Luk 19

Bhe Yésu ekía ndrɛ ú Zakáyɔ bha

1 Átámɛ́zaa, bhe Yésu ekía ndrɛ ú áteYeríko, bh'erímá a n'aáfa átɛ́gbɔ́tɔ́ ándrɛhɔ nɛ́. 2 Ɔ́dhyɔ́ si drɨ́ nɛ́, náasí kana ɨ́n'abwʉ égye ánɛrʉ bhó Zakáyɔ. Ɨ́n'abwʉ nɛ́ndɔ́mbɛ kpɔkpɔ kana i ɛ́páko anyɛ, bhe ɨ́n'abwʉ ká bhu nɛ́mándátíómbíé. 3 Bhe ɨ́n'abwʉ ú abɔnda bhó ndrogwó bhó Yésu ɨ́n'a adhíngwɛ, nɔ́dhyɔkana, sɨ́ ɨ́n'abwʉ ámɛ́ɛrɛ bhe ombirongwɛ abwʉ ká bhu nɛ drʉ nɛ́, kabwʉ nógwó híɛ sɨ́ nógwó to nɛ nɛ́. 4 Hee bha drɨ́ ohía ɨ átɛngɔ bha ú éétú, bh'angóke átɛ́kɨ́rɛ bhó ndrogwó Yésu i abwʉ ú abɔdhyɔ bhó ndrafo drʉ nɛ́. 5 Átadhɨnga i Yésu oópúa ɨ átámɛ́mápue nɛ́, bh'aandría ánɛŋɔ bh'ogwá Zakáyɔ, ɔdhya nɔ́ɔ bhó « Zakáyɔ, késya ɛ́gala, outo nɛ́, sɨ́ átɛtɨánɛ i onía bhó médho ú bhándrúé ! » 6 Bhe Zakáyɔ ɔɔ́sá sɨ́ nésyésya édryata, bh'angékpokpo nɛ ánɛɨgyagya ro ndúbhu ú bhándrɛ. 7 A drʉ ómbi si kábwʉ drʉ nɛ́ kógwá nɔ́dhyɔ nɛ́ nɛ́, bhe kérímá ká hɛ́ kɔ́ʉ́dhya nyɛ Yésu to, ká hɛ́ kɔ́dhya bhó « Káábhá ! Amúgwó ká kiro sɨ́ náasí i aángɔɔ́ nédhédhóyé ú nɛ́másúmúómbíé bha ! » 8 Bhe Zakáyɔ apá ndrɛ, ɔdhya nɛ́Ɨ́nyɨ́ ko bhó « Hee nɛ́nɛ́ nɛ́Ɨ́nyɨ́, má ú máándia átɔ́dhyɔ́ si bhándrá nɛ́ ɔ́rɨandrɛ, bhe máa ɛ́mʉ́dádákúái kála. Mábhúbwʉ máángɔvhɛ ɛ́faránga si nómbí anɛ nɛ́, má ú máátua hɛ nɔ́ɔ ámémírí sɔ́sʉa^a. » 9 Yésu ɔdhya nɔ́ɔ bhó « Átɛtɨánɛ i, Angéle aángɛɨ́rá ómbi si átégyó i nɛ́, sɨ́ nyá bhu mɨ́ nɛ́ngwángwɛ i Ábaráma bha nɛ́^b. 10 Outo nɛ́, ɨ́má nɛ́Ngwángwɛ i nÓmbí bha nɛ́ mékúa ndó ku mánda, ndó bhe mɛ́ɨ́ra ɛ́másúmúi. »

Bhe Yésu ɔgá nátámbá i émólói sɔ́ta anyɛ

(Mat. 25.14-30)

