Luk 24

Bhe áángelú kɔ́dhyá ándrɔ́ kála bhó Yésu aángorú átonzi

(Mat. 28.1-10; Mákɔ 16.1-8; Yɔá. 20.1-10)

1 Áteyenga ándrebhúlobhúkpɔ ɛ́pwʉ́ɨ́, bhe ándrɔ́ kɛ́ɨ́ngá nɛ́ɨ́zɔ i kɛ́ɨ́mbɛ́mbɛ́bwʉ nɛ́, bhe kɔ́á ú átemugéluapɛ. 2 Bhe káábá bhó káángoóbhungulu bhó nóópí i kátɔ́bwʉ nɔ́ némugéluápɛ ándrɛŋɔ nɛ́ bha átabɛ́. 3 Hee bhe kékía nyɛ, nɔ́dhyɔkana, kabwʉ káámbwu bhó nɛ́Ɨ́nyɨ́ Yésu ándrabwu. 4 A drʉ ándrɔ́ hɛ́ ányaámbáámbá adʉ́a nɛ́, bhe ɛ́masí sóórúé si ká hɛ́ kɔ́ndrá ógí si ká hɛ́ kándia mándi ɛ́nyɛnyɛnyɛ nɛ́, kásá kɔ́tɔ épipi ! 5 Bhe nɛ́ɛrʉ agbá hɛ, bhe kɛ́ɨ́ryá ányɛŋɔ, ɛ́masí hɛ́ kɔ́dhya kála bhó « Oudhu gyó i nya ú mʉnda to nómbí ɔrɔ́ átéígo i ómbi amónzi anyɛ nɛ́ ? 6 Ka ɨ bhó ɨ nɛ zá átemugéluapɛ i, nɔ́dhyɔkana, ɨ́n'aángorú átonzi. Anyáambá sɨ́ ɔdhyɔ́bwʉ nyala átadhɨnga i abwʉ ká ɨ ká pá nyáá ú áteGaliláya nɛ́. 7 Ɔdhyɔ́bwʉ nyala bhó ‹ Onía bhó ɨ́má nɛ́Ngwángwɛ i nÓmbí bha nɛ́ kóo ma átɛ́másúmúi ányɛtɛ́ bhe kɔ́gbʉ́a ma átekurúsi, bhe átekini ámɛ́sɔ́tá, bhe márua átonzi. › »

8 Hee bhe ándrɔ́ hɛ́ káámbá táo ɛ́tʉ si Yésu abɔdhyɔ nɛ́, 9 bhe kɛ́kʉ́a égye átemugéluapɛ, bhe kɔ́á bhe kángodrwe ɔ́dhyɔ́ hɛ́ ndúbhu, ɔ́dhádhái tɛ́ɛ́vhɛ́ négí kana bhu óudrwaamɨ akʉ́ɛ́ ndúbhu kála. 10 Ɨ́n'abwʉ Marɨ́a i nɛ́Magadála andrɛ, Záni bhu táo Marɨ́a, Yakóbho yánɛ́, bhu ándrɔ́ akʉ́ɛ́ si kɔ́ɔ́bwʉ kɔ́rɔ átɛ́mápuekana nɛ́. Bhe ándrɔ́ akʉ́ɛ́ hɛ́ kódrwá ká bhu hɛ ɔ́dhyɔ́ hɛ́ ɔ́dhádhái kála sɨ́ɨ́sɔ́. 11 Bhe ɔ́dhádhái hɛ́ káámbá nyáá nányɛ bhó ɔ́dhyɔ́ si ándrɔ́ hɛ́ kódrwebwʉ kála nɛ́, kábwʉ ábɨ́bɨ́ tʉ, bhe kabwʉ kápí hɛ. 12 Bhe Pɛ́tɛrɔ ɛngá, bh'ohía átɛngɔ bha ú átemugéluapɛ, bh'oópúa, bh'ɛɨ́ryá ndrɛ, bh'ogwá bhó sɨ́ ɛ́málɨ́kání aapɛ́mbɛ́lɛ́ ápye. Átámɛ́zaa, bh'aátúa ndrɛ ú bhándrɛ a n'ambanga mámbanga gbagba i sɔ́ ɨ́ nɛ́, átɔdhyɔ i aángɛsɨ́ ndrɛ nɛ́.

