɔ masubɛ, a si naa dunuya mɔgɛnu bɛ makiiti lun min na teleŋɛ butɔ, kaye do sabu la, a bata min masubɛ. A to ka wo kaye lawuli ka a bɔɔ fagabaganu tɛma, wolo mata seedeɲɔgɔya la mɔgɛ bɛ ye ka a fɔla ale len mu mɔgɔ masubɛreŋɛ la.»
32 Anu to ka lawuli ko kuma mɔɛ, fagabaganu tɛma, donu be a majelela, kɔnɔ donu ko: «Tuma do, mɔ si naa mɔ tolomasɔ i la tugun.»
33 Wo butɔ, Pɔlu bɔɔta anu tɛma.
34 Kɔnɔ kaye donu kitita a la, anu mata dɛnkɛnɛyabaga la. Areyopasi kuntige do min tɔgɔ Diyonisi, wo be anu tɛma, anun muse min tɔgɔ Damarisi, anun mɔgɔ donu tugun.