11 Sɨ́ ómbi kábwʉ nyáá ú kábɔga ɛ́tʉ si Yésu abwʉ ú abɔdhyɔ nɛ́, bhe Yésu erímá tɔkana a n'odrwá kála nátámbá nɛ́. Sɨ́ ɨ́n'abwʉ bhó áteYerusalɛ́mɛ ɔʉ́ndɨ́ nɛ́, bhe ómbi kérímá ká hɛ́ káámbá nyɛ bhó, nɛ́Ɨnyɨngwa i Angéle bha nɛ́ okúókú ku nógwó ndrɛ gaa ɨ́ drɨ́. 12 Hee bha drɨ́ ɔdhyá ɨ táo bhó « Náasí kana i a n'ɔhɨ́a ndrɛ áteikuku i nɛ́ɨnyɨ andrɛ nɛ́, ɛngábwʉ bh'ɔá átápɛ́gɔ́ kana ndrɔ́ndrɔ́ bhó ku kɛ́ɨnyɛ́ nɛ́, bhó bhe ndrɛkʉ́a táo. 13 Ɨ́sɛ́ɛ́lɛ́ i bhó ndrɔɔ nɛ́, bh'ongá émólói tɛ́ɛ́vhɛ́ átémólói si bhándrɛ nɛ́, bh'oóbhúa hɛ átɛ́hɔ́rɔkpɔ́ tɛ́ɛ́vhɛ́, ɔdhya kála bhó ‹ Anyɛ́ɨ́nga ɛ́hɔ́rɔkpɔ́ hɛ́, amúge nɔ́ ɔ́dhyɔ́, bhe mubhua nya hɛ́ nyɔʉ́hya nɛ́ tó bha drɨ́ mɛ́kʉ́ba ɨ. › 14 Nɔ́dhyɔkana, ómbi si nápɛ́gɔ́ i bhándrɛ nɛ́ anɛ kábwʉ ká hɛ́ kétía nɛ métí nɛ́. Abobhu a n'ɔdhá néetu nɛ́, ómbi hɛ́ ká hɛ́ kɔ́dha ɔ́dhádhái ándrómotinda bhó ku kéirí égye bhó ka nyapí nɛ bhó nɛ́kʉ́ ku nɔ́nyɛ́ kɔ́tɔ. 15 Ɔ́dhyɔ́ si drɨ́ nɛ́, bh'ɛkʉ́a táo, ká bhó hɛ́ káángɛɨnyɛ́ bhó nɛ nɛ́. Hee bh'ɔdhyá bhó kóngo nɔ́ɔ émólói si aáobwʉ kála ɛ́faránga nɛ́, bhó ndrɛɨ́tɨ bhó bisanga kámbwúa bhásí ɛ́faránga akʉ́ɛ́, átési ndraáobwʉ kála nɛ́. 16 Bhe némólómbíé ámɛ́káná, bh'ekúa bh'apá ndrɛ, ɔdhya bhó ‹ Nɛ́ɨ́nyɨ́, mábá sɨ́ máángambwú ɛ́hɔ́rɔkpɔ́ akʉ́ɛ́ tɛ́ɛ́vhɛ́ átéi nyááobwʉ mʉ́ nɛ́. › 17 Nɛ́ɨ́nyɨ́ ɔdhya nɔ́ɔ bhó ‹ Mɨ́ɨ́ngɛsɨ́ mɔmbɛ́, nyá némólómbíé balí ! Sɨ́ nyábá ámɛ́mɛ́yɔ átédhúngwɛ sasa nɛ́, bha drɨ́ máángɛɨnyɛ́ ɨ mɨ átɛgbɔtɔ tɛ́ɛ́vhɛ́. › 18 Bhe ámésóórúé ekúa, ɔdhya bhó ‹ Nɛ́ɨ́nyɨ́, mábá