Bhe Yésu asá épipi átoudrwaamɨ sóórúé si kabwʉ ú kábɔɔ ú átɛƐmaúsi nɛ́

(Mákɔ 16.12-13)

13 Sɨ́ átɛtɨánɛ nɛ́ kana nɛ́ nɛ́, bhe óudrwaamɨ sóórúé átoudrwaamɨ si Yésu bha nɛ́, kábwʉ ká hɛ́ kɔ́a ú átɛ́bhámoóyé kana i ánɛrʉ bhó nɛ́Ɛmaúsi nɛ́, néi abwʉ a n'ɔnda mɔ́nda ékilomɛ́tɛrɛ tɛ́ɛ́vhɛ́ négí kana bha ú áteYerusalɛ́mɛ nɛ́. 14 Bhe kábwʉ ká hɛ́ kɔ́dhya átɔ́dhyɔ́ ndúbhu si káábafo nɛ́ ányɔdhyɔ nɛ́. 15 Átadhɨnga i kábwʉ ɨ ká sɨ́ hɛ́ kɔ́dhya, ká hɛ́ kéíbua ɔ́dhyɔ́ nɛ́, bhe Yésu tɔ́kpɛ esyá hɛ, bh'aámbá bhó kɔ́rɔ nyáá néhíɛ kana. 16 Kábwʉ ká hɛ́ kógwá nɛ mógwo nɛ́, bhe nédhu kana abwʉ a n'atá ányɛŋɔ bhó káángɛɨ́tɨ́ nɛ bhelé nɛ́. 17 Yésu ɔɨa hɛ bhó « Meísi bhándrá nɛ́, asɔdhyɔ́ gyó hɛ́ nya ú nyoólia to nya hɛ́ nyeíbua to ɔ́dhyɔ́ átéhíɛ sɔ́ drʉ nɛ́ nɛ́ ? » Hee bhe kápá nyɛ ánɔdɔ ro. 18 Bhe nóudrwaamɨ kana kɔ́tɔ, ánɛrʉ bhó Klɛɔpásɨ nɛ́, ɔdhya nɔ́ɔ bhó « Kábhá, a sɨ́ ɨ́mɨ́ ápye kana átombi si kódría ú áteYerusalɛ́mɛ nɛ́ i ka nɛ́ɨ́tɨ ɔ́dhyɔ́ si káábáfo nyɛ átékíní si nɛ́ ? » 19 Yésu ɔɨa hɛ bhó « Asɔdhyɔ gyó ? » Káátua nɔ́ɔ bhó « Nɔ́dhyɔ i oópúbá ndrɛ Yésu i nɛ́Náázarɛ́tɛ andrɛ to nɛ́ ! Ɨ́n'abá nénébi kpákpárá, bh'aádhɔ́bá ndrɛ átɔ́dhyɔ́ ndúbhu si abɛ́sɨ́ nɛ́, bhu átési abɔ́dhyɔ nɛ́, áteetu i Angéle bha nɛ́ bhu áteetu i ómbi ndúbhu anyɛ nɛ́. 20 Bhe ɛ́kɔána kpɔ́kpɔ́ ánoúgé si bháɛ́ nɛ́ kóá nɛ́ Piláto ko bhó nófo ándrɛngbanga, bhó bhe kɔ́gbʉ́a nɛ átekurúsi bhó nónzí. 21 Bhe aama, mabóngo ɛ ndó ɨ́n'a nɛ nómbí i Angéle ɛdá nɛ bhó ku nɛ́ɨ́ra éÍsraɛ́lɛ gyándrɛ́ áteetií ányɛtɛ́ nɛ́. Nɔ́dhyɔkana, ma bhó átekini ámɛ́sɔ́tá sɨ́ ɔ́dhyɔ́ hɛ́ ndúbhu nɛ́ nɛ́ káfobá. 22 Bhe nzúdhá, ándrɔ́ akʉ́ɛ́ áteikudhumʉ i bháɛ́ nɛ́, kánga sɨ́ káángɔvhá áakɨra ! Kórúnga átébhúlobhúkpɔ ɛ́pwʉ́ɨ́ bhe kɔ́ɔ́nga ú átemugéluapɛ, 23 bhe kanga káábɛ bhó Yésu ándrabwu. Bhe kɛ́kʉ́nga bhó ku nyodrwé mala bhó áángelú kánga káángasá ká bhu hɛ kɔ́tɔ épipi, bhe kɔ́dhyá kála bhó Yésu ɨ́n'a ɔrɔ́. 24 Bhe ómbi akʉ́ɛ́ aamɔɔ́tɔ kɔ́ɔ́nga ká bhu hɛ ú átemugéluapɛ, bhe káámbwunga ɔ́dhyɔ́ ndúbhu sɨ́ɨ́sɔ́ ándrɔ́ hɛ́ kɔ́dhyɔ́nga, bhe kanga kógwó ká bhu hɛ nɛ. » 25 Bhe Yésu ɔdhyá kála bhó « Akiabɨbɨ gwa, ɨ́n'a nyala ámɛ́kpákpáálá bhó anyápí bhó ɔ́dhyɔ́ ndúbhu si énébi kɔ́dhyɔ́bwʉ nɛ́ bhó ká nzúdhá ! 26 Kabá náátɛ bhó Masɨ́ya nɔ́gá nɛ́ɛ́ndrɨɛɛ́ndrɨ́ sɔ́ drʉ, ɨ́sɛ́ɛ́lɛ́ i bhó nékí ndrɛ átékémbó i bhándrɛ nɛ́ nɛ́ ? » 27 Hee bh'abɨ́ngyá táo kála ɔ́dhyɔ́ si nébúku i Angéle bha nɛ́ ɔdhyá tándrɔdhyɔ nɛ́, ɔtʉ́a ndrɛ sɨ́ átebukú si Mʉ́sɛ bha nɛ́ tó bha átési énébi ndúbhu anyɛ nɛ́.

