Luk 22

Bhe ɛ́ɨnyɨ si éMoyúda anyɛ kɔ́ndá bhó nyɔpwʉ Yésu

(Mat. 26.1-5; Mákɔ 14.1-2; Yɔá. 11.45-53)

1 Náadhu i kábɔnyɔ to nɛ́mápa i ka nɛ́ ka ɨ to levírɛ nɛ́, néi Angéle eídibwʉ to éÍsraɛ́lɛ gyándrɛ́ ú áteEzípeto nɛ́, ɨ́n'abwʉ bhó ɔʉ́ndɨ́. 2 Ɛ́kɔána kpɔ́kpɔ́ bhu áadhaadhɔí si nƆ́ʉbwɔ anɛ kábwʉ ú kábɔnda mɔ́nda asehíɛ gyó i bhó nyɔpwʉ to Yésu ɛ́pɛ́lɛ́ nɛ́, sɨ́ kábwʉ ú kábɛɛ́rʉ ɛɛ́rʉ ómbi.

Bhe Yúda ándreísú apá ndrɛ bhó ndroo Yésu átɛɨnyɨ ányɛtɛ́

(Mat. 26.14-16; Mákɔ 14.10-11)

3 Hee bhe Sátana ɛɨ́nʉ́a Yúda ándreísú, néi kábongo nɛ bhó Kariɔ́ta nɛ́, néi abwʉ nɔ́dhádhómbíé kana átɔ́dhádhái tɛ́ɛ́vhɛ́ égí sóórúé si Yésu bha nɛ́ nɛ́. 4 Bhe ɨ́nɛ Yúda, bh'ɛngá, bh'ɔá bh'angáádhyɔ ánɛkɔána kpɔ́kpɔ́ bhu ɛ́kápíténí si ɛ́sʉdhá si kábarɨ́ náángélégyó kpɔkpɔ nɛ́ kɔ́rɔ, bhó ndraagá ndrɛ kɔ́rɔ átéhíɛ gyó i aátá sɨ́ ndroo to kála Yésu nɛ́. 5 Bhe ɛ́kɔána kpɔ́kpɔ́ ánɛkápíténí hɛ́, bhe kɔ́gá nɛ́ɨgyagya ootu, bhe káagá nyɛ bhó nyoo nɔ́ɔ ɛ́faránga. 6 Bhe Yúda apía, bh'erímá a n'ɔnda bhó nyáá nápúmá gyó i aátá sɨ́ ndroo to nɛ kála ɛ́pɛ́lɛ́, ombirongwɛ ka nɛ́ ka nɛ́ɨ́tɨ nɛ́.

Bhe Yésu ɔdhá oudrwaamɨ sóórúé bhó ku kɛ́ɨ́mbɛmbɛ áányɔ́ si nɛ́Pásɨka anɛ

(Mat. 26.17-25; Mákɔ 14.12-21; Yɔá. 13.21-30)

