Kusa nun muse la kari wale la ko
15
Alatala kumata Musa nun Harona ye, a ko:
2 «Wo ni a fɔ Isirayila kaanu ye, kayi kusatɔɛ bɛ be maren mɔgɔ saniyanbale le la.
3 Kusatɔɛ bata ma mɔgɔ saniyanbale la, kusa min be je labɔɔla mɔgɛ bale ma, anun min be mɔgɛ ladanbɛla.
4 Kusatɔɛ be sala benbe min bɛ tɔ, a be sigila fenfen min tɔ, wo bɛ mu fondo saniyanbale le la.
5 Min tini maga a la benbe la, wo tigi ni a la kutanu ko, a ni a yɛtɛ ko je la. A ni ma mɔgɔ saniyanbale la han wura la.
6 Min tini sigi a la sigifeŋɛ tɔ, wo tigi ni a la kutanu ko, a ni a yɛtɛ ko je la. A ni ma mɔgɔ saniyanbale la han wura la.
7 Min yo magata wo kusatɔɛ bale la, wo tigi ni a la kutanu ko, a ni a yɛtɛ ko je la. A ni ma mɔgɔ saniyanbale la han wura la.
8 Ka kusa be min na a ka daje tutɛ mɔgɔ saniyandeŋɛ do ma, wo tigi ni a la kutanu ko, a ni a yɛtɛ ko. A ni ma mɔgɔ saniyanbale la han wura la.
9 Sigifeŋɛ min be sala soee ma, ka wo ma ɲɔgɔmɛ ma, ka kusatɔɛ sigita wo tɔ a si ma le fondo saniyanbale la.
10 Min yo magata fenfen na, kusatɔɛ bata sigi min kunma, wo tigi bata ma mɔgɔ saniyanbale la han wura la. Ka min ka wo fondo doni a fɛ, wo tigi ni a la kutanu ko, a ni a yɛtɛ ko, a bata ma mɔgɔ saniyanbale la han wura la.
11 Kusatɔɛ bolo saniyanbale magata mɔgɛ min na, wo tigi ni a la kutanu ko, a ni a yɛtɛ ko je la. A bata ma mɔgɔ saniyanbale la han wura la.
12 Kusatɔɛ tini maga lɔndɛ min na, a bɛnta wo ni te. Ka walifeŋɛ lɔgɔnɛŋɛ le, a bɛnta a ni ko je la.
13 Kusatɔɛ tini kendeya, a si a to le han tele wɔrɔwila jɔnɔn a ni ma mɔgɔ saniyandeŋɛ la. Wo lun, a ni a la kutanu ko, a ni a yɛtɛ ko tenge tɔ je la. A be saniyanna ɲɔgɔnna le.
14 A tele sagin luŋɛ, a ni gabu fila jigan, ka wo ma legetere deŋɛ fila, a ni taga anu don sarika lakelá bolo nde Alatala ɲala hɔrɔma dingira dondula tɔ.
15 Sarika lakelá ni dɔndɛ bɔɔ junubu kafari sarika la, doe sarika bintannɛŋɛ. Wo butɔ, sarika lakelá ni a kunsara a la bandiya la ko la nde Alatala ɲala.
16 Ka kaye min na manije sutu a la, a bɛnta a ni a bale bɛ ko. A si ma mɔgɔ saniyanbale la han wura la.
17 Manije magata kuta nun bolé min bɛ la, a bɛnta anu ni ko je la, wonu tugun ni ma saniyanbale la han wura la.
18 Ka muse nun kaye kafuta saɲɔgɔya butɔ, a bɛnta anu ni anu bale ko. Anu si ma saniyanbale la han wura la.
19 Kari yo kari, ka muse be a la kari wale tɔ tele wɔrɔwila butɔ, base be bɔɔla a ma, a be mala mɔgɔ saniyanbale le la. Min tini maga a la, wo tugun be mala le mɔgɔ saniyanbale la han wura la.
20 Muse min be a la kari wale tɔ, a be sala benbe min bɛ tɔ, fondo saniyanbale le mu a la. A sigita fenfen min tɔ, wo tugun mu fondo saniyanbale le la.
21 Min yo magata a la benbe la, wo tigi ni a la kutanu ko, a ni a yɛtɛ ko je la. A ni ma mɔgɔ saniyanbale la han wura la.
22 Min yo magata a la fondo la a be sigila min tɔ, wo tigi ni a la kutanu ko, a ni a yɛtɛ ko je la. A ni ma mɔgɔ saniyanbale la han wura la.
23 Ka fondo be saren wo benbe tɔ, ka wo ma a sigifeŋɛ do tɔ, min magata wo fondo la, a si ma le mɔgɔ saniyanbale la han wura la.
24 Ka kaye nɔn tagata kafu wo muse fɛ, a la kari wale base sata a bale ma, wo tigi tugun si ma le mɔgɔ saniyanbale la han tele wɔrɔwila. A sata benbe min yo tɔ, wo tugun si ma le fondo saniyanbale la.
25 Ka base tota bɔɔla muse ma tele siyama, base min bele maren a la kari wale base la, ka wo ma a la kari wale bata yanfaya, a be mala mɔgɔ saniyanbale le la iko muse min be a la kari wale tɔ.
26 A tini sa benbe min tɔ, ka wo ma a sigita fenfen min tɔ, wo bɛ si ma le fondo saniyanbale la iko a la kari wali tɛmuɛ.
27 Min tini maga wonu la, a ni a la kutanu ko, a ni a bale ko je la. A ni ma mɔgɔ saniyanbale la han wura la.
28 Base tini dan, wo muse ni a to han tele wɔrɔwila, wo kɔma a ni saniyan.
29 A tele sagin luŋɛ, a ni gabu fila jigan, ka wo ma legetere deŋɛ fila, a ni anu doni sarika lakelá dula hɔrɔma dingira dondula tɔ.
30 Sarika lakelá ni dɔndɛ bɔɔ junubu kafari sarika la, doe sarika bintannɛŋɛ. Sarika lakelá ni kunsara sarika bɔɔ wo muse ye, nde Alatala ɲala basi bɔɛ la ko la min be a maren nun saniyanbale la.
31 Awa, Musa nun Harona, wo ni a fɔ Isirayila kaanu ye anu ni anu matuntun n na hɔrɔma dingira la ka anu be saniyanbaliya tɔ wagate min tɔ, bayi ka wo ma, ka anu ka anu madon n na hɔrɔma boŋɛ la min be wo tɛma, anu si faga le.