43
Ee Ala, i ni kiiti telendeŋɛ sa n ɲɛ,
i ni n na kɛlɛ ma Ala ɲalakilanbalenu kunma,
i ni n kunka janfantenu nun foniya fɔlanu ma.
2 Ile le mu n natangalá la; i ka n nafili fenna?
Fen de n be tagamanna suunɛ butɔ?
Fen de n jaguenu be n tɔɔrɔren?
3 I ni i la kɛnɛ nun i la tɔɲa nati n ma,
anu ni n natagaman tagala i batu dula,
i la kɔnkɔ saniyandeŋɛ kunma.
4 Wo tini ma, n si taga le i la sarika bɔɔ dula tɔ,
bayi ile Ala le mu n na sɛɛwa sabue la.
Ee Ala, n na Ala, n si n na kɔra jigan wo tɛmuɛ;
n ni i tantu beete bɔɔ a tɔ.
5 N be a fɔla n yɛtɛ ma:
N juse be makasala fenna?
N juse be suunuren fenna?
N be dɛnkɛnɛyaren Ala ma!
Iyon, n mɛn si naa a tantu le,
ale le mu n na malakisilá la,
n Marige Ala.