7 Bh'oópúa ndrɛ átɛtɨánɛ i náadhu i ɛ́mápa si ka nɛ́ ka ɨ to levírɛ nɛ́ andrɛ, néi onibwʉ bhó kɔ́pwʉ to ɛ́kandóló si nɛ́Pásɨka anɛ nɛ́. 8 Bhe Yésu ɔdhá Pɛ́tɛrɔ bhu Yɔáni, ɔdhya kála bhó « Amʉ́ɔ ku anyɛ́ɨ́mbɛmbɛ mala áányɔ́ si náadhu i nɛ́Pásɨka anɛ. » 9 Kɔ́ɨa nɛ bhó « Nyɔ́ɔ́mʉ́a bhó ku amádhí ze ? » 10 Yésu aátua kála bhó « Ndó : átadhɨnga i mubhua ɨ nya hɛ́ nyekía ki ú átɛ́gbɔ́tɔ́ nɛ́, bhe nyaasua ánaasí kana i a n'ɔtá égwo átémbwó nɛ́. Amʉ́ɔ nɔ́rɔ tó mɨngekí ki átégyó i ekía to ndrɛ nɛ́, 11 bhe mʉdhya bhambómbíé ko ndó ‹ Náadhaadhombíé a ú ɔɨa mɨ bhó négyó ándrɛmápue i nyɔ́ɔ́mʉ́a bhó mányɔ́ to náadhu i nɛ́Pásɨka andrɛ, ánóudrwaamɨ si bhándrá nɛ́ kɔ́rɔ nɛ́ a ze ? › 12 Hee bhe náasí nɛ́ aádha nyala négyó ándrɛmápue ngángálá ndré ú bhó nɛ́, néi ɨ́n'a ánɔdhyɔ́ ndúbhu nɛ́. Nyɛɨ́mbɛmba áányɔ́ ndúbhu égye. » 13 Hee bhe kɔ́á, bhe káábá ɔ́dhyɔ́ ndúbhu sɨ́ɨ́sɔ́ Yésu ɔdhyɔ́bwʉ kála, bhe kódhía áányɔ́ si nɛ́Pásɨka anɛ.

Bhe Yésu ɛsɨ́a nɛ́Kɔ́mɔ́nyɔ́ Sáátu

(Mat. 26.26-30; Mákɔ 14.22-26; 1 Kor. 11.23-25)

14 A drʉ nádhɨnga aáta nɛ́, bhe Yésu aágá átamísá ánɔdhádhái si bhándrɛ nɛ́ kɔ́rɔ. 15 Ɔdhya kála bhó « Mɔ́ɔ́mʉ́bá ɔɔ́mʉ pima ndó mányɔ́ aanyɔɔ́rɔ náadhu i nɛ́Pásɨka i andrɛ, ɨ́sɛ́ɛ́lɛ́ i bhó mágá nɛ́ɛ́ndrɨɛɛ́ndrɨ́ nɛ́. 16 Outo nɛ́, sɨ́ má nɛ́ mádhyá nyala nɛ́, mányɔ́ba ka bhó náadhu i nɛ́Pásɨka andrɛ épí tó bha drɨ́ nɛ́Ɨnyɨngwa i Angéle bha nɛ́ aádríba ɨ. » 17 Hee bh'agbá nékópo i évínyɔ anyɛ, bh'ɔʉbwá Angéle, ɔdhya bhó « Anyágba nékópo vínyo i, bhe mʉmbwa aamɨ kpɛ́ kána-káná. 18 Outo nɛ́, sɨ́ má nɛ́ mádhyá nyala nɛ́, ɔtʉ́a ndrɛ ɨ́ gaa ɨ́ drɨ́, mámbwɔ́ba ka bhó vínyo épí tó bha drɨ́ nɛ́Ɨnyɨngwa i Angéle bha nɛ́ oópua ɨ. » 19 Átámɛ́zaa, bh'ɛɨ́ngá nɛ́mápa, bh'ɔʉbwá Angéle, bh'oukía to hɛ, ɔdhya bhó « Néi ɨ́n'a andréépí [i máángoo nɛ nyala nɛ́. Anyɛ́sɨ́sɨ́ sɔ́ ɨ́ nya hɛ́ nyaambá to ma nɛ́. » 20 A drʉ kéíbia náányáányɔ́ nɛ́, bh'ɛɨ́gbá hɛ tɔkana nékópo i évínyɔ anyɛ sɨ́ɨ́sɔ́, ɔdhya bhó « Nékópo i ɨ́n'a nɛ́ɨkɔlɔ adya i Angéle bha nɛ́ i andrálíkpɔ andrɛ, néi ɛtʉ́a ndrɛ nyala nɛ́.] 21 Nɔ́dhyɔ kana, nómbí i a ú oa ma áteetií ányɛtɛ́ nɛ́, ma ú maánya bha nɛ átamísá i. 22 Outo nɛ́, sɨ́ ɨ́má nɛ́Ngwángwɛ i nÓmbí bha nɛ́, má ú mánzía sɨ́ɨ́sɔ́ Angéle ɔrwabwʉ mʉ́. Nɔ́dhyɔkana, nɔ́dɔ átómbí nɛ́ a ú oa ma éetií kála nɛ́ nɛ́ ! » 23 Hee bhe óudrwaamɨ kɔ́tʉ́a ká hɛ́ kááɨa nyɛ tányɛrɨ́ nɛ́ bhó adhíngwɛ i kɔ́tɔ i a ú ɛsɨ́a nɔ́dhyɔ gyó nɛ́ nɛ́.

