Kila le Isa la tagala a Baaba ma
14
Isa ka a fɔ a la talibenu ye: «Wo juse kana bɔɔ. Wo dɛnkɛnɛya Ala ma, ka dɛnkɛnɛya nde tugun ma.
2 Todula siyama le be n Baaba bata boŋɛ ma. Ka wo ma nun, n te a fɔ wo ye nun, ka a fɔla n be tagala wo la todula tabɛndula.
3 N tini taga n ka todula do tabɛn wo ye, n mɛn si tana tugun, n ni wo doni n bata, alako nde be ka min na, wole tugun ni to ɲɔ.
4 N be tagala ka min na, wo ka ɲɔ kila lɔn.»
5 Tomasi ka a fɔ a ye: «N Marige, mɔ ma i tagadula lɔn, mɔ si nɔ ɲɔ kila lɔnna kama le?»
6 Isa ka a fɔ a ye, a ko: «Kila nun tɔɲa nun kise le mu nde la. Mɔgɔ yo te don n Baaba bata, ka a ma ke nde ma.
7 Wo to be nde lɔnden, wo si n Baaba tugun lɔn de. Bɔɔ kɛ wagate ma, wo ɲan bata a lɔn, wo mɛn bata a yen.»
8 Wo butɔ, Filipu ka a fɔ a ye: «N Marige, i Baaba yita mɔ la, wo si mɔ wasa le.»
9 Isa ka a fɔ a ye, a ko: «Filipu, wo mɔ bata mɛ ɲɔgɔn na bima, han bi i bele n lɔnden ba? Ka min ka nde yen, a bata n Baaba yen. I nɔn be a fɔla fenna, aa n ni n Baaba yita wo la?
10 I bele laaren a la ba, ka a fɔla n Baaba la ko be n ɲɛ, nde tugun na ko be a ye? N be kuma minnu fɔla wo ye, wonu bele fatanden n yɛtɛ le la. N be wale minnu tugun mala, n Baaba la ko min be n ɲɛ, wolo yɛtɛ yati be wonu mala.
11 Wo laa n na, ka a fɔla nde la ko be n Baaba ye, n Baaba la ko tugun be nde ye. Ka wo ma laa n na n na kumanu la ko la, kɔnɔ wo ni laa n na n na walenu kan na ko la.
12 N ni tɔɲa beeyareŋɛ fɔ wo ye: min tini dɛnkɛnɛya n ma, n be wale minnu mala, ale tugun si wonu ɲɔgɔn ma. A ɲan si donu tugun ma minnu kolo n tɛŋɛnu ko, bayi nde be tagala le n Baaba dula.
13 Wo ka Ala mataran fenfen na n tɔgɛ la, n si wo ma le, alako n Baaba la nɔɔra ni makɛnɛn nde a la den kayireŋɛ la ko sabu la.
14 Ka wo ka n mataran fenfen na n tɔgɛ la, nde si wo ma le.»
Ala Hakkili saniyandeŋɛ
15 Isa mɛn ko: «Ka wo be n kanuren, wo ni n na yamɔrenu labatu.
16 Nde tugun si n Baaba mataran de, a ni Sabu ɲinma do gbɛtɛ lasanba wo ma, min si to wo fɛ abada,
17 wolo be tabɛnden Ala Hakkili saniyandeŋɛ tɔɲa tige ma. Dunuya mɔgɛnu te nɔ a mabitala, bayi anu bele a yenna, anu mɛn ma a lɔn. Kɔnɔ wole kan ka a lɔn, bayi a be wo kɛnna, a si naa sabati wo juse tɔ.
18 N te wo to misikiniya tɔ, n mɛn si tasaagi le wo kɛnna.
19 Yannun wagatinden, dunuya mɔgɛnu te n yen bitugun. Kɔnɔ wole kan si naa n yen de, bayi nde mu kise tige le la, wole tugun si naa kisi le.
20 Wo si a lɔn wo lun, ka a fɔla nde la ko be n Baaba ye, wole tugun na ko be nde ye, nde tugun na ko be wo ye.
21 Ka min be n na yamɔrenu bitala, ka anu labatu, wo tigi le be n kanuren. Min be n kanuren, n Baaba si wo tigi kanu le. Nde tugun si a kanu le, n ni n yɛtɛ labɔɔ a ma.»
22 Judasi do be, min ma Judasi Isikariyoti la, wo ka a fɔ a ye: «N Marige, fen de be a maren i be i yɛtɛ labɔɔla mɔle ma, i bele i yɛtɛ labɔɔla dunuya mɔgɛnu kan ma?»
23 Isa ka a jaabi, a ko a ma: «Min tini n kanu, wo tigi si n na kuma labatu le, n Baaba tugun si a kanu le. Mɔ nun n Baaba si na le wo tigi dula, mɔ ni sabati a bata.
24 Min bele n kanuren, wo te n na kumanu labatu. Adun, wo be kumanu minnu mɔɛla n na, wonu bele fatanden nde le la, anu be fatanden n Baaba le la, min be n nasanbaren.
25 N be kɛ koenu fɔren wo ye, n to be wo tɛma ka.
26 Kɔnɔ n Baaba si wo Sabu Ɲinma lasanba wo ma n tɔgɛ la, min tabɛnden Hakkili Saniyandeŋɛ ma; wolo si wo degen koe bɛ la. N ka kuma min bɛ fɔ wo ye, a si wo talɔn de wo bɛ la.
27 N be jususa tola wo bolo kɔtɛ, min be fatanden nde la. Wo jususa bele fatanden dunuya la. Wo juse kana bɔɔ, wo kana kilan.
28 Wo bata a mɔɛ n da tɔ n be tagala le, n mɛn ni naa tana wo kɛnna tugun. Ka wo be n kanuren nun yati, a bɛnta wo ni sɛɛwa nun n taga koe la n Baaba dula, bayi n Baaba kolo nde ko.
29 Awa, n be a fɔren de wo ye kɔtɛ kisanna, yannun a be kela, alako a tini ke wagate min tɔ, wo ni dɛnkɛnɛya n ma.
30 Bi kɔma, n bele kumala wo ye a banba la, bayi Sentanɛ dunuya mansa koroŋɛ be nala, kɔnɔ a te nɔ sɔtɔ n kunma feu.
31 Kɔnɔ a be nala, wo butɔ dunuya mɔgɛnu ni a lɔn n be n Baaba kanuren, n mɛn be a mala iko n Baaba ka n yamɔri ki min na.
Kɔtɛ, wo wuli, wo mɔ ni bɔɔ yan.»