Ala, hinnɛ n na
25
Dauda tɛŋɛ.
Ee Alatala, n be n hakkile sɔren ile le ma.
2 N Marige Ala, n bata n yɛtɛ taaku i la;
i kana a to n ni malu.
I kana a to n jaguenu ni n majele.
3 Minnu bɛ be lannanteya sala i ma, wonu te maluya sɔtɔ.
Kɔnɔ minnu be janfa mala fufafu la, wonu ni maluya sɔtɔ a ɲinma la.
4 Alatala, n nalɔn i la kilanu la,
n nakaran n tagamanɲa la.
5 N natagaman i la tɔɲa kila tɔ,
i mɛn ni n madegen i la kila tagamanɲa la;
bayi ile le mu n nakisilá Ala la,
n na lannanteya be ile ma lun go lun.
6 Ee Alatala, i mira i la ɲinmaya nun i la fonisireya ma,
bayi anu be sabatiren bɔɔla hau.
7 I kana i mira n na kamarenya junubenu ma,
anun n ka i ladumɛn minnu la.
Ee Alatala, i la fonisireya kolo, ile kaɲin.
Awa, i kana ɲina n ma!
8 Alatala kaɲin, a telenta.
Wolo be a maren a be kila ɲinma yitala junubutɔɛnu la.
9 A mɛn be mɔgɔ majigireŋɛnu latagamanna teleŋɛ butɔ,
a ni anu madegen a la kila la.
10 Koe bɛ butɔ, Alatala be a la fonisireya nun a la teleŋɛ yitala mɔgɛnu le la,
minnu be a la lahire nun a la seedeɲɔgɔya mabanbanna.
11 Alatala, i tɔgɛ la ko la,
i ni n na junubenu kafari bayi anu ma dɔgɔ.
12 Mɔgɛ min be kilanna Alatala la,
Alatala si kila yita wo tigi la a bɛnta a ni tagaman min na.
13 Wo tigi yɛtɛ si sabati le hɛra butɔ,
a bɔnsɛ tugun si naa duge sɔtɔ kɛɛ la.
14 Alatala be a la mira gundo fɔla mɔgɔ le ye
minnu kilanta a la,
a be a la lahire yitala wonu la.
15 N ɲanu be sɔren Alatala la lun go lun,
bayi ale le be n natangala jaguenu la gbaloenu ma.
16 Ee Alatala i ɲamatelen n ma, i ni hinnɛ n na,
bayi n dɔrɔn de; n mu tɔɔrɔbaga le la.
17 Tɔɔrɛnu bata n juse lafa,
n bɔɔ n na wo ɲagankata tɔ.
18 I ɲa sɔ n na suunɛ nun n na ɲagankata la,
i ni diɲa n na junube bɛ ma.
19 I ni a fɛlɛ n jaguenu be siyaren ki min na,
anu be n kɔnden a koroŋɛ la.
20 N nɛ makanta i ni n natanga,
i kana a to n ni malu,
bayi n be tangare ɲinila ile le la.
21 Tɔɲa anun teleŋɛ ni n natanga,
bayi n be n na lannanteya saren ile le ma.
22 Ee Ala, i ni bani Isirayila kaanu kunka
ka anu bɔɔ anu la tɔɔrɛ bɛ tɔ.