Alatala la sali lɔgɛnu
23
Alatala kumata Musa ye a ko:
2 «A fɔ Isirayila kaanu ye n na sali lɔgɛnu le mu ka, minnu be kɛrɛkɛrɛren nde Alatala ye, wo be jama makelela wo ni madɛn minnu la.
3 Wo ni wali tele wɔɔrɔ, kɔnɔ tele wɔrɔwila luŋɛ bɛ mu sulen lɔgɛ le la, mamadɛŋɛ saniyandeŋɛ be mala min na. Wo kana wali yo ma wo luŋɛ tɔ. A mu nde Alatala le tɛŋɛ la. Wo ni wo sariya lakoti wo sabati dula bɛ tɔ.
4 Nde Alatala la sali lɔ́gɛ́ gbɛtɛnu le ka, a bɛ nun a kare nun a lɔgɛ kɔnte wo be jama kelela lun min na.»
Saya Maleka Tanbi sale
5 «San yo san, kari fɔlɛa tele tan nun naani, fitiri warawara, Saya Maleka Tanbi sale bɛnta a ni ma. Wo ni sarika bɔɔ nde Alatala ye.
6 Nde Alatala la Dɛgɛ Lɛbinibɔnɛ sale be fɔlɔla wo kare tele tan nun loolu luŋɛ le. Ka bɔɔ wo luŋɛ ma, wo ni dɛgɛ lɛbini bɔnɛnu le dɔmɔ han tele wɔrɔwila.
7 Wo ni mamadɛŋɛ saniyandeŋɛ ma wo sale tele fɔlɛ, wo kana wali yo ma wo lun.
8 Wo ni sarika bintannɛŋɛnu bɔɔ nde Alatala ye wo tele wɔrɔwila bɛ butɔ lun go lun. Tele wɔrɔwila luŋɛ, wo mɛn ni mamadɛn saniyandeŋɛ ma. Wo kana wali yo ma wo lun.»
Sugu kolo fɔlɛnu sale
9 Alatala kumata Musa ye, a ko:
10 «A fɔ Isirayila kaanu ye, wo tini ke duge tɔ n be min diila wo ma, ka wo nata naa sɛnɛ tɛgɛ, wo ni a kiti fɔlɛ doni sarika lakelá dula.
11 Sulen luŋɛ tanbi kɔma, sarika lakelá ni wo lindan nde Alatala ɲala, ka a kɛrɛkɛrɛ n ɲɛ, alako n ni a jigan wo ye.
12 Wo be wo kite yitala n na lun min na, wo mɛn ni saaka san dɔndɔ bɔɔ sarika bintannɛŋɛ la lanjuru yo bele min na.
13 Wo mɛn ni sugu kole munge boroŋɛ ɲa fila bɔɔ min be basanden tule fɛ. Wo be mala sarika le la nde Alatala ye min kuɲɛ di n ɲɛ. Wo mɛn ni beere litari dɔndɔ bɔɔ minfeŋɛ sarika la.
14 Wo tini min sɔtɔ sɛnɛ tɛgɛ tɛmuɛ, wo kana fenfen dɔmɔ, hali dɛgɛ nun tɔnsɔ bintandeŋɛ, anun kifen kole la, fɔ wo tini wo sarika bɔɔ nde wo Marige Ala ye. Sariya le wo la wo nun wo bɔnsɛ ye wo sabati dula bɛ tɔ, min te tiɲa abada.»
Sɛnɛ tɛgɛ sale banba
15 «Wo sulen lɔ́gɛ́ tanbi kɔma, bɔɔla wo be wo kiti fɔlɛnu bɔɔla sarika la lun min na, wo ni a kɔnti han lɔgɔkun wɔrɔwila ni tanbi.
16 Wo butɔ, wo ni a kɔnti han sulen lɔgɔ wɔrɔwila. Wo sulen lɔ́gɛ́ wɔrɔwilaɲɔgɛ tabantaka, tele bi loolu le wo la, wo lun wo mɛn ni sarika bɔɔ nde Alatala ye dɔmɔ nama la.
17 Sɛnɛ tige yo sɛnɛ tige ni sugu kolo munge jigan, boron ɲa fila, wo ni a basan lɛbinɛ fɛ, wo ni dɛgɛ fila ɲiɲa a la, jɔ wo ni a bintan. Wo ni anu nati wo fɛ bɔɔla wo bata, ka a dii nde Alatala ma. Sɛnɛtɔfeŋɛ den fɔlɛ sarika le wo la nde Alatala ye.
18 Wo mɛn ni saaka wɔrɔwila sa wo dɛgɛnu kunma, lanjuru bele minnu la, san dɔndɔ nɛŋɛnu. Anun tuura lanma dɔndɔ, anun saaka kontoŋɛ fila, wondelen be bɔɔla sarika bintannɛŋɛ la. Wo mɛn ni suge kole tugureŋɛ sarika sa a kunma. Wo mɛn ni beere jigan wo be naala min bɔnna minfeŋɛ sarika la. Wonu bɛ kuɲɛ di nde Alatala ye.
19 Wo mɛn ni sikule dɔndɔ bɔɔ junubu kafari sarika la, anun saaka kontoŋɛ fila san dɔndɔ nɛŋɛnu, wonu ni ma kanunteya sarika la.
20 Sarika lakelá ni wo bɛ lindan Alatala ɲala, anun wo dɛgɛ fɔlɛnu, anun wo saaka kontoŋɛ fila. Anu bɛ be diila Alatala le ma, jɔnɔn anu ni naa to sarika lakelá ye.
