16
«N be kɛ bɛ fɔren de wo ye, alako wo kana fili.
2 Anu si wo latɔn de wo kana don wo la kawandi ma boŋɛnu butɔ bitugun. Wagate ɲan si naa ke le, min yo ka wo faga, wo tigi si a mira le ka a fɔla a bata wali ɲinma ma Ala ye.
3 Anu si wo ma le wo la, bayi anu ma n Baaba lɔn, anu ma nde tugun lɔn.
4 Kɔnɔ n be kɛ fɔren de wo ye kɔtɛ, alako wo wagate tini ke tɛmuɛ min tɔ, wo ni wo hakkile to a ma, ka a fɔla nde ka wo fɔ le wo ye.»
Ala Hakkili Saniyandeŋɛ la wale
Isa mɛn ko: «N ma kɛ kuma fɔ wo ye nun bɔɔla a fɔlɛ la, n to be toren wo tɛma.
5 Kɔnɔ kɔtɛ, n to be tagala n Kiilá dula, hali mɔgɔ dɔndɔ ma n maɲininka wo tɛma n be tagala ka min na.
6 Kɔnɔ, n to bata kɛ koenu fɔ wo ye ka, wo bata suunu koola.
7 Adun, n ni tɔɲa fɔ wo ye, n na taga le fisa wo ye. Ka n ma taga, wo Sabu Ɲinma te na wo ma. Kɔnɔ ka n tagata, n si naa a lasanba le wo ma.
8 Wo tini na wagate min tɔ, a si ko saba yita dunuya mɔgɛnu la, minnu be tabɛnden junube la ko ma, anun teleŋɛ la ko, anun kiite la ko.
9 Dunuya mɔgɛnu bele dɛnkɛnɛyaren n ma, wo butɔ, Sabu Ɲinma si anu wo junube la ko yita anu la.
10 N be tagala n Baaba dula, wo te naa n yen bitugun, wo butɔ, Sabu Ɲinma si n na teleŋɛ la ko yita anu la.
11 Kiite bata ban Sentanɛ dunuya mansa koroŋɛ bitala, wo butɔ, Sabu Ɲinma si kiite la ko yita anu la.
12 N mɛn si nɔ ko siyama fɔla wo ye, kɔnɔ a te kun wo tɔ betunna.
13 Ala Hakkili Saniyandeŋɛ tini na, a si tɔɲa bɛ bu lafara wo ye, bayi ale le mu tɔɲa tige la. A la kumanu bele fatanden a yɛtɛ le la: a tini min bɛ mɔɛ n Baaba la, a be wolo fɔla wo ye. Koe minnu si naa ke, a si naa wonu ɲatabɔ wo ye.
14 Ale si n kunnawuli le, bayi a be n fɔri kulɛ le ɲatabɔla wo ye.
15 N Baaba la koe bɛ mu n tɛŋɛ le la, wolo mu n ka a fɔ, a be n fɔri kulɛ le ɲatabɔla wo ye.»
Suunɛ mafalin koe sɛɛwa la
16 Isa mɛn ko: «A te mɛ, wo te n yen. A tini mɛ donden tugun, wo mɛn si naa n yen de.»
17 Wo butɔ, a la talibe donu ka ɲɔgɔn maɲininka, anu ko: «A be fen fɔren mɔ ye ka, aa a te mɛ mɔ te a yen? Aa a tini mɛ donden, mɔ mɛn si a yen tugun; a mɛn ko aa bayi a be tagala a Baaba dula, wo be fen de fɔren?»
18 Wo butɔ, anu ka a fɔ: «A be fen kuma fɔla mɔ ye ka, aa a te mɛ? A be fen min fɔla, mɔle ma wo kɔtɔ lɔn.»
19 Isa to ka a lɔn, anu be diren a maɲininkala le, a ka a fɔ anu ye: «N to ka a fɔ: a te mɛ, wo te n yen; a tini mɛ donden, wo mɛn si n yen tugun, awa, wo be ɲɔgɔn maɲininkala n na wo kuma le la ba?
20 N ni tɔɲa beeyareŋɛ fɔ wo ye: wole si di le, wo ni belebele, kɔnɔ dunuya mɔgɛnu kan si sɛɛwa le. Wo juse si wo tɔɔrɔ le, kɔnɔ wo tɔɔrɛ be naala mafalinna sɛɛwa le la.
21 Muse tini be tiŋɛ tɔ, a si tɔɔrɛ doni le, bayi a la wagate bata ke. Kɔnɔ, ka a ka deŋɛ sɔtɔ wagate min tɔ, a ɲan si ɲina le wo dumɛ bɛ la, a la sɛɛwa la ko la, bayi deŋɛ bata sɔtɔ dunuya.
22 Awa, wole tugun be tɔɔrɛ le tɔ kɛ tɛmuɛ, kɔnɔ n mɛn si naa tasaagi le wo yenna, wo juse ni sɛɛwa. Mɔgɔ yo te wo bɔɔ wo la wo sɛɛwa butɔ.
23 Wo lun tini ke, hali wo ma n maɲininka bitugun fenfen na.
N ni tɔɲa beeyareŋɛ fɔ wo ye: wo ka n Baaba mataran fenfen na n tɔgɛ la, a si a dii le wo ma.
24 Han bi, wo ma Ala mataran fenfen na nde tɔgɛ la betunna. Wo a mataran, wo si a sɔtɔ le, wo butɔ wo la sɛɛwa si kamali le.»
Isa la nɔ sɔtɔ koe dunuya kunma
25 Isa mɛn ko: «N bata kɛ koenu fɔ wo ye sandanu le tɔ. Kɔnɔ wagate do si naa ke, n te kuma wo ye sanda tɔ bitugun, fɔ n ni naa n Baaba la ko fɔ wo ye a beeyareŋɛ le la.
26 Wo si Ala mataran n tɔgɛ la wo lun. N ni a fɔ wo ye, hali nde ma n Baaba maɲininka wo ye,
27 bayi n Baaba yɛtɛ be wo kanuren de. A be wo kanuren de, bayi wole bata nde kanu, wo mɛn bata dɛnkɛnɛya, ka a fɔla nde be fatanden Ala le la.
28 N fatanta n Baaba la, n nata dunuya. Kɔtɛ, n be bɔɔla le dunuya, saagi koe la n Baaba dula.»
29 A la talibenu ka a fɔ a ye: «Kɔtɛ kan, i bele sanda yo sala, i be kumala a beeyareŋɛ le la.
30 Mɔ bata a lɔn kɔtɛ, i ka koe bɛ lɔn. Hali mɔgɔ yo ma i maɲininka. Wolo be a maren, mɔ be laaren a la, i be fatanden Ala le la.»
31 Isa ka anu jaabi, a ko: «Wo bata laa kɔtɛ ba?
32 Wagate si na, a ɲan bata ke, wo bɛ si naa malansan de, wo bɛ ni a kun kata, wo ni n dɔrɔn to. Kɔnɔ hali wolo, n dɔrɔn ma, bayi n Baaba be n fɛ.
33 N be kɛ koenu fɔren de wo ye, alako wo ni jususa sɔtɔ nde sabu la. Wo si naa tɔɔrɔ le dunuya, kɔnɔ wo limaniya, nde bata dunuya nɔ.»