Luk 20

Bhe ɛ́ɨnyɨ si éMoyúda anyɛ kɔ́ɨ́a Yésu bhó nɛ́ɨnyɨɛɨ́nyɨ́ i bhándrɛ nɛ́ ɛngá ze

(Mat. 21.23-27; Mákɔ 11.27-33)

1 Bh'oópúa ndrɛ nɛ́tɨánɛ kana Yésu a n'aádha ómbi ú átáángélégyó kpɔkpɔ nɛ́, a n'agyá nɛ́tʉ́ balí i Angéle bha nɛ́, bhe ɛ́kɔána kpɔ́kpɔ́ bhu áadhaadhɔí si nƆ́ʉbwɔ anɛ ánoúgé kɔ́rɔ, bhe kédía nɔ́tɔ épipi. 2 Kɔ́ɨa nɛ bhó « Kʉdhyɔ ká mala, nɛ́ɨnyɨɛɨ́nyɨ́ ánganɛ́ i nyá ú nyɛ́sɨ́a nɔ́ ɔ́dhyɔ́ hɛ́ nɛ́ ? Adhíngwɛ i aáá mɨ́o ámɛ́ɨnyɨɛɨ́nyɨ́ nɛ́ ? » 3 Yésu ɔdhyá kála bhó « Ɨ́má nɔgɔ, má ká bhu má ánɔɨ kana ndó máɨ to aamɨ. Amʉ́dhyɔ ká mʉ́ ndó 4 adhíngwɛ i ɛdhábwʉ Yɔáni bhó náábatisa nɛ́ ? Bhu i bhó ɨ́n'abwʉ Angéle, bhu i bhó ɨ́n'abwʉ ómbi nɛ́ ? » 5 Bhe kérímá ká hɛ́ kááɨa nyɛ tányɛrɨ́ nɛ́ bhó « Maángɔdhyɔ́ ndó Angéle ɛdhábwʉ nɛ Yɔáni nɛ́, ɔɨa aama mɔ́ɨ bhó ‹ oudhu gyó i kabwʉ ka anyápí to náádhɔ́ i bhándrɛ nɛ́ nɛ́ ? › 6 Bhe maángɔdhyɔ́ ká ndó ‹ Ómbi kɛ́dhábwʉ hɛ nɛ nɛ́ ›, bhe ómbi ndúbhu kɔ́pwʉa aama ánoopi kɔ́rɔ. Outo nɛ́, sɨ́ ká ú kápía mápí bhó Yɔáni ɨ́n'abwʉ nénébi. » 7 Bhe káátúa nɔ́ɔ bhó ka nyɛɨ́tɨ nómbí i ɛdhábwʉ nɛ nɛ́. 8 Bhe Yésu ɔdhyá nɔgɔ kála bhó « Ɨ́má nɔgɔ, mádhyɔ ka nyala ndó adhíngwɛ i aáá mʉ́ nɛ́ɨnyɨɛɨ́nyɨ́ i má ú mɛ́sɨ́a nɔ́ ɔ́dhyɔ́ hɛ́ nɛ́. »

Bhe Yésu ɔgá nátámbá i émólói nziobhó si névínyɔ ɛɨpwɔ anɛ anyɛ

(Mat. 21.33-46; Mákɔ 12.1-12)

9 Átámɛ́zaa, bhe Yésu ɔtʉ́a a n'odrwá ómbi kála nátámbá, ɔdhya bhó « Náasí kana ɛdhɨ́bwʉ névínyɔ ɛɨpwɔ, bh'aágá ndrɛ ánamémólói bhó kɛ́sɨ́ to némolo, bhó bhe ndraándia kɔ́rɔ átámɛ́kpɔ ɨ́ drɨ́ kɔ́pa ɨ. Hee bh'ɛngá táo bh'ɔá nándrɛ ɛ́tɛlɛlɛ átékíní ootu. 10 A drʉ nádhɨnga i bhó kɔ́pɛ to évínyɔkpɔ nɛ́ ata nɛ́, bh'ɔdhá némogya kana ú émólói si névínyɔ ɛɨpwɔ anɛ ká ɨ bhó ku kááo nɔ́ɔ ámɛ́kpɔ anɛ. Bhe émólói hɛ́ kódá nɛ, bhe káátúa nɛ ánɛtɛ́ kpa ! 11 Bhe ɛɨpwɔmbómbíé ɔdhá tɔkana némogya akʉ́nɛ́. Bhe kódá ká nɛ tɔkana sɨ́ɨ́sɔ́, bhe kɛ́pápáúa nɛ, bhe káátúa nɛ ánɛtɛ́ sɨ́ kpa ! 12 Bh'ɔdhá tɔkana némogya ámɛ́sɔ́tá, bhe kóbía nɛ, bhe kágyá nɛ. 13 Hee bhe ɛɨpwɔmbómbíé aambá tándreísú, ɔdhya bhó ‹ Má ú mɛ́sɨ́a ká bhásí ? Obhúa sɔ́ nɛ́, má ú mádha ká andrángwá tɔ́kpɛ i mɔ́ɔ́mʉ́a nɛ pima nɛ́, sɨ́ kɛ́ɛ́rʉa nɛ ɛɛ́rʉ. › 14 Bhe átadhɨnga i émólói hɛ́ kógwá ɨ ɛɨpwɔmbómbíé ándrɛngwá nɛ́, bhe kérímá ká hɛ́ káádhyá ándrɔɨ nɛ́, kɔ́dhya bhó ‹ Hee amúgwó ká kiro nómbí i a ú oópuba ɛɨpwɔmbómbíé nɛ́ a i, amápwʉ nɛ átɛmbanda i ndó nɛ́ɨpwɔ nóbhú mala nɛ́ ! › 15 Bhe kéídía nɛ kpakpara-kpákpárá átévínyɔ ɛɨpwɔ ándrɛhɔ, bhe kɔ́á nɔ́rɔ bhe kángɔ́pwʉ nɛ. »