Adhíngwɛ i a ú ɛpá átɛkpɔkpɔ́ nɛ́ ?

24 Átámɛ́zaa, bhe óudrwaamɨ kérímá ká hɛ́ kéíbua ɔ́dhyɔ́ gbʉ́gbʉ́rʉ́gbʉ́ ányɔ́tɛrɨ́ nɛ́ bhó adhíngwɛ i átéígo i bhányɛ nɛ́ i a ú eegwá sɨ́ ɨ́n'ɛpá nɛ átɛkpɔkpɔ́ nɛ́. 25 Yésu ɔdhya kála bhó « Átɔdhyɔ i anyá ɛ́ɨnyɨ si ká ú kɔ́nyá átápɛ́gɔ nɛ́, ká ú kóhia nyɛ átombi si bhányɛ nɛ́ ánɛɨnyɛɨ́nyɨ́ ro, bhe ómbi si ká ú káría nyɛ kɔ́tɔ nɛ́, ká ú kɔ́ɔ́mʉ́a bhó kóngo hɛ bhó nya ómbi bali. 26 Bhe aamɨ, ka nóní bhó amúhi ki sɔ́. Afá átɔmbɛ bhó nómbí i a átéígo i bhákíé nɛ́ ámékpékpéré nɛ́, nɔ́kʉ́ ndrɛ únga ká sɨ́ nɛ́ngwángwɛ, bhe nɛ́ɨ́nyɨ́ ɔkʉ́a ndrɛ únga ká sɨ́ némólómbíé. 27 Adhíngwɛ i ɨ́n'a ká ámɛ́kpɛ́kpɛ́rɛ́ nɛ́ ? Bhu i bhó ɨ́n'a nómbí i a ú aágá átamísá nɛ́, bhu i bhó ɨ́n'a némólómbíé i a ú oóbhua ómbi áányɔ́ átamísá nɛ́ ? Ka bha néi a ú aágá átamísá nɛ́ ? Hee bhe ɨ́má, mákʉ́a ndra átéígo i bhákíé nɛ́ únga ká sɨ́ némólómbíé. 28 Bhe aamɨ, nya ómbi si mɨɨ́bodri máro nádhɨnga atyatye nya hɛ́ nyembwúa ma áneísú dhadhati ro átɔ́dhyɔ́ kpákpáálá si káámbwua ma nɛ́. 29 Sɨ́ɨ́sɨ́ Páápa aáboo mʉ́ nɛ́Ɨnyɨngwa, hee bhe ɨ́má nɔgɔ má ú máa nyala sɨ́ɨ́sɔ́. 30 Bha drɨ́ nyaányɔba ɨ aányɔ, bhe mʉmbwɔba mɔ́mbwɔ átamísá i bhándrá nɛ́ i a átɛƗnyɨngwa i bhándrá nɛ́ nɛ́. Bhe mudriba átɛɨnyɨɔbhálá nya hɛ́ mufa ɛ́báságyo tɛ́ɛ́vhɛ́ égí sóórúé si néÍsraɛ́lɛ anɛ ányɛngbanga nɛ́. »

Bhe Yésu aábhúa Pɛ́tɛrɔ^a ko ɔra ándrɔɨ mɔ́rɔ nónzi

(Mat. 26.31-35; Mákɔ 14.27-31; Yɔá. 13.36-38)