21 Wo ni mamadɛn saniyandeŋɛ ma wo lun. Wo kana wale hali dɔndɔ ma wo lun. Wo bɔnsɛnu be sabatiren kan do kan, a bata ma yamɔre la min te tiɲa abada.
22 Wo tini sɛnɛ tɛgɛ wo bata, wo kana a fɛfɛnu tɛgɛ de. Tɔnsɔɛnu minnu be boela duge tɔ, wo ni wonu to ɲɔ fondobɔnɛnu ye, anun luntaŋɛ minnu be wo bata. Nde le mu Alatala la, wo Marige Ala.»
Bina Fe sale
23 Alatala kumata Musa ye, a ko:
24 «A fɔ Isirayila kaanu ye, san yo san, kari wɔrɔwilaɲɔgɛ tele kelen, wo ni wo sulen, wo ni jama talɔn bina fe kulɛ la, wo ni naa mamadɛn saniyandeŋɛ ma.
25 Wo kana wali yo ma wo lun, wo ni sarika bintannɛŋɛnu bɔɔ nde Alatala ye.»
Jama bɛ Kunsara Luŋɛ
26 Alatala mɛn takumata Musa ye, a ko:
27 «Kari wɔrɔwilaɲɔgɛ tele tan luŋɛ, wo ni ma Kunsara Luŋɛ le la. Wo ni mamadɛn saniyandeŋɛ ma, wo ni sun wo lun, wo ni sarika bintannɛŋɛnu bɔɔ nde Alatala ye.
28 Wo kana wali yo ma wo lun, bayi Jama bɛ Kunsara Luŋɛ le mu, wo be kunsarala Alatala ɲala le, wo Marige Ala.
29 Kɔnɔ ka mɔgɔ min ma sɔn sunna wo lun, wo tigi si labɔɔ le a la jama ɲaama.
30 Mɔgɔ min yo be walila wo lun, n si wo tigi la ko tiɲa le a la jama tɛma.
31 Wo kana wale hali dɔndɔ ma wo lun. Wo be sabatiren kan do kan, sariya le mu wo la wo bɔnsɛ bɛ ye min te tiɲa abada.
32 Wo be mala sulen lɔ́gɛ́ yati le la wo ye. Wo ni sun wo kare tele kɔnɔntɔ luŋɛ fitiri warawara han a tele tan luŋɛ fitiri warawara.»
Bagenu Sɔ sale
33 Alatala kumata Musa ye, a ko:
34 «A fɔ Isirayila kaanu ye, kari wɔrɔwilaɲɔgɛ tele tan nun loolu, Bagenu Sɔ sale be fɔlɔla nde Alatala la biliya butɔ, han tele wɔrɔwila.
35 Wo sale tele fɔlɛ, mamadɛn saniyandeŋɛ le be mala. Wo kana wali yo ma wo lun.
36 Wo ni sarika bintannɛŋɛnu bɔɔ nde Alatala ye tele wɔrɔwila butɔ lun go lun. A tele sagin luŋɛ wo mɛn ni mamadɛn saniyandeŋɛ ma. Wo ni sarika bintannɛŋɛnu bɔɔ nde Alatala ye, wo kana wale hali dɔndɔ ma wo lun, wo sale lɔgɔ tɔɛ mu muradi belebele le la.»
37 «Awa, nde Alatala la sali lɔgɔ banbanu le mu wo la wo ye. Sarika bintannɛŋɛnu yo, sugu kole sarikanu yo, anun minfeŋɛ sarikanu yo, sali yo sali wo ni anu bɔɔ anu bɔɔ tɛmuɛ ma;
38 sa Alatala la sulen lɔ́gɛ́ kunma, anun wo la kanunteya sarikanu nun wo la lahire sarikanu, anun wo la hanige ma sarikanu wo be kɛnɛ minnu diila nde Alatala ma.
39 Wo kari wɔrɔwilaɲɔgɛ tele tan nun loolu luŋɛb, wo tini ban wolofeŋɛnu madɛnna sɛnɛ tɔ, wo ni sale ma nde Alatala ye tele wɔrɔwila kɔtɔ. Tele fɔlɛ nun a tele sagin luŋɛ be mala sulen lɔgɛnu le la.
40 Sale tele fɔlɔ luŋɛ wo ni den ɲinmanu bɔɔ wolofeŋɛnu kanna, anun tugu pɛnsɛnu, anun lɔgɔ ɲinma donu boliŋɛnu, anun kɔɔ dala lɔgɛ nɛŋɛnu, wo ni anu sɔ bagenu la. Wo ni sɛɛwa nde wo Marige Alatala ɲala tele wɔrɔwila kɔtɔ.
41 Wo ni kɛ sale ma nde Alatala ye san yo san tele wɔrɔwila butɔ. Sariya le mu wo la wo bɔnsɛ bɛ ye min te tiɲa abada. San yo san kari wɔrɔwilaɲɔgɛ butɔ, wo ni wo sale ma.
42 Wo ni to bagenu butɔ wo tele wɔrɔwila kɔtɔ. Isirayila sɔtɔ deŋɛnu bɛ ni to bagenu butɔ,
43 alako wo bɔnsɛnu ni a lɔn, n ka wo benbanu to le tantanu kɔtɔ n to ka anu labɔɔ Misira duge tɔ. Nde le mu Alatala la wo Marige Ala.»
44 Alatala kulɛ le wo la, Musa ka min natanbi Isirayila kaanu ma.