sɨ́ máángambwú ɛ́hɔ́rɔkpɔ́ akʉ́ɛ́ tɔ́zɛrɛna átéi nyááobwʉ mʉ́ nɛ́. › 19 Nɛ́ɨ́nyɨ́ ɔdhya nɔgɔ nɔ́ɔ bhó ‹ Ɨ́mɨ́, máángɛɨnyɛ́ mɨ átɛgbɔtɔ tɔ́zɛrɛna. › 20 Bhe nákʉ́nɛ́ ekúa, ɔdhya nándrɛ bhó ‹ Nɛ́ɨ́nyɨ́, kugwó ká nɛ́hɔ́rɔkpɔ i bhándrúé nɛ́ a i. Mábá ú móógyá nɛ má nɛ́ máɔ́ká nɛ átogi aapɛ́mbɛ́lɛ́ nɛ́. 21 Mábá ánɛɛrʉ i bhándrúé nɛ́, outo nɛ́, sɨ́ nyá náasí ambambó. Nyá ú nyáárɨ́a ɔ́dhyɔ́ si ka nyétu bha mɨ́ nɛ́, bhe nyá ú nyɔ́ʉ́drwa ndru átɛ́ɨ́pwɔ́ si ka nɛ́ ka nyɛ́dhɨ bha mɨ́ nɛ́. › 22 Nɛ́ɨ́nyɨ́ ɔdhya nɔ́ɔ bhó ‹ Nyá némólómbíé biti ! Má ú máfa andruɛ́ngbanga sɨ́ anúɔ́tɔtʉ tɔ́kpɛ ! Nyábá ú nyɛ́ɨ́tɨ́a ɛɨ́tɨ bhó má náasí ambambó, bhó bhe máárɨ́a aárɨ́ ɔ́dhyɔ́ si ka nɛ́ ka métu bha má nɛ́, bhó bhe mɔ́ʉ́drwa ndra ɔʉ́drwa átɛ́ɨ́pwɔ́ si ka nɛ́ ka mɛ́dhɨ bha má nɛ́. 23 Oudhu gyó i kabá nyétu to mʉ́ nɛ́hɔ́rɔkpɔ i bhándrá nɛ́ ú átɛ́bákɨ nɛ́ ? Be andrɔ́tɛkʉ́ámɛ́, bhe mángopwu bhó nɛ a bhó nɛ́ aángavágá bhó nɛ́. › 24 Hee ɔdhya táo ómbi si kábwʉ drʉ nɛ́ kála bhó ‹ Amʉ́vhɛ ándrɔɨ nɛ́hɔ́rɔkpɔ nɛ́, bhe nyɛɨ́gba nómbí i a nɔ́ tɛ́ɛ́vhɛ́ nɛ́. › 25 Kɔ́dhya nɔ́ɔ bhó ‹ Nɛ́ɨ́nyɨ́, ɨ́n'a bhó nɔ́ tɛ́ɛ́vhɛ́ ! › 26 Nɛ́ɨ́nyɨ́ ɔdhya kála bhó ‹ Má nɛ́ mádhyá nyala nɛ́, nómbí i obhúa ánɔdhyandrɛ nɛ́, bhɛ kóoba nɔ́ɔ ɔ́dhyɔ́ akʉ́ɛ́ móotu pima, bhe nómbí i obhúba ka ɨ nɔ́rɔ dhu tɛtɛrɛ nɛ́, bhe kɔ́vhɛba ándrɔɨ tó bhu nɛ́ngwɛ́ i ɨ́n'a nɔ́ nɛ́. 27 Obhúa átéi éetií si bhándrá nɛ́ anyɛ si kabwʉ kɔ́ɔ́mʉ bhó mányɛ́ kɔ́tɔ nɛ́, anyɛ́mba hɛ zá, bhe mʉpwʉa hɛ ɨ́ drɨ́ andróteetu drɨ́. › »

