Ko koron malá anun wali ɲinma malá la ko kɛɲa
37
Dauda la beete do le ka.
I kana hanmɛ ko koron malanu la ko la,
i kana anu bɛsɛnkɔnnɛya,
2 bayi wonu si bala le kisanna iko biŋɛ,
anu si faga le iko ɲagama.
3 I ni dɛnkɛnɛya Alatala ma, i ni ko ɲinma ma.
I ni sabati kɛ duge tɔ, i ni balu lannanteya la.
4 I yɛtɛ laɲagalin Alatala la,
a si i diyanankoe bɛ ma le i ye.
5 I la ko to Alatala ma, i ni i yige tugun sa a ma,
a si wo bɛ ɲatabɔ.
6 A si i la teleŋɛ yita iko tele tini a da bula,
a ni i la tɔɲa makɛnɛn iko tele tini be kunna.
7 I ni i lakara Alatala bolo, i ni a kɔnɔn koe lamuɲu.
Min be hɛra sɔtɔla a yɛtɛ la kila la,
i kana hanmɛ wo mɔgɛ la min be ko koroŋɛ mala.
8 I kana dumɛn, i juse majigi.
I kana hanmɛ feu: ka wo ma a si ma le i ye ko koroŋɛ la.
9 Bayi ko koron malanu be nala halagila le,
Kɔnɔ minnu be anu hakkili sɔren Alatala ma, wondelen be nala duge sɔtɔla, anu ni sabati ɲɔ.
10 Wagatinden de be toren ko koron malanu ni ban.
I ni anu sabati dula ɲini kiyoki, i te mɔgɔ yo yen.
11 Kɔnɔ fan majigilanu, kɛ duge si ma anu tɛŋɛ la, anu ni sabati a tɔ,
anu ni ɲagalin, anu ni to jususa banba butɔ.
12 Telenbalenu be ko koroŋɛ tabɛnna mɔgɔ telendeŋɛnu ma,
anu ni anu ɲiŋɛ takin anu ma.
13 Marige be jelela anu ma,
bayi a ka a lɔn a sɔn nasagi luŋɛ be nala kela.
14 Ko koron malanu bata anu la faŋɛ saba a laa tɔ.
Anu ka anu la kala bannɛ,
alako anu ni misikinɛnu nun fondobɔnɛnu laboe.
Minnu be kila telendeŋɛ tɔ, ka wonu faga.
15 Kɔnɔ anu la faŋɛ si don de anu yɛtɛ juse tɔ,
anu la kalanu si kati.
16 Donden min be telenbaga bolo,
wo fisa ko koron malá siyama la bannaya ko.
17 Tɔɲa le, ko koron malanu bolenu si kati le,
kɔnɔ Alatala si telenbaganu kan kɔtɔ sɔ le.
18 Alatala ka telenbaganu la dunuya takunte kɛɲa lɔn.
Anu ka duge min sɔtɔ, wo si to anu bolo abada.
19 Anu te malu tɔɔrɛ wagate,
kɔnkɛ tini tugu duge la, anu si lawasa.
20 Kɔnɔ ko koron malanu si halagi le;
Alatala jaguenu si muttɛ iko ɲagama, ta si min bintan;
anu si naa to iko siise, anu ni sama.
21 Mɔgɔ koroŋɛ si singare ma kɔnɔ a te a lasaagi.
Kɔnɔ telenbaga kan si kinikini a si kɔɔre ma.
22 Alatala la barikɛ be minnu fɛ, duge si ma wonu tɛŋɛ la, anu ni sabati a tɔ.
Kɔnɔ a be minnu dankaren, wonu si halagi le.
23 Min na dunuya takunte ka Alatala hɛnɛ,
a si wo tigi kɛŋɛ lasabati le a la tagamaŋɛ butɔ.
24 Hali a jingijangata a te boe,
bayi Alatala be a kɔtɔ sɔla.
25 Kabɔɔ n denden tɛmuɛ han n kayibayareŋɛ,
n ma a yen telenbaga ni aɲɛ,
n ma a yen a bɔnsɛ ni to dɔmɛ taranna.
26 A si kinikini tɛmuɛ bɛ, a si singare ma.
A bɔnsɛ si barikɛ sɔtɔ le.
27 I ni fatan ko koroŋɛ la, i ni ko ɲinma ma.
Wo butɔ, i si sabati kɛ duge tɔ kudai.
28 Bayi ka teleŋɛ le be fɔla duge tɔ, wolo di Alatala ye.
Minnu be tola a la ko tɔ, a te wonu aɲɛ feu,
a si anu kanta kudai,
kɔnɔ ko koron malá bɔnsɛ si halagi le.
29 Duge si ma telenbaganu le tɛŋɛ la,
anu ni sabati a tɔ kudai.
30 Telenbaga da be hakkilimaya koe le fɔla,
a nɛŋɛ be tɔɲa le fɔla.
31 A Marige Ala la sariya be a juse tɔ,
A kɛŋɛ te surun a la tagaman yo tɔ.
32 Ko koron malá be telenbaga kɔrɔsila,
a ni a faga fɛrɛ ɲini.
33 Kɔnɔ Alatala te a to a jague sagoe tɔ,
a te a to kiiti koroŋɛ ni sa a kunma kiiti sa tɛmuɛ.
34 I hakkile to Alatala ma, i ni a la kila jokki;
a si i kunnawuli, kɛ duge ni ma i tɛŋɛ la, i ni sabati a tɔ.
Ko koron malanu be nala halagila tɛmuɛ min tɔ, i si wo yen.
35 N ka ko koron malá sɛnbɛ tige yen,
a be a yɛtɛ lakoloyala iko lɔgɔ kutu banba ɲinma.
36 Kɔnɔ a fɛlɛ, a tanbita; a te yen.
N ka a ɲini, kɔnɔ a te nɔ yenna bitugun.
37 Mɔgɔ kamalireŋɛ kɔrɔsi, ka telenbaga fɛlɛ.
Bayi wo mɔgɛnu be labanna jususa le tɔ.
38 Kɔnɔ junubutɔɛnu kan si halagi ɲɔgɔn fɛ.
Ko koron malanu la baŋɛ mu halage le la.
39 Telenbaganu lakisi koe be fatanna Alatala le la,
ale le mu anu makantalá la tɔɔrɛ wagate.
40 Alatala si anu dɛman a ni anu lakisi.
A ni anu latanga ko koron malanu ma, a ni anu lakisi,
bayi anu be tangare ɲinila ale Ala le la.