Luk 23

Yésu áteetu i Piláto bha nɛ́

(Mat. 27.1-2,11-14; Mákɔ 15.1-5; Yɔá. 18.28-38)

1 Átɛzaa i néBula kpɔkpɔ ɔʉ́ɨ́a ɨ to nɛ nɛ́, bhe ébúlái ndúbhu kɛ́ngá, bhe kɛ́mbá Yésu áteetu i Piláto bha nɛ́. 2 Hee bhe kɔ́tʉ́a ká hɛ́ kóúwa nɛ nɛ́ bhó « Maámbwʉbá náasí i a n'aádá ómbi si nɛ́bha i bháɛ́ nɛ́ anyɛ ányedrú nɛ́. Abá a n'ɔdhya bhó káángogé bhelé Kaisára ko nɛ́páko nɛ́. Bh'abá ú abɔ́dhyɔ ká bhu bhó ɨ́nɛ, bhó ndra Masɨ́ya, nɛ́ɨ́nyɨ́. » 3 Piláto ɔɨa nɛ bhó « Mbáe, nyá mɨ́ nɛ́ɨ́nyɨ́ i éMoyúda anyɛ ? » Bhe Yésu akɛ́lyá nɔ́ɔ bhó « Mɨ́ɨ́ngɔdhyɔ́ bhó sɨ́ mɨ́. » 4 Piláto ɔdhya ɛ́kɔána kpɔ́kpɔ́ kála bhu táo ómbiiro si kábwʉ drʉ nɛ́ kála bhó « Ka mágwó ma nándrá ɔdhyɔ biti kana gyó i náasí ɛsɨ́a, aátá sɨ́ máfo to ándrɛngbanga nɛ́ ! » 5 Bhe ómbi hɛ́ kɔ́dhyá bhó Piláto ko, néi ɛ́ŋɔ nzɛnzɛrɛ anyɛ bhó « A ú ɛɨ́pwa bhó ómbi ányedrú káadá aádá ánaádhɔ́ i bhándrɛ nɛ́ ! Ɔtʉbwʉ sɨ́ ú átɛGaliláya, bh'aáfófá áteYudáya ándrɛhɔ ndúbhu, bhe gaa ɨ́ drɨ́, a bhó i aángoópú bhó drɨ́ áteYerusalɛ́mɛ i nɛ́ ! » 6 A drʉ Piláto ɔgá sɔ́ nɛ́, ɔɨa bhó « Náasí i ɨ́n'a nómbí i nɛ́Galiláya andrɛ ? » 7 Átadhɨnga i kákɛ́lyá ɨ nɔ́ɔ bhó Yésu ɨ́n'a ɛngá átɛ́bhágɔ́ i Ɛrɔ́dɛ a ú ɔnyá to nɛ́, bhe Piláto ɛɨ́pá Yésu Ɛrɔ́dɛ ko, sɨ́ ɨ́n'abwʉ ú áteYerusalɛ́mɛ átékíní hɛ́.

Yésu áteetu i Ɛrɔ́dɛ Atipásɨ bha nɛ́

8 A drʉ Ɛrɔ́dɛ ogwá Yésu nɛ́, bh'ɔgá nɛ́ɨgyagya ootu. Outo nɛ́, sɨ́ abwʉ ú abɔnda bhó nyaasú bha nɛ, outo nɛ́, sɨ́ abwʉ aángɔga Yésu ándrɔdhyɔ, sɨ́ látá abwʉ, abwʉ ú abɔnda mɔ́nda bhó ndrogwó ká nɛ a n'ɛsɨ́a ká ngwɛ́ nɔ́dhyɔ amámbanga kana nɛ́. 9 Hee bh'ɔʉ́ɨ́a Yésu átɔ́dhyɔ́ ootu ootu, nɔ́dhyɔkana, Yésu ka nákɛlya nɔ́ɔ tʉ́ kana. 10 Ɛ́kɔána kpɔ́kpɔ́ ánaadhaadhɔí si nƆ́ʉbwɔ anɛ kábwʉ drʉ ká hɛ́ kóúwa nɛ oúwo ámámbámbó gbagba i sɔ́ ɨ́ nɛ́. 11 Bhe Ɛrɔ́dɛ ánɛsʉdhá si bhándrɛ nɛ́ kéínvá Yésu, bhe kɛ́sɨ́a nɛ únga ká sɨ́ nómbí tápu. Bhe kɛ́ɨndrá nɛ nógi balí, bhe káátúa nɛ Piláto ko. ^a 12 Átɛtɨánɛ nɛ́, bhe Piláto hɛ bhu Ɛrɔ́dɛ kótía nándragɔ, ɨ́hɛ si kabaagá ka nyɛ ɨ́sɛ́ɛ́lɛ́ nɛ́.