Bhe Yésu ekía ndrɛ ú áteYerusalɛ́mɛ sɨ́ nɛ́Ɨ́nyɨ́

(Mat. 21.1-11; Mákɔ 11.1-11; Yɔá. 12.12-19)

28 Átɛzaa i ɛ́tʉ hɛ́ anyɛ, bhe Yésu ɔdhá néetu bhó ndreíke bha ú áteYerusalɛ́mɛ. 29 A bhó n'ɔdhya bhó ndroópu bhó bha ú átɛ́bhámoóyé i nɛ́Bɛtɛfága andrɛ bhu átéi nɛ́Bɛtanɨ́a andrɛ nɛ́, bha ú átooholokpɔ i kónga bhó nÓolívɛ ooholo nɛ́, bh'ɔdhá átoudrwaamɨ si bhándrɛ nɛ́ sóórúé bhó kádhádhá. 30 Ɨ́sɛ́ɛ́lɛ́ i bhó nyɔɔ nɛ́, ɔdhya kála bhó « Amʉ́ɔ átɛ́bhámoóyé ndré éétú nɛ́ nɛ́. Nyoópúa bhó pá égye nɛ́, bhe nyaámbwua népúnda adya kana i ka nɛ́ ka ká ɨ kóúkeke to nɛ́, ká hɛ́ kótía nɛ nɛ́. Anyádú nɛ, bhe nyekua nɔ́ mʉ́ zá. 31 Nómbí kana ɔɨ́a aamɨ bhó nya ú nyadúa nɛ outo nɛ́, bhe nyaátua nɔ́ɔ bhó nɛ́Ɨ́nyɨ́ ɨ́n'a ú onía nɛ nɛ. »

32 Bhe óudrwaamɨ hɛ́ sóórúé nɛ́ nɛ́ kɔ́á, bhe káámbwúa ɔ́dhyɔ́ ndúbhu sɨ́ɨ́sɨ́ Yésu ɔdhyɔ́bwʉ kála. 33 Átadhɨnga i kábwʉ ɨ ká hɛ́ kádúa népúnda ngwángwɛ nɛ́ nɛ́, ámómbi kɔ́ɨa hɛ bhó « Oudhu gyó i nya ú nyadúa to népúnda ngwángwɛ nɛ́ nɛ́ ? » 34 Bhe káátúa kála bhó « Nɛ́Ɨ́nyɨ́ ɨ́n'a ú onía nɛ nɛ. » 35 Hee bhe kɛ́mbá Yésu ko népúnda ngwángwɛ nɛ́, bhe kɔ́ʉ́lá ékotí si bhányɛ nɛ́ atépúnda nɛ́ ándreíngú, bhe kéíká to nɛ. 36 Bhe átadhɨnga i Yésu abwʉ ɨ a n'ɔa nɛ́, ómbi ká hɛ́ kɔ́ʉ́la ɔʉ́la ékotí si bhányɛ nɛ́ átéhíɛ nɛ́. 37 A bhó n'ɔʉ́ndɨa bha ú áteYerusalɛ́mɛ, a n'ada bhó nÓolívɛ ooholo nɛ́, bhe óudrwaamɨiro ndúbhu, bhe kérímá ká hɛ́ kɔ́ʉ́bwá Angéle ánɛɨgyagya ro ndúbhu, ányɛtʉ bha drɨ́ bhó drɨ́, átɔ́dhyɔ́ amámbanga pɨ́tɛ́ si kábwʉ káángogwo nɛ́. 38 Ká hɛ́ kɔ́dhya bhó « Angéle nóúfu nɛ́ɨ́nyɨ́ i a ú ekua ɨ́nɛ nɛ́Ɨ́nyɨ́ Angéle tánɛrʉ nɛ́ ! Nɔ́dhyɔ kpílíbhíndí ú átɔrɔ bhu nɔ́ʉ́bwɔ́ʉ́bwɔ́ Angéle ndré ú bhó pima nɛ́ ko. » 39 Bhe ɛ́Mɔfarúsi sɔ́ ɨ́, ési kábwʉ átéígo i ombirongwɛ andrɛ nɛ́, kɔ́dhya Yésu ko bhó « Náadhaadhombíé, kʉdhyɔ óudrwaamɨ si bhándrúé nɛ́ kála ndó kábha drʉ kɔ́dhya sɔ́. » 40 Bhe Yésu akɛ́lyá kála bhó « Má nɛ́ mádhyá nyala nɛ́, káángeégyé nɛ́, bhe óopi kópa ! »