Hee bhe Yésu ɔɨ́a hɛ bhó « Ɛɨpwɔmbómbíé ɛsɨ́ba ká hɛ bhásí ? 16 Ekuba, bh'ɛɨ́ngaba émólói hɛ́, bh'ɔpwʉba hɛ, bh'aáoba nɛ́ɨpwɔ nɛ́ ándremolo ómbi akʉ́ɛ́ kála. » A drʉ kɔ́gá sɔ́ nɛ́, kɔ́dhya bhó « Nɛ́ɨtɔ, nɛ́nɛ́ ɛsɨ́a ka nɛ ndrɛ ápye ! » 17 Bhe Yésu anyá hɛ ésiii, ɔɨa hɛ bhó « Amʉ́dhyɔ ká mʉ́, nɛ́tʉ́ i nébúku i Angéle bha nɛ́ andrɛ i ɔdhyá bhó ndrɔdhyɔ bhásí : ‹ Nóópí i ɔ́bhʉ́i kókpubwʉ nɛ́, a nɛnɛ i oópúa nóópí ayá i apá négyó ndúbhu nɛ́^a › ? 18 Nómbí i odheba átóópí nɛ́ nɛ́, bh'oukíba, bhe nómbí i nóópí nɛ́ odheba nɔ́tɔ nɛ́, bh'anaba nɛ néibhwé. »

Aáta aátɛ bhó éMoyúda kóge nɛ́páko nɛ́ɨ́nyɨ́ Kaisára ko^b ?

(Mat. 22.15-22; Mákɔ 12.13-17)

19 Sɨ́ átámádhɨnga, bhe áadhaadhɔí si nƆ́ʉbwɔ anɛ ánɛkɔána kpɔ́kpɔ́, bhe kɔ́ndá néhíɛ gyó i bhó nyahʉ́ to Yésu nɛ́, sɨ́ kábwʉ ú kɛ́ɨ́tɨ́a bh'ɔgá kála nátámbá nɛ́, bhe kabwʉ káhʉ́ nɛ ká hɛ́ kɛ́ɛ́rʉa ómbi nɛ́. 20 Bhe kérímá ká hɛ́ kóúgá nɛ nɛ́, bhe kɛ́dhá nɔ́ɔ ɛ́kalií. Ɛ́kalií hɛ́ kábɛsɨ́ nyɛ nyáá únga ká sɨ́ ómbi si kóbhúa ómbi amɛ́yɔ nɛ́, átɛmbanda i bhó nyɔngá to nɛ átɛ́tʉ́ kana nɛ́, bhó bha ú nyaáa ɨ nɛ átɛ́tɛ́ si néguvɛrɛnɛ́rɛ bha nɛ́. 21 Bhe kɔ́ɨ́a nɛ bhó « Náadhaadhombíé, ma ú mɛɨ́tɨ́a ndó ɔ́dhyɔ́ si nyá ú mʉ́dhya bhe nyá ú nyáádha nɛ́ ká ɔ́dhyɔ́ amɛ́yɔ. Bhe nyánya ka bha nándrúé bha bha ómbi ányeegweegwe, bhe nyá ú nyáádha néhíɛ i Angéle bha nɛ́ nzúdhá. 22 Kʉdhyɔ ká mala, bhu i bhó nƆ́ʉbwɔ i bháɛ́ nɛ́ a ú apía bhó amáge nɛ́páko nɛ́ɨ́nyɨ́ Kaisára ko, bhu i bhó ka nápí nɛ́ ? » 23 A drʉ Yésu akɨ́a ányɛkálí nɛ́, ɔdhya kála bhó 24 « Anyéíhwe ká mʉ́ nɛ́farángakpɔ kana. Adhíngwɛ ándrɛfɔtɔ́ i, bhe kɔ́há to adhíngwɛ ánɛrʉ ? » Kɔ́dhya nɔ́ɔ bhó « Kaisára bha nɛ́. » 25 Yésu ɔdhya kála bhó « Hee amúge ɔ́dhyɔ́ si Kaisára bha nɛ́ Kaisára ko, bhe muga ési Angéle bha nɛ́ Angéle ko. » 26 Drʉ kabwʉ kɔ́gá a n'akɛlya tʉ́ biti áteetu i ómbi anyɛ, néi a n'aátá sɨ́ kɔ́ngá to nɛ nɛ́, bhe ányetikpɔ́ kótía. Bhe kámbángá mámbanga átɛ́tʉ́ gyó sɨ́ akɛ́lyábwʉ kála nɛ́.