31 Yésu ɔdhya bhó « Simɔ́na gwa ! Simɔ́na gwa ! Kʉgá ká : Sátana aábóni bhó ndrabwu aamɨ ndúbhu átɛkyangyá únga ká sɨ́ kábwua ɛ́ɨbhʉɛɨbhʉkpɔ́ bhó kɛ́ɨ́za to épúpúu. 32 Bhe ɨ́má, mánga máángasɛ́myá mɨ́o átɛmbanda i ndó mɨ́ɨ́ngabhá bhelé nápíápí i bhándrúé nɛ́ nɛ́. Bhe ɨ́mɨ́, átadhɨnga i nyáátuba ɨ ndru bha zá má ɨ nɛ́, keigé pá mayándrúngwɛhɛ ányapíápí. » 33 Pɛ́tɛrɔ ɔdhya nɔ́ɔ bhó « Nɛ́Ɨ́nyɨ́, má nyáá nándrá ndó amáɔ bha mɨ ú átɔ́gbʉ́gyó bɛsɨ́ngɨ obhúa ká bhó ku amánzí bha mɨ ! » 34 Yésu aátua nɔ́ɔ bhó « Nɛ́ɨtɔ, má nɛ́ mádhyá mɨ́o nɛ́ Pɛ́tɛrɔ, átekini i, nɛ́magbanga obhú ka ká ɨ nópo, bhe mʉ́ra ndráɨ́ nónzi ámémírí sɔ́ta bhó ka ndrɛɨ́tɨ ma. »

Bhe Yésu aábhúa óudrwaamɨ kála bhó kógu

35 Yésu ɔdhya tɔkana óudrwaamɨ kála bhó « Átadhɨnga i mádhábá ɨ aamɨ ka nɛ́ ka ɨ aanyɔɔ́rɔ pɔtɔmɔnɨ́ nɛ́, ka nɛ́ ka ɨ aanyɔɔ́rɔ mbágálá bhu kátárá nɛ́, oudhu gyó i mʉgabá ámémo nɛ́ ? » Bhe káátúa nɔ́ɔ bhó « Mabá ánɔdhyɔ́ ndúbhu ! » 36 Ɔdhya kála bhó « Hee bhe gaa ɨ́ drɨ́, nómbí i a ánɛpɔtɔmɔnɨ́ nɛ́ nɛ́ɨ́nga sɨ́ ɛɨ́nga, bɛsɨ́ngɨ obhúa ká nómbí i a ánɛmbágálá nɛ́. Bhe nómbí i obhú ka ɨ nɔ́rɔ dʉkpa nɛ́, bh'ɔʉ́hya nékóti i bhándrɛ nɛ́ bh'oga nɔ́. 37 Outo nɛ́, má nɛ́ mádhyá nyala nɛ́, onía bhó nɛ́sɨ́ ndrɛ máto sɨ́ɨ́sɨ́ nébúku i Angéle bha nɛ́ ɔdhyá, bhó ‹ Ómbi kógwobwʉ nɛ únga ká sɨ́ nɔ́pwʉabwú. › Nzúdhá, ɔ́dhyɔ́ si kɔ́há máto nɛ́, ɨ́n'a bhó kɛ́sɨ́ nyɛ. » 38 Óudrwaamɨ kɔ́dhya nɔ́ɔ bhó « Nɛ́Ɨ́nyɨ́, ɛ́dʉ́kpá sóórúé ká si. » Ɔdhya bhó « Ɛ́hɛ́ ká ámámátɛ. »

Bhe Yésu asɛ́myá ú átOolívɛ ooholo

(Mat. 26.36-46; Mákɔ 14.32-42)

