Isa la Ala mataraŋɛ a la talibenu ye
17
Isa to banta wo kumanu fɔla, a ka a ɲa layɛlɛ kantɔ, a ko: «N Baaba, wagate bata ke. I ni nde i la den kayireŋɛ la kunnawule makɛnɛn. Wolo si a ma nde tugun ni i la nɔɔra makɛnɛn.
2 I ka sagoe dii n ma dunuya mɔgɛ bɛ kunma, alako n ni abada kise dii mɔgɛnu ma, i be minnu donden n bolo.
3 Abada kise le mu ka: anu ni i lɔn, i mu min na, ile Ala dɔrɔn, tɔɲa tige, anu mɛn ni nde Isa Ala la mɔgɔ masubɛreŋɛ lɔn, i ka min nasanba.
4 Nde bata i la nɔɔra makɛnɛn dunuya, bayi i ka wale min don n bolo, n bata wo lakamali.
5 N Baaba, kɔtɛ, nɔɔra min be n ma nun i kɛnna, yannun dunuya ni da, i ni wo nɔɔra jigan i ni n kunnawuli wo la i yɛtɛ kɛnna.
6 I ka mɔgɛ minnu don n bolo dunuya mɔgɛnu tɛma, n bata i tɔgɛ yita wonu la. I tɛŋɛ le mu anu la, i ka anu don n bolo. Anu bata i la kuma labatu.
7 I be koe min bɛ donden n bolo, anu bata a lɔn kɔtɛ, wonu be fatanden ile le la.
8 Bayi i ka kuma minnu don n bolo, n bata wonu matanbi anu ma. Anu sɔnta anu la, anu bata a lɔn yati n be fatanden ile le la. Anu laata a la ka a fɔla ile le ka n nasanba.
9 N be mamataraŋɛ mala ande le ye. N te mamataraŋɛ ma dunuya mɔgɛnu ye, fɔ i ka mɔgɛ minnu don n bolo, bayi i tɛŋɛ le mu anu la.
10 N tɛŋɛ bɛ mu i tɛŋɛ le la, i tɛŋɛ bɛ mu n tɛŋɛ le la. N be kunnawuliren ande le la ko tɔ.
11 Awa, nde si naa taga le ile dula. N te naa to dunuya bitugun, kɔnɔ ande be tola dunuya. N Baaba saniyandeŋɛ, i be i tɔgɛ min diiren n ma, anu makanta i wo tɔgɛ sɛnbɛ la, alako anu ni ma dɔndɔ la, iko nde nun ile be maren dɔndɔ la ki min na.
12 N to be anu tɛma wagate min tɔ, nde tota anu makantala i tɔgɛ sɛnbɛ le la, i ka min dii n ma. N to ka anu makanta, mɔgɔ yo ma sama anu ɲaama fɔ mɔgɔ dɔndɔ. Ɲagankata be mandiren ale dɔrɔn ye. Kɛ bɛ mata, alako kitabue sɛbɛreŋɛ ni kamali.
13 N be tagala ile dula kɔtɛ. Fanni n be dunuya, n be kɛ kuma fɔla, alako anu ni sɛɛwa a kamalireŋɛ la iko nde be sɛɛwaren ki min na.
14 Nde bata i la kuma matanbi anu ma, wo butɔ dunuya mɔgɛnu bata anu kɔn, bayi dunuya tɛn ma anu la, iko dunuya to tɛn ma nde la.
15 N bele i mataranden i ni anu bɔɔ dunuya, ade, n be i mataranden de i ni anu latanga Sentanɛ ma.
16 Iyon, dunuya tɛn ma anu la, iko dunuya to tɛn ma nde tugun na.
17 I ni anu sa i yɛtɛ sagoe tɔ, i la tɔɲa sabu la. I la kuma le mu tɔɲa la.
18 N bata anu kii dunuya, iko ile tugun to ka nde kii dunuya ki min na.
19 N be n yɛtɛ sala i sagoe tɔ anu la ko la, alako ande tugun ni to i sagoe tɔ i la tɔɲa sabu la.
20 N bele mamataraŋɛ mala anu tun de ye, kɔnɔ n be a mala mɔgɛnu tugun ye minnu si naa dɛnkɛnɛya n ma, n na talibenu la kuma sabu la.
21 N Baaba, n be mamataraŋɛ mala anu ye, anu bɛ ni ma dɔndɔ la, iko i la ko to be nde ye, nde tugun na ko be i ye. N be i mataranna le, ande tugun na ko ni to mɔ ye; wo butɔ, dunuya mɔgɛnu si dɛnkɛnɛya ka a fɔla, ile le be n kiiren.
22 I bata kunnawule min dii n ma, nde tugun bata wo dii anu ma, alako ande tugun ni ma dɔndɔ la, iko nde nun ile to mu dɔndɔ la.
23 Wo butɔ, nde la ko be anu ye, ile tugun na ko be nde ye. N be i mataranna le, anu ni kamali anu ni ma hakkili dɔndɔ la. Wo butɔ, dunuya mɔgɛnu si a lɔn ile le ka n kii, i mɛn ka anu kanu, iko i ka nde kanu ki min na.
24 N Baaba, yannun dunuya ni da, i ka nɔɔra dii n ma, bayi i ka n kanu le. A sɔgɔ be n na, i ka mɔgɛnu minnu don n bolo, wonu tugun ni to n kɛnna arijanna, anu ni n na nɔɔra yen.
25 N Baaba, i be telenden de. Nde ka i lɔn, i mu min na, dunuya mɔgɛnu kan ma i lɔn. N na kɛ talibenu tugun bata a lɔn, ka a fɔla ile le ka n kii.
26 N ka i tɔgɛ yita anu la, n mɛn si to a yitala anu la, alako i ka n kanu kanunteya min na, wo ni to anu tɔ, nde tugun na ko ni to anu ye.»