Ómbi amónzi kóruba pɨ́tɛ́ ?

(Mat. 22.23-33; Mákɔ 12.18-27)

27 Hee bhe ɛ́Sadɔ́kɛ sɔ́ ɨ́ kékúa bha ú Yésu a ɨ. Ɛ́Sadɔ́kɛ ká hɛ ési kɔ́dhya bhó ómbi amónzi kóru ka nɛ́. Kɔ́dhya nɔ́ɔ bhó 28 « Náadhaadhombíé, Mʉ́sɛ aábɔhɛ́ mala nƆ́ʉbwɔ bhó ‹ Nɛ́masí kana obhúa a n'ɔgɨ́a nándrɔ, bhe nɛ́masí nɛ́ ɛvhá ndrɛ bh'onzía, ka nɛ́ ka nɔ́hɨ́ to ngwá nɛ́, onía bhó yánɛ́ngwɛ nɔ́gɨ néigwa andrɔ nɛ́, bh'ɔhɨa to ándra bh'aádrua nɔ́ yánɛ́ngwɛ^c. › 29 Bhe áasí sɔ́ ɨ́ kábwʉ, ányɛrɨ́ tónórue, ká hɛ́ áángwɛ́ átapá kana bhu náyá kana nɛ́. Bhe ámábhúlómbíé n'ɔá bh' ɔgɨ́a nándrɔ, bh'ɛvhá ndrɛ bh'onzía ka nɛ́ ka nɔ́hɨ́ to ngwá nɛ́. 30 Bhe yánɛ́ngwɛ ámésóórúé kééká bhu nándrɔ nɛ́, bh'onzía ká bhu nɛ. 31 Bhe ámɛ́sɔ́tá bhe kéeká bhu nándrɔ nɛ́, bh'onzía ká bhu nɛ. Bhe ɨ́hɛ kpɛ́ ányɛrɨ́ tónórue kátá ánandrɔ nɛ́, bhe kónzía ɨ́hɛ kpɛ́ ka nɛ́ ka kɔ́hɨ́ to ngwá nɛ́. 32 Átámɛ́zaa, bhe nándrɔ nɛ́ ɛvhá táo nɔgɔ bhu nɛ ndrɛ, bh'onzía. 33 Hee bhe ma ú maɨa táo ndó átɛtɨánɛ i ómbi kóruba to nɛ́, nándrɔ nɛ́ ɔgɔba adhíngwɛ ? Outo nɛ́, sɨ́ ɨ́hɛ kpɛ́ ányɛrɨ́ tónórue kábwʉ sɨ́ káángɔgɨ́ nɛ^d. » 34 Hee bhe Yésu akɛ́lyá kála bhó « Ɛ́masí ánandrɔ́ si nápɛ i anɛ ká ú káágɨa nyɛ aágɨ. 35 Nɔ́dhyɔkana, ési Angéle a ú ogwá sɨ́ ɨ́n'aátá bhó kóruba átéígo i ómbi amónzi anyɛ, bhó bhe kóbhúba átɛƗnyɨgwa i bhándrɛ i a ú ekuba nɛ́, káágɨba ka bhó nyɛ. 36 Outo nɛ́, káátɛba ka bhó nyonzí bhó, sɨ́ kɔ́kʉba bhó nyɛ sɨ́ɨ́sɔ́ áángelú. Kóbhua bhó ɛ́gyándrɛ́ si Angéle bha nɛ́, outo nɛ́, sɨ́ kóbhua káángorú átonzi. 37 Bhe átɔdhyɔ i ómbi amónzi anyɛ, Mʉ́sɛ a ú aádhá ngbádhá bhó kóruba móru^e. Átadhɨnga i Mʉ́sɛ a ú odrwá ɨ to nɔ́dhyɔ i ogwobwʉ to náago a n'ovha átɛ́gbɔ́gɔ, ámɛ́gbɔ́gɔ ka nɛ́ ka nɔ́pɛ táo nɛ́, a ú onga nɛ́Ɨ́nyɨ́ Angéle bhó ‹ Angéle i Ábaráma bha nɛ́, Angéle i Isáka bha nɛ́ bhu Angéle i Yakóbho bha nɛ́. › 38 Angéle ɨ́n'a Angéle i ómbi amɔ́ra anyɛ, ka ɨ nɛ Angéle i ómbi amónzi anyɛ. Outo nɛ́, sɨ́ ómbi ndúbhu si manga hɛ ndó ómbi amónzi nɛ́, ɨ́hɛ kpɛ́ ká nɔ́ɔ ómbi amɔ́ra. » 39 Hee bhe áadhaadhɔí si nƆ́ʉbwɔ anɛ ákʉ́ɛ́ sɔ́ ɨ́ kɛ́ɨ́ngá nɛ́mabelu, kɔ́dhya bhó « Náadhaadhombíé, mɨ́ɨ́ngɔdhyɔ́ mɔmbɛ́ ! » 40 Kɔ́dhyɔ́bwʉ sɔ́, sɨ́ kabwʉ ɨ bhó ɨ bhó sɨ́ kɔ́ɨ nɛ átɔdhyɔ akʉ́nɛ́.