39 Bhe Yésu edía, bh'ɔá ú átOolívɛ ooholo sɨ́ɨ́sɔ́ ɔʉ́ɔa, bhe óudrwaamɨ kɔ́á nɔ́rɔ. 40 Átadhɨnga i oópúa ɨ átámɛ́mápue nɛ́, ɔdhya kála bhó « Amúbhú nya hɛ́ nyasɛmya nɛ́, átɛmbanda i ndó mɨɨ́ngodhé bhelé átáábháabhɔ ándrɛhɔ nɛ́. » 41 Hee bh'egédhépá ngwɛ́ ndrɛ kɔ́tɔ bha sɔ́ dryɛ́,^b bh'agbúúmá, bh'erímá a n'asɛmya nɛ́ 42 bhó « Páápa, nyɔ́ɔ́mʉ́a nɛ́, kɛɨ́za mʉ́ nékópo i nɛ́ɛ́ndrɨɛɛ́ndrɨ́ i andrɛ. Nɔ́dhyɔkana, mɨ́ɨ́ngɛsɨ́ bhelé bha sɨ́ mɔ́ɔ́mʉ́a, kɛsɨ́ sɨ́ɨ́sɨ́ nyɔ́ɔ́mʉ́a ! » [ 43 Hee bhe náángelú kana ɛngá ú átɔrɔ, bh'edía nɔ́tɔ bhó ndraáo nɔ́ɔ tɔkana nɛ́kpakpárá. 44 Bhe nɛ́madumbe i nónzi andrɛ agbá Yésu, bh'erímá a n'asɛmya bhó nyáá tílé-tílé nɛ́. Bhe ánerwé kérímá ká hɛ́ kódha átapɛ ɛ́taata únga sɨ́ nálíkpɔ.]

45 A drʉ asɛmya nɛ́, bh'ɛngá bh'aátúa ndrɛ bha ú óudrwaamɨ ká ɨ, bh'aámbwúa hɛ ká hɛ́ kédhá ánɛpɔpɔ́ɔ́lɔ́ i nɔ́dɔ andrɛ nɛ́. 46 Ɔdhya kála bhó « Kábhá ! Oudhu gyó i nyedhá to sɔ́ drʉ nɛ́ ? Anyɛ́nga bhe mubhua nya hɛ́ nyasɛmya átɛmbanda i ndó mɨɨ́ngodhé bhelé átáábháabhɔ ándrɛhɔ nɛ́. »

Bhe ɛ́ɨnyɨ si éMoyúda anyɛ kɔ́á bhó ku nyahʉ́ Yésu

(Mat. 26.47-56; Mákɔ 14.43-50; Yɔá. 18.3-11)

47 Yésu a sɨ́ n'ɔdhya nɛ́, bhe ombirongwɛ edía ɛ́rrrr ! Bhe náasí i kábongo nɛ bhó Yúda nɛ́, a nɛ́ nɔ́dhádhómbíé kana átɔ́dhádhái tɛ́ɛ́vhɛ́ égí sóórúé si Yésu bha nɛ́, abwʉ nɛ a n'ɔʉgbʉ́a kála néetu nɛ́. Bh'ɔʉ́sɨ́a ndrɛ bha Yésu to ɔʉ́ndɨ́ bhó ndrabhɨkya nɛ ndra nɛ́ ndraamʉ́a nɛ aámʉ́ nɛ́. 48 Yésu ɔdhya nɔ́ɔ bhó « Kábhá Yúda ! Nɔ́ʉbhɨkya i náámʉ́áámʉ́ andrɛ a nɛ nɛ i nyá múa to nɛ́Ngwángwɛ i nÓmbí bha nɛ́ áteetií ányɛtɛ́ nɛ́ ? »