Bhe kófá Yésu ándrɛngbanga bhó nónzí

(Mat. 27.15-26; Mákɔ 15.6-15; Yɔá. 18.39--19.16)

13 Hee bhe Piláto ongá ɛ́kɔána kpɔ́kpɔ́ ánoúgé si éMoyúda anyɛ, ánombi ndúbhu kɔ́rɔ, 14 ɔdhya kála bhó « Nyɛmbánga mʉ́ náasí i bhó ɨ́n'a ú aádá ómbi ányedrú. Bhe ɨ́má máángɔʉ́ɨ́ nɛ akíóteetu átɔ́dhyɔ́ ndúbhu si nyoúwá to nɛ nɛ́, bhe ka mágwó má nándrá ɔdhyɔ biti kana gyó i náasí ɛsɨ́a, aátá sɨ́ máfo to ándrɛngbanga nɛ́. 15 Bɛsɨ́ngi obhúa ká Ɛrɔ́dɛ, kanga nógwó ká bhu nɛ ɔdhyɔ biti gyó i aátɛ́nga sɨ́ nófo to ándrɛngbanga nɛ́, sɨ́ aángaátu nɛ mala. A ú ogwá ndrɛ ngbádhá bhó náasí i ka nɔ́tʉ́ ngbanga i a n'aátá ndrɛ bhó kɔ́pwʉ to nɛ nɛ́. 16 Hee má ú mápya nɛ éfimbó kpanga, bhe méísya táo nɛ. » [ 17 Átáádhú kána-káná si nɛ́Pásɨka anɛ, Piláto abeísya kála eísya nɛ́kambombíé Moyúda kana.]

18 Hee bhe ómbi ndúbhu kérímá ká hɛ́ kópa kpárá ɔ́mápuekana nɛ́ bhó « Kʉpwʉ náasí i bhe nyéísya mala Barába ! » 19 Kódhíbwʉ Barába ú átɔ́gbʉ́gyó átɔdhyɔ i ɛsɨ́bwʉ ndrɛ ú átɛ́gbɔ́tɔ́ nɛ́, néi ómbi kɛ́índrébwʉ to nyɛ ka nɛ́ ka kɛ́ɛ́rʉ bhó ɛ́ɨnyɨ nɛ́, bhu átómbí i kɔ́pwʉ́bwʉ nɛ́ ándrɔdhyɔ. 20 Sɨ́ Piláto abwʉ ú abɔnda bhó ndreísya Yésu nɛ́, bh'aadrwá kála tɔkana ándrɛtʉ́. 21 Bhe kágyá nɔ́ɔ tɔkana bhó « Kʉ́gbú nɛ átekurúsi ! Kʉgbʉ́ nɛ átekurúsi ! » 22 Bhe Piláto ɔdhyá kála ámémiri ámɛ́sɔ́tá bhó « Náasí i ɔtʉ́a asɔdhyɔ gyó ? Ka mágwó má nɔ́rɔ nándrá ɔdhyɔ biti gyó i aátá to sɨ́ nónzí nɛ́. Hee má ú mápya nɛ éfimbó kpanga, bhe méísya táo nɛ. » 23 Hee bhe kérímá ká hɛ́ kágyá tɔkana kpárá nɛ́, ká hɛ́ káádrwédrwé aadrwédrwé nɛ́ bhó kɔ́gbʉ́ Yésu átekurúsi. Bhe ányɛkóróyé i bhó kɔ́gbʉ́ Yésu átekurúsi nɛ́ eíbía Piláto ándreibwua. 24 Hee bhe Piláto apía táo bhó ndrɛsɨ́ únga ká sɨ́ kábwʉ ú kɔ́ɔ́mʉ́a. 25 Bh'ɔá drɨ́, bh'eísía Barába, nómbí i kábwʉ ú káboni nɛ nɛ́, néi kódhíbwʉ nɛ ú átɔ́gbʉ́gyó átɔdhyɔ i ómbi kéíndrébwʉ to nyɛ ú átɛ́gbɔ́tɔ́ nɛ́, ka nɛ́ ka kɛ́ɛ́rʉ bhó ɛ́ɨnyɨ nɛ́, bhu átɔdhyɔ i kɔ́pwʉ́bwʉ to nómbí nɛ́. Hee bh'ɛɨ́gbá hɛ Yésu bhó kɛ́sɨ́ nɛ sɨ́ ányeisu kɔ́ɔ́mʉ́a.