Yésu a ú aádha bhó Masɨ́ya ɨ́n'a nɛ́Ɨ́nyɨ́ i Davídi bha nɛ́

(Mat. 22.41-46; Mákɔ 12.35-37)

41 Yésu ɔɨa nɔgɔ hɛ bhó « Ɛgya ndrɛ bhásí bhó kɔ́dhyɔ bhó Masɨ́ya ɨ́n'a Davídi ándrɛngwá ? 42 Outo nɛ́, Davídi ɨ́nɛ tɔ́kpɛ a ú ɔdhya sɨ́ nɛ átébúku i ɔ́lyá anyɛ bhó ‹ Nɛ́Ɨ́nyɨ́ Angéle ɔdhyá nɛ́Ɨ́nyɨ́ i bhándrá nɛ́ ko bhó “Kudrí bha ú andrɔ́tɛ́ aatɛ^f, 43 tó bha drɨ́ métua ɨ éetií si bhándrúé nɛ́ únga ká sɨ́ nɛ́gɨya i nyéíka to anúɔ́ɔnzɔ nɛ́.” › 44 Davídi a ú onga táo Masɨ́ya bhó ‹ Nɛ́Ɨ́nyɨ́ ›. Ɛgya ndrɛ bhásí bhó Masɨ́ya bhó nóbhú ká tɔkana Davídi ándrɛngwá ? »

Onía bhó ómbi káángoudrwé bhelé nóhíámɛ́ i áadhaadhɔí si nƆ́ʉbwɔ anɛ anyɛ

(Mat. 23.1-36; Mákɔ 12.38-40)

45 Yésu ɔdhya óudrwaamɨ si bhándrɛ nɛ́ kála áteetu i ómbi ndúbhu si kábwʉ ú kábɔga nɛ nɛ́ kála bhó 46 « Anyárɨ́ ki átɛmbanda i bhó mɨɨ́ngohí ki bhelé sɨ́ áadhaadhɔí si nƆ́ʉbwɔ anɛ ! Ɨ́hɛ kɔ́ɔ́mʉ́a nyáá ápye bhó nyoubhúbhú drʉ nyɔnga nyɛ ánɛkánzo ɔʉ́dá. Bhe kɔ́ɔ́mʉ́a pima nɔ́dhyɔ i bhó ómbi kábhɨbhɨkya hɛ ánedidílí ro átɛbala mapú nɛ́. Bhe kɔ́ɔ́mʉ́a ká bhu pima bhó nyɔʉrwárwá sɨ́ ékití sé bha ú kétú nɛ́ ápye átɔ́ʉ́sɛ́myágyo bhu ú átáádhú mapú. 47 Bhe ká ú kɔ́vha éígwá ándrɔ́ ányɔɨ ɔ́dhyɔ́ ndúbhu si ká nɔ́ nɛ́, ká hɛ́ kásɛmya kɛkɛlɛ i sɔ́ ɨ́ nɛ́ átɛmbanda i bhó ómbi kógó to hɛ nɛ́. Ɨ́hɛ, Angéle aáoba kála néngbólú ambambó t'angɛ́pɛ. »