49 A drʉ ómbi si kábwʉ Yésu ro nɛ́ kógwá nɔ́dhyɔ gyó i abwʉ ú abɔdhyɔ bhó ndrɛsɨ́ ndrɛ nɛ́, kɔ́ɨa nɛ bhó « Nɛ́Ɨ́nyɨ́, ɨ́n'a bhó amádi ɛ́dʉ́kpá amándre kɔ́rɔ ? » 50 Bhe náasí kana kɔ́tɔ, bh'opyá némogya i nɛ́kɔána kpɔkpɔ akpatʉ́ bha nɛ́ ɛ́páráásá ! bh'ofá ándrɛbɨ́ aatɛ ɛ́kya ! 51 Yésu ɔdhya bhó « Anyábha, nádʉ́ sɔ́ ! » Bh'agbá némogya nɛ́ ándrɛbɨ́, bh'ɛɨ́rá nɛ. 52 A drʉ ɛɨ́ra nɛ sɔ́ nɛ́, ɔdhya ɛ́kɔána kpɔ́kpɔ́, bhu ɛ́kápíténí si kárɨ́a náángélégyó kpɔkpɔ nɛ́, ánoúgé si kékúbwʉ bhó ku nyahʉ́ nɛ nɛ́ kála bhó « Nyekúa máto ánɛdʉ́kpá bhu éngbengbelú únga ká sɨ́ má nɛ́ɛ́gʉ́ ? 53 Ékíní kpɛ́ mábá aanyɔɔ́rɔ ú átɛ́bálá i náángélégyó kpɔkpɔ andrɛ, bhe kabá anyáhʉ́ ma. Nɔ́dhyɔkana, nádhɨnga i bhákíé nɛ́ a nɛ nɛ i bhu Sátana, nɛ́ɨ́nyɨ́ i nékini bodi andrɛ. »

Bhe Pɛ́tɛrɔ eíbúa bhó ka ndrɛɨ́tɨ Yésu

(Mat. 26.57-58,69-75; Mákɔ 14.53-54,66-72; Yɔá. 18.12-18, 25-27)

54 Bhe káhʉ́a Yésu, bhe kɔ́á nɔ́rɔ bhe kéitá nɛ ú átégyó i nɛ́kɔána kpɔkpɔ akpatʉ́ bha nɛ́. Pɛ́tɛrɔ abwʉ a n'edrwá hɛ ámɛ́ndrɔ́ndrɔ́ nɛ́. 55 Bhe kɛ́ɨká náago átɔ́ɔ́rɨandrɛ i nɛ́mʉ́hɔkpɔ andrɛ, bhe Pɛ́tɛrɔ eipwúa ndrɛ átɔ́ɔ́rɨandrɛ i ómbi si kábwʉ ú kódría drʉ nɛ́ anyɛ. 56 A sɨ́ n'odría nɛ́, bhe némólómbíé andrɔngwángwɛ kana ogwá nɛ átaago ándroobhuru, bh'anyá nɛ ésiii, ɔdhya bhó « Náasí i kóubhúbhúa ká bhu hɛ bha nɛ ! » 57 Bhe Pɛ́tɛrɔ eíbúa, ɔdhya bhó « Yáa gwa ! Ka mɛ́ɨ́tɨ nɛ ! » 58 Ka nɔ́dá nɛ́, bhe nómbí akʉ́nɛ́ ogwá nɛ, ɔdhya bhó « Bɛsɨ́ngɨ obhúa ɨ́mɨ́, nyá bhu mɨ́ nóudrwaamɨ kana átoudrwaamɨ si bhándrɛ nɛ́ ! » Pɛ́tɛrɔ aátua nɔ́ɔ bhó « Mbáe ! Ka ɨ ma nóudrwaamɨ i bhándrɛ nɛ́. » 59 A drʉ afa nádhɨnga únga ká sɨ́ nɛ́sáa kana nɛ́, bhe náasí akʉ́nɛ́ ɔdhyá tɔkana ánaándáándó bhó « Nzúdhá, náasí i kóubhúbhúa bhu hɛ bha nɛ, outo nɛ́, sɨ́ ɨ́n'a nómbí i nɛ́Galiláya andrɛ ! » 60 Pɛ́tɛrɔ ɔdhya bhó « Mbáe ! Ka ɨ ma ú mɛ́ɨ́tɨa nɔ́dhyɔ i nyá ú nyɔ́ɔ́mʉ́a bhó ndrɔdhyɔ nɛ́ ! » Sɨ́ átadhɨnga nɛ́ abɔdhyɔ ɨ nɛ́ nɛ́, bhe nɛ́magbanga opá. 61 Bhe nɛ́Ɨ́nyɨ́ Yésu eevhíngílía ndrɛ, bh'anyá Pɛ́tɛrɔ ɛ́ndrɨ́ɨ́ɨ́. Hee bhe Pɛ́tɛrɔ aambá nɔ́dhyɔ i nɛ́Ɨ́nyɨ́ ɔdhyɔ́bwʉ nɔ́ɔ nɛ́ bhó « Ɨ́sɛ́ɛ́lɛ́ i bhó nɛ́magbanga nópo átekini i nɛ́, nyéíbua eíbu ámémírí sɔ́ta bhó ka ndrɛɨ́tɨ ma. » 62 Bhe Pɛ́tɛrɔ edía, bh'omúa ánɔdɔ ootu.

