Piyɛri nun Kɔrɔnɛyi
10
Kaye do le be Sesare saa tɔ min tɔgɔ Kɔrɔnɛyi. Sɔɔri kuruŋɛ min tɔgɔ Itali la kuruŋɛ, wo la sɔɔri kɛmɛ la kuŋɛ do le.
2 Ala ɲalakilan mɔgɛ le mu a la, a nun a la denbaya bɛ be Ala batula. A be Yahude jama kɔla ko siyama la, a mɛn be Ala mataraŋɛ mala tɛmuɛ bɛ.a
3 Lun do, salifana tanbi kɔma, a ka a yen laamute tɔ a beeyareŋɛ la, Ala la maleka do donta a bata, a ka a kele, a ko: «Kɔrɔnɛyi!»
4 Kɔrɔnɛyi ka a ɲa sɔ a la, a kilanta, a ka a fɔ: «Marige, fen de mu?» A ka a jaabi, a ko: «I la mamataraŋɛnu anun i be kɔɔre minnu mala, wonu bata yɛlɛ Ala dula, a bata anu jigan.
5 Kɔtɛ, i ni kayenu kii Jafa saa tɔ anu ni taga mɔgɛ do nati min tɔgɔ Simɔn Piyɛri.
6 A be yigiyaren garanke do bata le min tɔgɔ Simɔn, a la boŋɛ be ba dala.»
7 Maleka to banta kumala, a tagata. Wo kɔma, Kɔrɔnɛyi ka walila fila kele. Sɔɔre minnu be a sagoe tɔ wagate bɛ, a ka Ala ɲalakilan mɔgɛ dɔndɔ kele wonu tugun tɔ.
8 A to ka koe bɛ ɲamakaran wonu ye, a ka anu kii Jafa.
Piyɛri la laamute
9 Wo tabantaka, Kɔrɔnɛyi la kiilanu be tagala kila kunma, anu la sutuyareŋɛ Jafa saa la wagate min tɔ, wo ka a taran Piyɛri bata yɛlɛ koori boŋɛ kanna a be yigiyaren ka min, Ala mataran koe la. Wo tɛmuɛ, tele be kunna.
10 Kɔnkɛ bata a bita koola, a be diren dɔmɛ dɔmɔla. Yannun dɔmɛ ni ban ɲiɲala a ye, a ka laamute do yen.
11 A ka saŋɛ yen a be lakaren, fondo be toren iko kuta banba, a be kitiren a tunku naanɛ ma, a ka wo yen jigila han a keta duge tɔ.
12 Kolofeŋɛnu nun burun butɔ subenu mɔɔle bɛ nun bubufeŋɛnu anun kondeŋɛnu be wo kuta tɔ.
13 A ka kulɛ do mɔɛ, wo ka a fɔ a ye: «Piyɛri, wuli! I ni do faga, i ni a dɔmɔ.»
14 Kɔnɔ a ka a fɔ: «N Marige, n te a ma muku! Fondo haramureŋɛ, min be kɔsɔren, n ma wo fenfen dɔmɔ betunna.»
15 Wo kulɛ mɛn takumata a ye a filaɲɔgɛ la, a ko: «Ala bata min saniyan, i kana wo ma fondo haramureŋɛ la.»
16 Wo koe mata kunɲama saba. Wo kɔma, wo kuta mɛn tayɛlɛta saŋɛ tɔ kisanna.
17 Piyɛri ka laamute min yen, a be kɔntɔfiliren koola wo be fen min fɔren, awa wo wagate le, Kɔrɔnɛyi ka kaye minnu kii, wonu ɲan ka Simɔn na boŋɛ maɲininka nun, anu be sɔren bonda tɔ.
18 Anu ka anu kulɛ labɔɔ, anu be ɲininkare mala, anu ko: «Simɔn Piyɛri be yigiyaren yan de ba?»
19 Piyɛri to be a mirala laamute la ko ma, Ala Hakkili saniyandeŋɛ ka a fɔ a ye, a ko: «Kayi saba be i ɲinila.
20 Wuli, i ni jigi wo bɛ ni taga ɲɔgɔn na. I kana sikkɛ, bayi nde le be anu kiiren.»
21 Piyɛri jigita, a ka a fɔ wo kayi saba ye, a ko: «Wo be min ɲinila, nde le mu ka. Wo be naren fenna yan?»
22 Anu ko: «Kɔrɔnɛyi sɔɔri kɛmɛ la kuŋɛ le be mɔ kiiren. A mu kayi telendeŋɛ le la, a be kilanden Ala la, Yahude jama bɛ mɛn be a tɔgɔ ɲinma fɔla. Awa, maleka saniyandeŋɛ bata wahau lake wolo ma, aa a ni mɔgɛnu kii i kɔma, i ni taga a bata, alako a ni i la kumanu mɔɛ.»
23 Wo butɔ, Piyɛri ka anu ladon, a ka anu yigiya. Wo tabantaka, a wulita, anu bɛ tagata. A nɛɛnɛdɔndɛ diinaɲɔgɛnu minnu be Jafa, wonu donu ka a masɔ.
24 Wo tugun tabantaka, anu donta Sesare saa tɔ. Wo ka a taran, Kɔrɔnɛyi be anu kɔnɔnden, a bata a bareŋɛnu nun a kafuɲɔgɔ ɲinmanu madɛn.
