Isa la talibenu kɛŋɛnu lako koe
13
Yannun Hɔrɔya Sale ni ke, Isa ka a lɔn ka a fɔla a bɔɔ wagate bata ke kɛ dunuya, saagila a Baaba dula. A yɛtɛ tɛn mɔgɛ minnu be dunuya, a ka wonu kanu le kanunteya la min dan bele.
2 Wo butɔ, Isa nun a la talibenu be dɔmɔ dɔmɛ tɔ wura la. Wo ka a taran, Sentanɛ bata ban donna Simɔn Isikariyoti la den kayireŋɛ Judasi juse tɔ, a ni Isa janfa.
3 Awa, Isa ka a lɔn a Baaba bata koe bɛ to a sagoe tɔ, a mɛn ka a lɔn a be bɔɔren Ala dula le, a mɛn be tasaagila wo Ala le dula.
4 Wo butɔ, Isa wulita dɔmɔri dula, a ka a la doriki banba bɔɔ, a ka kuta do jigan, a ka a kiti a tɛ ma.
5 Wo kɔma, a ka je sa panɛ do tɔ, a fɔlɔta a la talibenu kɛŋɛnu lakola; kuta min be kitiren a tɛ ma, a be anu kɛŋɛnu mafitanna wo la.
6 Wo butɔ, a keta Simɔn Piyɛri tugun ma. A la kereŋɛ a ma, wo ka a fɔ a ye: «Ee, n Marige, ile si nde kɛŋɛnu lako ba?»
7 Isa ka a jaabi, a ko: «Nde be min mala ka, ile bele a lɔnden betunna, kɔnɔ i si naa a kɔtɔ lɔn ɲatɔ.»
8 Piyɛri ka a fɔ a ye: «Ade! I te nde kɛŋɛnu lako muku!» Isa ka a jaabi, a ko: «Ka n ma i kɛŋɛnu lako, i tɛn bele n bolo.»
9 Simɔn Piyɛri ka a fɔ a ye: «N Marige, n kɛŋɛnu lako, i ni n bolenu anun n kuŋɛ tugun sa a kunma.»
10 Isa ka a fɔ a ye: «Min be a yɛtɛ koren, wo haju yo bele a koori ko ma, fɔ a kɛŋɛnu, a bale bɛ ɲan be beeyaaren de pɔsi. Wole be beeyaaren, kɔnɔ wo bɛ ma.»
11 Isa ka a fɔ le, aa anu bɛ le bele beeyaaren, bayi a ɲan ka a lɔn bima min si naa a janfa.
12 Isa banta anu kɛŋɛnu lakola wagate min tɔ, a mɛn ka a la doroki banba tajigan, a ka a don a ma. A mɛn ka a majigi anu kɛnna, a ka a fɔ anu ye: «N be bɔɔren min mala wo ye, wo ka a kɔtɔ lɔn ba?
13 Awa, a kɔtɔ le ka: wo be a fɔla n ma: ‹Karamɔgɔ› anun ‹Marige›. Wo tɔɲa le mu, bayi wolo mu nde la.
14 Hali n to mu wo Marige anun wo Karamɔgɔ la, n bata wo kɛŋɛnu lako. Wolo mu, a bɛnta wole tugun ni ɲɔgɔn kɛŋɛnu lako.
15 Iyon, n bata misale yita wo la, alako wole tugun ni a ma iko nde ka a ma wo ye ki min na.
16 N ni tɔɲa beeyareŋɛ fɔ wo ye: joŋɛ ma fisa a tige ko. Kiilá tugun ma fisa a kiilá ko.
17 Wo to ka wo lɔn, hɛra be wo ye, ka wo be a mala ɲɔgɔnna le yati.
18 N bele wo bɛ le la ko fɔla. N bata minnu masubɛ n ka wonu yuge lɔn. Kɔnɔ, min be sɛbɛren fɔ wo ni kamali. A be sɛbɛren:
‹N nun min be dɔmɔri ma tɔ kan dɔndɔ,
a bata a kɔ sɔ n na.› a
19 N bata a fɔ wo ye kɔtɛ kisanna, yannun a ni ke, alako a tini ke wagate min tɔ, wo si dɛnkɛnɛya ka a fɔla nde le mu min be sabatiren.