28 A drʉ kɔ́dhya bhó nyoópu átɛ́bhámoóyé i kábwʉ ú abɔɔ to nɛ́, bhe Yésu ɛsɨ́a únga ká sɨ́ a ú ɔa nándrɛ ámɛ́ndrɔ́ndrɔ́. 29 Hee bhe kémá nɛ, kɔ́dhya nɔ́ɔ bhó « He nɛ́nɛ́ nóúgé, kédho bhó aamɔɔ́rɔ nyáá ápye drɨ́, outo nɛ́, sɨ́ náabhó a bhó nɛ nɛ i, bhe nékini a bhó ú onua bhó. » Hee bh'ekía ndrɛ kɔ́rɔ ú gyɔ́tɔ bhó ku ndrodrí kɔ́rɔ. 30 Hee bh'oópúa ndrɛ átadhɨnga i Yésu a ú aágá ɨ kɔ́rɔ átamísá nɛ́, bh'ɛɨ́ngá nɛ́mápa, bh'ɔʉbwá Angéle. Bh'oukía, bh'aáá kála. 31 A drʉ ɛsɨ́a sɔ́ nɛ́, bhe ányɛŋɔ kápúa bhe kɛ́ɨ́tɨ́a táo nɛ, nɔ́dhyɔkana, bh'egyá nyɔɨ nyáá drʉ ɛ́papai ! 32 Bhe káádhyá tányɛrɨ́ bhó « Aéisu ká kanga bha ká hɛ́ kóbwua móbwu ánɛɨgyagya ro átadhɨnga i anga ɨ ú angɔdhyɔ ɨ mala átéhíe, a n'abɨngya mala nébúku i Angéle bha nɛ́ nɛ́ ? » 33 Bhe kɔ́ɔ́sá sɨ́ nɛ́ngɛ́nga drʉ, bhe káátúa nyɛ ú áteYerusalɛ́mɛ. Átadhɨnga i kóópúa ɨ égye nɛ́, bhe káámbwúa ɔ́dhádhái tɛ́ɛ́vhɛ́ négí kana, ánombi akʉ́ɛ́ si káboóli kɔ́rɔ nɛ́, ká hɛ́ káápía nyɛ átɛ́mápue kana nɛ́, 34 ká hɛ́ kɔ́dhya bhó « Nɛ́Ɨ́nyɨ́ aángorú nzúdhá átonzi ! Simɔ́na anga sɨ́ aángogwo nɛ mógwo ! » 35 Bhe óudrwaamɨ hɛ́ sóórúé nɛ́nɛ́ nɔgɔ tɔ́kpɛ, bhe kódrwá kála ɔ́dhyɔ́ ndúbhu si káfonga kɔ́tɔ átéhíɛ ndré bha ú átɛƐmaúsi nɛ́, bhu sɨ́ nyɛɨ́tɨ́nga Yésu átadhɨnga i oukínga ɨ to hɛ átɛ́mápa nɛ́.

Bhe Yésu asá átoudrwaamɨ si bhándrɛ nɛ́

(Mat. 28.16-20; Mákɔ 16.14-18; Yɔá. 20.19-23; Émólóbi 1.6-8)

