Piyɛri la dantɛgɛ sa Darisalamu
11
Kiilanu anun dɛnkɛnɛyabaganu minnu be Juda duge tɔ, wonu ka a mɔɛ ka a fɔla, sii gbɛtɛnu mɔgɛnu minnu ma ma Yahudenu la, wonu tugun bata Ala la kuma bita.
2 Piyɛri la saagireŋɛ Darisalamu, Yahude dɛnkɛnɛyareŋɛnu ka a lasɔnkɔ, anu ko a ma:
3 «I bata don sunnabalenu bata, i ka dɔmɔre ma anu fɛ!»
4 Awa, a tanbita ki min na ka bɔɔ a fɔlɔdula, Piyɛri ka a bɛ ɲamakaran anu ye dɔndɔ dɔndɔ.
5 A ka a fɔ, a ko: «N to be Jafa saa tɔ nun, n be Ala mataraŋɛ tɔ, n ka laamute yen, fondo be toren iko kuta banba, a be kitiren a tunku naanɛ ma. A be jigila bɔɔla saŋɛ tɔ, a nata han n dula.
6 N ka a lasaga koola: n ka kolofeŋɛnu, nun burun butɔ subenu, anun bubufeŋɛnu, anun kondeŋɛnu yen a tɔ.
7 N mɛn ka kumari kulɛ do mɔɛ min ka a fɔ n ɲɛ, a ko: ‹Piyɛri, wuli, i ni do faga i ni a dɔmɔ.›
8 Kɔnɔ n ka a fɔ: ‹Marige, n te a ma muku! Fondo haramureŋɛ min be kɔsɔren, n ma wo hali dɔndɔ ladon n da tɔ betunna.›
9 Awa, wo kumari kulɛ mɛn ka a fɔ ka bɔɔ saŋɛ tɔ a filaɲɔgɛ la, a ko: ‹Ala bata min saniyan, i kana wo ma fondo haramureŋɛ la.›
10 Wo koe mata kunɲama saba. Wo kɔma, a mɛn bɛ tayɛlɛta saŋɛ tɔ tugun.
11 Wo ka a taran, kayi saba be kiiren n ma bɔɔla Sesare saa tɔ, anu tagata sɔ boŋɛ dala kisanna mɔ be min tɔ.
12 Hakkili saniyandeŋɛ ka a fɔ n ɲɛ mɔ nun anu bɛ ni taga, sikkɛ bele a tɔ. Kɛ n nɛɛnɛdɔndɔ mɔgɔ wɔɔrɛ tugun ka n masɔ. Mɔ tagata don wo kaye Kɔrɔnɛyi la boŋɛ tɔ.
13 Wo ka a ɲamakaran mɔ ye, a ka maleka do yen sɔren ki min na a la boŋɛ tɔ, wo ka a fɔ a ye: ‹Simɔn min tɔgɛ be fɔla Piyɛri, kiila kii wo ma Jafa saa tɔ, a ni na.
14 I nun i la denbaya si kisi kumanu min na, a si wonu fɔ i ye.›
15 Awa, nde Piyɛri ka kuma fɔlɔ wagate min tɔ, Ala Hakkili saniyandeŋɛ jigita anu ma, iko a jigita mɔle Yahudenu ma ki min na a fɔlɛ la.
16 Wo butɔ, n ka Marige la wo kuma talɔn, a fɔla: ‹Yaya ka mɔgɛnu lasuwɛ je le tɔ, kɔnɔ wole kan be lasuwɛla Hakkili Saniyandeŋɛ le la.›
17 Ala ka a Hakkile Saniyandeŋɛ dii mɔle Yahudenu ma, mɔ to dɛnkɛnɛyata Marige Isa Ala la mɔgɔ masubɛreŋɛ ma. Wo butɔ, ka a ka wo ɲɔgɔn dii wonu tugun ma, ɲɔmɔ mu nde la, a fɔ koe la Ala ye, i kana wo ma?»
18 Yahude dɛnkɛnɛyareŋɛnu to ka wo mɔɛ, anu sabarita anu ka Ala matɔgɔ, anu ko: «Awa, Ala bata sii gbɛtɛ mɔgɛnu tugun natuubɛ, anu ni kisi!»
Antiyoki la dɛnkɛnɛyabaga la jama
19 Awa, dɛnkɛnɛyabaga minnu malansanta ɲagankata la ko la Etiyɛn faga kɔma, wonu tanbita han Fenisi jamanɛ nun Sipiri sure tɔ, han Antiyoki saa tɔ. Anu bele Ala la kuma fɔla mɔgɔ yo ye, fɔ Yahudenu dɔrɔn.
20 Wo tɛmuɛ, donu be anu tɔ minnu be bɔɔren Sipiri nun Sirɛni. Wonu tugun tagata ke Antiyoki, kɔnɔ ande be kumala mɔgɛnu tugun ye minnu ma ma Yahudenu la, anu tota Marige Isa la kibaru ɲinma fɔla anu ye.
21 Marige bole be anu kɔtɔ han mɔgɔ siyama dɛnkɛnɛyata, anu ka anu yɛtɛ lasaagi Marige ma.
22 Wo kibare keta Darisalamu dɛnkɛnɛyabaga jama ma. Wo butɔ, anu ka Baranabasi lasanba han Antiyoki.
23 A la kereŋɛ ɲɔ, a ka Ala la hanigi ɲinma wale yen, a sɛɛwata. A be anu bɛ waajɛla, anu ni a nátá anu ni to Marige kɔma anu juse bɛ la.
24 Ale Baranabasi mu kayi ɲinma le la, Hakkili Saniyandeŋɛ barikɛ be a ma, a la dɛnkɛnɛya tugun kolo. Awa, mɔgɔ siyama bata sa jama kunma minnu be dɛnkɛnɛyaren Marige ma.
25 Wo kɔma, Baranabasi tagata Taresi saa tɔ Sɔlu ɲinidula.
26 A to ka a yen, a ka a doni Antiyoki saa tɔ. San dɔndɔ muumɛ kɔtɔ, anu nun dɛnkɛnɛyabaga jama tota madɛnna, anu ka mɔgɔ siyama kawandi. A fɔ koe la talibenu ma «Isayanka», wo fɔlɔta Antiyoki le.
27 Awa, wo tɛmuɛ le, nabiyonmɛ donu bɔɔta Darisalamu anu tagata Antiyoki.
28 Dɔndɔ be anu tɛma a tɔgɔ Agabusi, wo wulita a ka a yita Hakkili saniyandeŋɛ sabu la, aa kɔnkɔ fitina si naa tugu le dunuya bɛ la. Wo koe mata le yati Rɔmu mansa banba Kulodu wagate.
29 Wo butɔ, ɲɔ talibenu bɛnta a ma ka a fɔla, anu nɛɛnɛdɔndɛnu minnu be sabatiren Juda duge tɔ, anu ni wonu dɛman fondo lasanba koe la anu ma, bɛ si nɔ min na.
30 Anu ka wo ma, anu ka a don Baranabasi nun Sɔlu bolo, anu ni taga a don dɛnkɛnɛyabaga kuntigenu bolo Juda duge tɔ.