Bhe kɔ́mbá Yésu bhó ku kɔ́pwʉ nɛ

(Mat. 27.32-44; Mákɔ 15.21-32; Yɔá. 19.17-27)

26 Átadhɨnga i kábwʉ ɨ ká hɛ́ kɔ́mba Yésu bhó ku kɔ́pwʉ nɛ nɛ́, bhe káasúa ánaasí kana ánɛrʉ bhó Simɔ́na, nómbí i néSirɛ́nɛ andrɛ, a n'ɛkʉ́a ú átɛɨpwɔ nɛ́. Bhe ɛ́sʉdhá káhʉ́a nɛ, bhe kɛ́ɨ́kpá nɛ bhó nɔ́tá Yésu ko nékurúsi bhó bh'obhúa a n'adrwá nɛ nɛ́.

27 Bhe ombirongwɛ kpukpurukpu abwʉ a n'edrwá Yésu nɛ́. Ándrɔ́ kábwʉ ká bhu hɛ, ési kábwʉ ú kábomu, ká hɛ́ kɛ́dɔ́dá nyɛ ándrɔ́tɔdhyɔ nɛ́. 28 Bhe Yésu eevhíngílía ndrɛ bha ú ándrɔ́ hɛ́ kábwʉ ɨ, ɔdhya kála bhó « Yáahɛ si néYerusalɛ́mɛ anɛ gwa ! Mɨɨ́ngomú bhelé andrɔ́tɔdhyɔ. Amúmu táo ki bhe mumua átɛ́gyándrɛ́ si bhákíé nɛ́ ányɔdhyɔ. 29 Outo nɛ́, sɨ́ amúgwó ká nádhɨnga kana a ú eekua, néi kɔ́dhyɔba to bhó ‹ Nɛ́ɨgyagya átándrɔ́ mángbɔ́ndʉ́, bhu átési ka ká ɨ kɔ́ʉhɨ́hɨ́, bhu ési ka ɨ kéíndrundru ngwá nɛ́. › 30 Hee bhe ómbi kɔ́tʉ́ba ká hɛ́ kɔ́dhya bhó ‹ Akioohólókpɔ́ kpɔ́kpɔ́ amúdhe anyɔ́ʉgbʉ́ aama, akiohólókpɔ́ sásá anyɔ́ʉ́pɨ aama ! › 31 Outo nɛ́, néi náapwʉ ɔbwá sɨ́ ma ɨ́má néóngwɛ ɛɛbɨ nɛ́, ka nɛ́ ka mɛ́sɨ́ ɔdhyɔ nɛ́, aátɛba ka ndrɛ bha bha aamɨ akiɛkɨ́rándrɛ amóndru. »^b 32 Kábwʉ ú kábɔmba ká nɛ bhu ánaasí nziobhó sɔ́ ɨ́ ányɛrɨ́ sóórúé, bhó ku kɔ́pwʉ hɛYésu ro átɛ́mápuekana.