36 Óudrwaamɨ hɛ́ sóórúé nɛ́nɛ́ ká sɨ́ hɛ́ kódrwá ɔ́dhyɔ́ si káfobwʉ kɔ́tɔ nɛ́, bhe Yésu asá kɔ́tɔ épipi ! Ɔdhya kála bhó « Nɔ́dhyɔ kpílíbhíndí nóbhú aanyɔɔ́rɔ ! » 37 Bhe nɛ́ɛrʉ agbá hɛ ámámbámbó, outo nɛ́, sɨ́ kábongo nyɛ bhó nyaángogwo nɔ́pɛ́. 38 Yésu ɔdhya kála bhó « Nya ú nyɛɛ́rʉa oudhu ? Oudhu gyó i nya ú nyeíbua to ɔ́dhyɔ́ akíóteisu nɛ́ ? 39 Amúgwó anátɛ́ bhu anɔ́ɔnzɔ,^a ɨ́n'a sɨ́ ɨ́má tɔ́kpɛ ! Anyágbagba ma bhe mugwa ma mɔmbɛ́, outo nɛ́, sɨ́ nɔ́pɛ́ ka ɨ nɔ́rɔ eépí bhe ka ɨ nɔ́rɔ kpɔ, sɨ́ɨ́sɔ́ nya ú mugwa ma drɨ́ má nɛ́ nɔ́ nɛ́. » 40 A sɨ́ n'ɔdhya kála sɔ́ nɛ́, bh'eíhwá kála ánɛtɛ́ bhu ánɔɔnzɔ. 41 Óudrwaamɨ kábwʉ ánɛɨgyagya ootu bhe kábwʉ ká hɛ́ kámbanga mámbanga nɛ́, bha drɨ́ kábwʉ ká ɨ kápí ká pá. Yésu ɔɨa hɛ bhó « Ka ɨ aanyɔɔ́rɔ dhúngwɛ amɔ́nyɔ drɨ́ ? » 42 Bhe kááá nɔ́ɔ nɛ́ngɛrɛ eíngílí amébhí. 43 Bh'agbá, bh'ɔnyá áteetu i bhányɛ nɛ́. 44 Átámɛ́zaa, ɔdhya kála bhó « Hee amúgwó ká kiro ɛ́tʉ si mádhyɔ́bá nyala átadhɨnga i mábá ɨ aanyɔɔ́rɔ pá nyáá nɛ́ : Onía bhó ɔ́dhyɔ́ ndúbhu si ká ú kɔ́há nyɛ andrɔ́tɔdhyɔ átƆʉbwɔ i Mʉ́sɛ bha nɛ́ nɛ́, bhu átebukú si énébi anyɛ bhu átɛBasaúma nɛ́ kɛ́sɨ́ nyɛ pɨ́tɛ́ ! »

45 Hee bh'apúa kála ányakɨra bhó kɔ́tɨ to ɔ́dhyɔ́ si nébúku i Angéle bha nɛ́ ɔdhyá nɛ́. 46 Bh'ɔdhyá kála tɔkana bhó « Sɨ́ɨ́sɔ́ nébúku i Angéle bha nɛ́ a ú ɔdhyá : Onía bhó Masɨ́ya nɔ́gá nɛ́ɛ́ndrɨɛɛ́ndrɨ́ bh'onzía. Bhe átekini ámɛ́sɔ́tá, bh'orua átonzi. 47 Bh'onía bhó kágyó pɨ́tɛ́ ánɛrʉ ómbi si ápɛ́gɔ ndúbhu anyɛ nɛ́ kála, ɔtʉ́a ndrɛ sɨ́ ú áteYerusalɛ́mɛ, bhó ómbi ndúbhu kéevhíngílía ányeisu, bhó be Angéle néégi hɛ pá átɛmasúmu si bhányɛ nɛ́. 48 Nya aamɨ ódrwéí si ɔ́dhyɔ́ si mugwá bhe mʉgá nɛ́ anyɛ. 49 Bhe ɨ́má, mɛ́dhaba aanyɔɔ́tɔ mɛ́dha nÓudhuudhu Sáátu i Páápa ɔdhyɔ́bwʉ ándrɔdhyɔ nɛ́. Nɔ́dhyɔkana, aamɨ, amúdrí ká pá sɨ́ drɨ́ áteYerusalɛ́mɛ drɨ́ tó bha drɨ́ nɛ́kpakpárá i a n'ɛngá ú Angéle a ɨ nɛ́ ɛɨ́nʉa ɨ aamɨ ! »

Bhe Yésu aándría ndrɛ bha ú átɔrɔ

(Mákɔ 16.19-20; Émólóbi 1.9-11)

50 Átámɛ́zaa, bhe Yésu ɛzá kɔ́rɔ átɛ́gbɔ́tɔ́ ándrɛhɔ, bh'oótúa ndrɛ kɔ́rɔ bha ú átɛBɛtanɨ́a. Égye, bh'aandría ánɛtɛ́, bh'ɛtʉ́a kɔ́tɔ nóumbwu. 51 A sɨ́ nɛ́ ɛtʉ́a kɔ́tɔ nóumbwu nɛ́, bh'aándía kɔ́rɔ, bh'aandría ndrɛ bha ú átɔrɔ. 52 Bhe ɨ́hɛ, bhe kɛ́ɛ́drwá nɛ, bhe káátúa nyɛ bha ú áteYerusalɛ́mɛ, ká hɛ́ kɛ́ɨ́nʉ́a ɛɨ́nʉ ánɛɨgyagya ro nɛ́. 53 Bhe kábɛzá ka bhó ú átɛ́bálá i náángélégyó kpɔkpɔ andrɛ, ká hɛ́ kɔ́ʉ́bwʉ́a Angéle ádhɨ́ngɔ́mɛ kpɛ́ nɛ́.