25 Piyɛri to be donna, Kɔrɔnɛyi ka a labɛn, a ka a fan majigi a kɛn kɔtɔ, a sujuduta a ye.
26 Kɔnɔ Piyɛri ka a lawuli, a ko: «Ile, yandi wuli! Nde yɛtɛ tugun mu mɔgɛ le la.»
27 Anu be kumala ɲɔgɔn ye donna boŋɛ butɔ, Piyɛri ka mɔgɔ siyama taran madɛnden ɲɔ.
28 A ka a fɔ anu ye, a ko: «Wo ka a lɔn, a bele dagɛren Yahude ye, a ni basan sii gbɛtɛ mɔgɛnu fɛ, ka wo ma, a ni taga anu bata. Kɔnɔ Ala bata a yita nde la, ka a fɔla, n kana a fɔ mɔgɔ yo ma a be haramuren, ka wo ma, a be kɔsɔren.
29 Wolo mu, wo to ka n kele, n ma sɔsɔre ma, n nata. Awa, n be wo maɲininkala, wo be n keleren surute miniman na.»
30 Wo kɔma, Kɔrɔnɛyi ko: «A tele naaniɲɔgɛ le mu bi, kɛ ɲɔgɔn wagate, salifana tanbi kɔma, n be Ala mataranna n na boŋɛ tɔ. Awa, kaye do bɔɔta n ma, a la donfeŋɛnu be malanna,
31 a ko: ‹Kɔrɔnɛyi, Ala bata i la mamataraŋɛ mɔɛ, i mɛn be kɔɔre minnu mala, a bata wonu jigan.
32 Awa, mɔgɛnu kii Jafa, anu ni taga Simɔn Piyɛri nati yan. A be yigiyaren garanke do la boŋɛ tɔ ba dala min tɔgɔ Simɔn.›
33 Wolo ka a ma, n ka mɔgɛnu kii i ma kisanna. I na koe tugun bata diya mɔ ye. Awa kɔtɛ, Marige bata i yamɔri koe min bɛ la, mɔ bɛ be yan Ala ɲala wonu lɔn koe la.»
Piyɛri la kawande
34 Wo butɔ, Piyɛri ka kuma da bita, a ko: «Tɔɲa le, n bata a lɔn kɔtɛ Ala bele mɔgɔ bɔɔren mɔgɔ tɔ,
35 kɔnɔ mɔgɔ yo min be kilanden Ala la, a be ko telendeŋɛ mala, a mata sii yo la, Ala si wo tigi kanu le.
36 A ka kuma lasanba bani Isirayila deŋɛnu ma, a ka kibaru ɲinma lake anu ma ka a fɔla, jususa be sɔtɔla Ala la mɔgɔ masubɛreŋɛ Isa le fɛ, mɔgɛ bɛ Marige mu ale len na.
37 Wo ka a lɔn, bɔɔla Yaya ka kibare lake ka a fɔla mɔgɛnu ni lasuwɛ je tɔ, wo kɔma Isa ka wale fɔlɔ Galile duge tɔ, a mɛn tagata Juda duge fɛfɛ bɛ tɔ.
38 Wo mɛn ka a lɔn, Ala ka Isa Nasarɛti kaa masubɛ ki min na a ka a kɔ Hakkili saniyandeŋɛ barikɛ la. Wo mɛn ka a lɔn tugun, Isa to be tanbila dula bɛ tɔ a be ko ɲinma mala, a mɛn ni mɔgɛnu bɛ lakendeya minnu be Sentanɛ sagoe tɔ, bayi Ala le be a fɛ.
39 A ka koe min bɛ ma Yahudenu la jamanɛ tɔ han ka ke Darisalamu saa butɔ, mɔle mu wonu bɛ seede la. Ɲɔ le, anu ka a banban lɔgɛ tɔ ka a faga,
40 kɔnɔ Ala ka a lawuli a tele saba luŋɛ, a ka a labɔɔ kɛnɛ tɔ.
41 A ma makɛnɛn mɔgɛnu bɛ ye, a makɛnɛnta mɔle seedenu tun de ye, Ala bata mɔle minnu masubɛ nun, mɔle min ka dɔmɔre ma a fɛ, mɔ ka minfeŋɛ min a fɛ kɔni, a lawule kɔma fagabaganu tɛma.
42 Awa, a ka mɔ yamɔri mɔ ni kibare lake jama ma, mɔ ni seedeɲɔgɔya bɔɔ, ka a fɔ Ala ka mɔgɔ kendenu nun mɔgɔ fagareŋɛnu la kiiti salá min sɔ, ale Isa le mu wo la.
43 Nabiyonmɛ bɛ ka ale len na ko fɔ, anu ko: ka min dɛnkɛnɛyata a ma, wo tigi junube si kafari le a tɔgɛ la ko la.»
44 Piyɛri to be wo kuma fɔla nɛti, Ala Hakkili saniyandeŋɛ jigita mɔgɛ bɛ ma minnu be wo kuma lamɔɛla.
45 Dɛnkɛnɛyabaga minnu be fatanden Yahude bɔnsɛ la, minnu ka Piyɛri masɔ, wonu kaabɛta koola, ka a fɔla Ala be sii gbɛtɛ mɔgɛnu tugun kɔren a Hakkili saniyandeŋɛ la, a bata a lajigi anu ma.
46 Iyon, anu be a mɔɛla wonu be kuma gbɛtɛnu fɔla, anu be Ala la kabanakoenu fɔla. Wo butɔ, Piyɛri ka a fɔ, a ko:
47 «Kɛnu to bata Ala Hakkili saniyandeŋɛ sɔtɔ iko mɔle, mɔgɔ si nɔ balanna, ka a fɔla kɛnu kana lasuwɛ je tɔ?»
48 Awa, a ka yamɔre sa, anu ni lasuwɛ je tɔ Ala la mɔgɔ masubɛreŋɛ Isa tɔgɛ la. Wo kɔma, anu ka Piyɛri madiya a ni tele dan donu ma ɲɔ.