Bhe ɛ́sʉdhá kɔ́gbʉ́a Yésu átekurúsi

33 Átadhɨnga i kóópúa ɨ átɛ́mápue kana i ánɛrʉ bhó « Náakpókpóró » nɛ́, bhe kɔ́gbʉ́a Yésu átekurúsi drʉ. Bhe kɔ́gbʉ́a ká bhu énziobhó sóórúé, kana bha ú aatɛ, kana bha ú eeku. 34 Yésu ɔdhya bhó « Páápa Angéle keégi hɛ, outo nɛ́, sɨ́ ka kɔ́tɨ nédhu i ká ú kɛ́sɨ́a nɛ́. »

Hee bhe ɛ́sʉdhá kɔ́bá nágbandá átógí si Yésu bha nɛ́, bhe kóóbhúa to. 35 Ómbi kábwʉ drʉ ká hɛ́ kápá nyɛ ká hɛ́ kánya nɛ́. Óúgé si éMoyúda anyɛ kábwʉ ká hɛ́ kéínva nɛ eínvo nɛ́, ká hɛ́ kɔ́dhya bhó « Aábɛɨ́rá ómbi akʉ́ɛ́, nɛ́ɨ́ra ká nɔgɔ táo ndrɛ, ɨ́ drʉ obhúa Masɨ́ya, néi nɛ́Ɨ́nyɨ́ Angéle ɔrwá bh'ɛdhá nɛ nɛ́. » 36 Bhe ɛ́sʉdhá kéínvá ká bhu hɛ nɛ. Bhe kɔ́ʉ́sɨ́a nyɛ nɔ́tɔ bha ɔʉ́ndɨ́, bhe kóa nɔ́ɔ ɔ́gálá kpakpa, 37 kɔ́dhya nɔ́ɔ bhó « Múbhúa nzúdhá nɛ́ɨ́nyɨ́ i éMoyúda anyɛ nɛ́, kɛɨ́ra ká ndru ɨ́mɨ́ tɔ́kpɛ ! » 38 Yésu ándrɔ́todru átekurúsi bha ú bhó, kábwʉ ú kɔ́há bhó « Nómbí i ɨ́n'a nɛ́ɨ́nyɨ́ i éMoyúda anyɛ. »

39 Nénziobhó kana átenziobhó si kɔ́gbʉ́bwʉ hɛ Yésu ándrɔ́toobhuru nɛ́, bh'erímá a n'ounzía nɛ nɛ́, ɔdhya bhó « Nyá ka bha bha Masɨ́ya ? Kɛɨ́ra ndru ɨ́mɨ́ tɔ́kpɛ, bhe nyɛ́ɨ́ra nɔgɔ bhu aama ! » 40 Bhe nénziobhó akʉ́nɛ́ ɔʉngbá dánɛ́ ko, ɔdhya nɔ́ɔ bhó « Nyɛ́ɛ́rʉ ka bhu Angéle gbagba, ɨ́mɨ́ i ká ú kóa mɨ́o nɛ́vʉ́lá sɨ́ɨ́sɨ́ ɨ́nɛ nɛ́ ? 41 Obhúa aama nɛ́, nɛ́vʉ́lá i ká ú kóa mala nɛ́, ɨ́n'a nzúdhá ! Outo nɛ́, sɨ́ ká ú kóa mala nɛ́vʉ́lá i a n'aátá ndrɛ ánɔdhyɔ́ biti si maábɛsɨ́ nɛ́. Nɔ́dhyɔkana, obhúa ɨ́nɛ nɛ́, ka nɛ́sɨ́ ɔdhyɔ biti kana. » 42 Hee bh'ɔdhyá tɔkana bhó « Yésu, kaambába ma pá átadhɨnga i nyɛ́kʉ́ba ɨ́ sɨ́ nɛ́ɨ́nyɨ́ nɛ́. » 43 Bhe Yésu aátúa nɔ́ɔ bhó « Nzúdhá má nɛ́ mádhyá mɨ́o nɛ́, ɔtʉ́a ndrɛ átɛtɨánɛ i, mabhua bha mɨ ú átɛparadízo. »

Nónzi i Yésu bha nɛ́

(Mat. 27.45-56; Mákɔ 15.33-41; Yɔá. 19.28-30)