20 N ni tɔɲa beeyareŋɛ fɔ wo ye: min yo ka n na kiilá labɛn, a bata nde labɛn, min ka nde labɛn, wo bata n Kiilá labɛn.»
Judasi la janfaɲɔgɔya
21 Isa to banta wo kuma fɔla, a juse ɲatadonta, a ka seedeɲɔgɔya bɔɔ, a ko: «N ni tɔɲa beeyareŋɛ fɔ wo ye, mɔgɔ do si n janfa le wo tɛma.»
22 A la talibenu tota ɲɔgɔn fɛlɛla, anu be kɔntɔfiliren a be talibe min ma.
23 Isa la talibe dɔndɔ be ɲɔ, a di Isa ye, wo be a majigiren a kɛnna.
24 Wo butɔ, Simɔn Piyɛri ka misali do ma wo talibe ye, a ni Isa maɲininka a be min ma.
25 Wo talibe sɛnbɛta Isa ma, a ka a maɲininka, a ko: «N Marige, ɲɔmɔ le mu?»
26 Isa ka a jaabi, a ko: «Ka n ka dɛgɛ kunte lajigi maafi je tɔ, n si a don mɔgɔ dɔndɔ bolo wo tɛma, awa wolo si naa n janfa.» Wo kɔma, a to ka dɛgɛ lajigi maafi je tɔ, a ka a don Simɔn Isikariyoti la den Judasi bolo.
27 Judasi ka wo dɛgɛ bita, awa wo wagate le Sentanɛ donta a tɔ. Isa ka a fɔ a ye: «I be diren min mala, wo ma teriya la.»
28 Kɔnɔ minnu be majigiren ɲɔ, wonu hali dɔndɔ ma a lɔn Isa be wo fɔla a ye min na.
29 Nafulu safeŋɛ to be Judasi bolo, a be toren donu ye, Isa be a kiila le, a ni taga fondonu san Sale la ko la, anu hajue be boeren koe minnu ma, ka wo ma, a ni taga fondobɔnɛnu kɔ.
30 Awa, Judasi ka wo dɛgɛ kunte jigan ki min na, a bɔɔta le kisanna. Wo tɛmuɛ, sue bata don.
Yamɔri nama
31 Judasi la bɔɛ kɔma, Isa ka a fɔ: «Wagate bata ke, nde Adamadeŋɛ la kunnawule ni makɛnɛn. Ala la nɔɔra tugun si makɛnɛn nde sabu la.
32 Ka Ala la nɔɔra makɛnɛnta nde sabu la, ale tugun be nde Adamadeŋɛ la kunnawule makɛnɛnna ale Ala yɛtɛ le sabu la. A be wo mala kɔtɛ le.
33 N na deŋɛnu, n ni wagati donden ma wo fɛ. Wo si naa n ɲini le, kɔnɔ n ni a fɔ wo ye bi, iko n ka a fɔ Yahudenu ye ki min na: nde be tagala ka min na, wole te nɔ kela ɲɔ.b
34 N be yamɔri nama donna wo bolo: wo ɲɔgɔn kanu. Iko n ka wo kanu ki min na, wole tugun ni ɲɔgɔn kanu ɲɔgɔnna le.
35 Ka wo ka ɲɔgɔn kanu, wolo si a ma bɛ si a lɔn yati, ka a fɔla, n na talibenu le mu wo la.»
Piyɛri si naa a yɛtɛ masama le Isa ma
36 Wo butɔ, Simɔn Piyɛri ka a fɔ Isa ye, a ko: «N Marige, i ɲan be tagala mina le?» Isa ka a jaabi, a ko: «N be tagala ka min na, i te nɔ n jokkila ɲɔ kɔtɛ, kɔnɔ i si naa n jokki le bi tanbi kɔma.»
37 Simɔn Piyɛri ka a fɔ: «N Marige, fen de n te nɔ i jokkila kɔtɔkɔtɛ? N ɲan si diɲa le n nɛ ma i faliŋɛ la.»
38 Isa ka a jaabi, a ko: «I si diɲa i nɛ ma nde faliŋɛ la kɔni? N ni tɔɲa beeyareŋɛ fɔ i ye: yannun donton keke fɔlɛ, i si i yɛtɛ masama le n ma bi kunɲama saba.»