Bhe Yésu omúa áteYerusalɛ́mɛ ándrɔdhyɔ

41 Átadhɨnga i Yésu oópúa ɨ ú áteYerusalɛ́mɛ ɔʉ́ndɨ́ nɛ́, bh'eédrá bh'ogwá ámɛ́gbɔ́tɔ́, bh'omúa átɔdhyɔ i a ú ɛsɨ́ba ndrɛ átombi si égye nɛ́. 42 Ɔdhya bhó « Kɛngwɛ́mbɛ́, tó bhu aamɨ si néYerusalɛ́mɛ anɛ gbagba, be nyɛɨ́tɨ́bá ká ze bhó nɛ́tɨánɛ i a nɛnɛ i aátá bhó anyámbwu to nɔ́dhyɔ kpílíbhíndí nɛ́ ! Bhe gaa ɨ́ drɨ́, ámédhu a nyala ámóogye akíɔ́tɔŋɔ ! 43 Nzúdhá, ɛ́tɨ́anɛ biti ká ú kékuba aanyɔɔ́tɔ. Bhe éetií si bhákíé nɛ́ kógiba aamɨ ánadɔ ro ékílílí, bhe kómbwúba aamɨ, bhe kɛ́ɨ́bwɔba aamɨ átabɛbɛi kpɛ́. 44 Bhe kɛ́ɨdʉ́ba aamɨ ɛ́sɛ́, bhe kɔ́vhaba égyo si bhákíé nɛ́ ɛ́kpɛ́ngbɛ́lɛ́ngbɛ́, bh'obhúba ka ɨ bhu oópí kana i eekéba a n'akpúa ndrɛ dánɛ́ to nɛ́, outo nɛ́, sɨ́ kabá anyɛ́ɨ́tɨ nádhɨnga i Angéle ekúbá ɨ to bhó ku ndranya aamɨ, bhó bhe ndrɛɨ́ra aamɨ nɛ́ ! »

Bhe Yésu agyá ámbulá ú átáángélégyó kpɔkpɔ

(Mat. 21.12-17; Mákɔ 11.15-19; Yɔá. 2.13-22)

45 Bhe Yésu ekía ndrɛ ú átɛ́bálá i náángélégyó kpɔkpɔ andrɛ, bh'ɔtʉ́a a n'odrwá ómbi si kábwu ká hɛ́ kɔ́ʉ́hya ɔ́dhyɔ́ égye nɛ́. 46 Ɔdhya kála bhó « A ú ɔhá ndrɛ átébúku i Angéle bha nɛ́, Angéle a n'ɔdhyá bhó ‹ Négyó i bhándrá nɛ́ ɨ́n'obhuba nɔ́ʉ́sɛ́myágyó. › Bhe aamɨ, nya ú nyeevhíngílía nɛ únga ká sɨ́ nɛ́kámbi i ɛ́ɛ́gʉ́ anyɛ ! » 47 Ɛ́tɨ́anɛ kpɛ́, Yésu abobhu a n'aádha ú átɛ́bálá i náángélégyó kpɔkpɔ andrɛ nɛ́. Bhe ɛ́kɔána kpɔ́kpɔ́ ánaadhaadhɔí si nƆ́ʉ́bwɔ anɛ, bhu táo óúgé si éMoyúda anyɛ, kábobhu ká hɛ́ kɔ́nda bhó nyɔpwʉ nɛ nɛ́. 48 Bhe kabwʉ kɔ́tɨ bhó nyɛsɨ́a bhásí, outo nɛ́, sɨ́ ómbi ndúbhu ányaámbáámbá abwʉ Yésu to, ká hɛ́ kɔ́gá nɛ mɔmbɛ́ nɛ́.