44 Hee bh'oópúa ndrɛ átadhɨnga nɛ́ bha égye átɛmʉtyáhɔ nɛ́ nɛ́, bhe nékini bodi onúa átápɛ́gɔ ndúbhu tó bha átɛzaa i ɛ́sáa sɔ́ta anyɛ. 45 A drʉ néíkó oógyá ndrɛ sɔ́ drʉ nɛ́, bhe nógi i aándíbwʉ nɛ́mápue sáátu ánɛmápue sáátu pima i náángélégyó kpɔkpɔ andrɛ nɛ́, bh'aátwá ndrɛ ɔ́rɨandrɛ ɛ́bhɛrɛ́ ! ^c 46 Bhe Yésu opá nékóróyé bhó « Páápa Angéle, máángaátu andróudhuudhu anuɔ́tɔ́tɛ́ .» A drʉ ɔdhya sɔ́ nɛ́, bhe ándreísú asá. 47 A drʉ nɛ́kapiténi i nɛ́Rɔ́ma andrɛ ogwá ɔ́dhyɔ́ ndúbhu sɨ́ káfobwʉ nɛ́, bh'ɔʉ́bwʉ́a Angéle, ɔdhya bhó « Nzúdhá náasí i abá nómbí amɛ́yɔ ! »

48 A drʉ ombirongwɛ ndúbhu i ekúbwʉ bhó ku nyogwó nɛ́, bhe kógwá nɔ́dhyɔ gyó i ɛsɨ́bwʉ ndrɛ nɛ́, bhe káátúa nyɛ ká hɛ́ kápopa mápopo nɛ́. 49 Yésu ándrangɔ́nɛ́hɛ ndúbhu, ánandrɔ́ si káboudrwé nɛ ɔtʉ́a ndrɛ sɨ́ ú átɛGaliláya nɛ́, kábwʉ ká hɛ́ kápá nyɛ gyángá ká hɛ́ kánya nɛ́.

Bhe Yɔsɛ́fa otá Yésu

(Mat. 27.57-61; Mákɔ 15.42-47; Yɔá. 19.38-42)

50-51 Nápá kana abwʉ, ánɛrʉ bhó Yɔsɛ́fa, a nɛ́ néMoyúda i nɛ́gbɔ́tɔ́ i nÁrimatáyɔ andrɛ nɛ́. Ɨ́n'abwʉ nómbí balí, bhe ɨ́n'abwʉ nómbí amɛ́yɔ, bh'abwʉ ú onvá nɛ́Ɨnyɨngwa i Angéle bha nɛ́. Ɨ́n'abwʉ ká bhu nébúlómbíé átebula kpɔkpɔ i éMoyúda anyɛ. Bhe kabwʉ nápí nɔ́dhyɔ i ébúlái akʉ́ɛ́ káambábwʉ nɛ́, bhe kabwʉ nápí ká bhu ányɔhíamɛ. 52 Bhe ɨ́nɛ Yɔsɛ́fa ɔá bh'angáábɛ Piláto, bh'onía Yésu ándrabwu bhó nááo nɔ́ɔ ku ndroté. 53 Hee bh'ɔá bh'aadúa ándrabwʉ átekurúsi, bh'aɔ́ká ánɛmalɨkáni, bh'ɔá bh'angote ú átemugeluapɛ kana i ká hɛ́ kɔ́byá nɛ átóópí nɛ́,^d néi ka nɛ́ ka ɨ kétutu to abwʉ akʉ́nɛ́ nɛ́. 54 Ɨ́n'ɛsɨ́bwʉ ndrɛ sɔ́ átɛ́mɨ́tááno tɨánɛ, átɛzaa i nɛ́mʉtyáhɔ andrɛ, nɛ́sabáto a bhó nɛ́ ɔʉ́ndɨ ɔʉ́ndɨ́ bhó ndrɔtʉ́ bhó ndrɛ nɛ́.

55 Hee bhe ándrɔ́ si kóudwébwʉ Yésu ɔtʉ́a ndrɛ sɨ́ ú átɛGaliláya nɛ́, bhe kɔ́a Yɔsɛ́fa ro. Bhe kógwá némugéluápɛ, bhe kógwá únga ká sɨ́ kéídhóbwʉ Yésu ándrabwʉ. 56 Átámɛ́zaa, bhe káátúa nyɛ bha ú átɛ́gbɔ́tɔ́, bhe kángɛ́ɨ́mbɛmbɛ nɛ́ɨ́zɔ^e bhu ɛ́malásɨ bhó bhe nyangayɔ nɔ́ néépí tápu. Átɛsabáto tɨánɛ, kabwʉ kɛ́sɨ́ molo sɨ́ɨ́sɨ́ nƆ́ʉbwɔ onía.