Ala mataraŋɛ dɛmare la teleŋɛ butɔ
17
Dauda la Ala mataraŋɛ.
Ee Alatala, i ni n tarili kulɛ mɔɛ, bayi a be telenden.
I ni i tolomasɔ n na mamataraŋɛ la, min bele bɔɔren janfante da tɔ.
2 I yɛtɛ da ni n na kiite sa;
i ɲa sɔ n na teleŋɛ la.
3 I ka n juse fɛlɛ, i ka a butɔ koe lɔn sue tɔ, i ka n nakɔrɔsi,
i te fenfen taran ɲɔ.
N te sɔn kuma koroŋɛ ni bɔɔ n da tɔ.
4 Hali mɔgɛnu be ko siyama mala,
i da tɔ kuma be n dɛmanna.
N te funmantenu la kila jokki.
5 N kɛŋɛnu be sɔren i la kila le tɔ;
anu ma lamaga ma feu.
6 Ee Ala, n be i kelela, bayi ile le be n jaabila.
I tole ɲɛngɛn n mafanna, i ni n na kuma mɔɛ.
7 I ni hinnɛ n na a banba la,
ile min be mɔgɛnu lakisila anu jaguenu ma i sɛnbɛ la,
mɔgɛ minnu be tangare ɲinila i la.
8 I ni mɛnni n ma iko i ɲa kole;
i ni n dogon i gaba kɔtɔ.
9 Wolo si a ma, mɔgɔ koroŋɛ minnu be n namilinden,
anu be diren n nɛ bɔɔla, wonu te nɔ sɔtɔ n ma.
10 Anu bata anu jusu bɛlɛya;
anu da be wasu kumanu fɔla.
11 Anu ka n kɛnbaanu jokki, anu ɲan bata n namilin,
anu be wagate kɔnɔnden, ka n naboe duge tɔ.
12 Anu be toren iko jata min be diren fondo mafarala,
a nun jata deŋɛ min be dula dogondeŋɛ tɔ fondo bita koe la.
13 Alatala, yandi i ni wuli, i ni anu labɛn, i ni anu laboe.
I ni n nakisi ko koron malanu ma i la faŋɛ la.
14 Ee Alatala, n nakisi mɔgɛnu ma i sɛnbɛ la,
minnu be anu tɛŋɛ sɔtɔla kɛ dunuya pɛti.
I ni anu bue lafa ko bɛlɛŋɛnu la, wonu ni ma anu sɔŋɛ la i be min mandiren anu ye.
Anu la deŋɛnu tugun ni wasa wo sɔŋɛ la,
a tɔɛ ni to anu mamareŋɛnu ye.
15 Kɔnɔ nde kan si i ɲakɔtɔ yen de teleŋɛ sabu la.
N tini kunɛn tɛmuɛ min tɔ, n si wasa le i yen koe la.