Bhe ɛ́sʉdhá si kábwʉ ú kárɨ́a Yésu nɛ́, bhe kóunzía nɛ bhe kódá nɛ

(Mat. 26.67-68; Mákɔ 14.65)

63 Bhe ómbi si kábwʉ ú kárɨ́a Yésu nɛ́, bhe kérímá nɛ néínvéinvo, bhe kódá nɛ. 64 Bhe káátía ánɛŋɔ ánogi, kɔ́ɨa nɛ bhó « Kʉbwɔ ká ! Adhíngwɛ i atá mɨ nɛ́ ? » 65 Bhe kóunzía nɛ, ká hɛ́ kɔ́ʉ́dhya nɔ́tɔ ɛ́tʉ biti ootu ootu akʉ́ɛ́ nɛ́.

Bhe néBula kpɔkpɔ i éMoyúda anyɛ ofá Yésu ándrɛngbanga

(Mat. 26.59-66; Mákɔ 14.55-64; Yɔá. 18.19-24)

66 Átadhɨnga i nébhúlobhú ɛpɛ́lá ɨ nɛ́, bhe óúgé si éMoyúda anyɛ, bhu ɛ́kɔána kpɔ́kpɔ́ ánaadhaadhɔí si nƆ́ʉbwɔ anɛ, bhe káasúa. Bhe kɛ́mbá Yésu áteetu i néBula kpɔkpɔ i bhányɛ nɛ́ andrɛ, 67 bhe kɔ́dhyá nɔ́ɔ bhó « Múbhúa Masɨ́ya nɛ́, keirí mala. » Bh'akɛ́lyá kála bhó « Máángɔdhyɔ́ nyala bhó má Masɨ́ya nɛ́, nyapí ka, 68 bhe máángɔɨ́ aamɨ átɔdhyɔ kana nɛ́, nyakɛlya ka mʉ́. 69 Nɔ́dhyɔkana, ɔtʉ́a ndrɛ gaa ɨ́ drɨ́, ɨ́má nɛ́Ngwángwɛ i nÓmbí bha nɛ́ má ú mádría átɛ́tɛ́ aatɛ i Angéle kpɔkpɔ bha nɛ́. » 70 Hee bhe ébúlái ndúbhu kópá érrrr bhó « Nyá táo Angéle ándrɛNgwó ? » Ɔdhya kála bhó « Mɨɨ́ngɔdhyɔ́ bhó sɨ́ aamɨ bhó má Angéle ándrɛNgwá. » 71 Hee bhe kɔ́dhyá bhó « Ka ɨ bhó ɨ aamɔɔ́rɔ ɔdhyɔ sɨ́ amɔ́ʉ́ɨ to ɛ nɛ́ ! Outo nɛ́, sɨ́ maángɔga bhó sɨ́ aama sɨ́ ɔdhyá ! »