Luk 18

Onía bhó ómbi kásɛmya Angéle ánɛmɔsɨsɨrɨ ro

1 Hee bhe Yésu ɔgá óudrwaamɨ si bhándrɛ nɛ́ kála nátámbá, átɛmbanda i bhó ndraádhɔ to kála bhó onía bhó kásɛmya ánɛmɔsɨsɨrɨ, ka nɛ́ ka kɔ́ɔ́ngɔ nɛ́. 2 Ɔdhya kála bhó « Nézózi kana abwʉ átɛ́gbɔ́tɔ́ kana sɔ́ drɨ́, abɛɛ́rʉ ka Angéle, bh'abogwo ómbi ányɔdhyɔ tápu. 3 Bhe néigwa andrɔ kana abwʉ bhu nɛ égye átɛ́gbɔ́tɔ́ nɛ́, abeku nɔ́ɔ nɔ́dhyɔ́yé átádhɨ́ngɔ́mɛ kpɛ́ bhó ‹ Kufo mʉ́ nɛ́ngbanga i aama bhu néetiombíé i bhándrá nɛ́ nɛ́ ! › 4 Bh'edhá médho ékíní ootu, nézózi nɛ́ a n'aápwua ápye bhó ndrofo ka nɛ́ngbanga nɛ́ nɛ́. Bhe átámɛ́zaa, ɔdhya tándreísú bhó ‹ Bɛsɨ́ngɨ obhúa sɨ́ mɛ́ɛ́rʉ ka Angéle, bhe mágwá ká bhu ómbi ányɔdhyɔ tápu, 5 sɨ́ néigwa andrɔ i a ú aáhúa ma pima nɛ́, má ú máfa ká nɔ́ɔ nɛ́ngbanga i bhándrɛ nɛ́. B'aángekúba bhó bhelé andrádru ándrɔʉ́kpɔ́ʉ́kpáyé nɛ́. › » 6 Bhe nɛ́Ɨ́nyɨ́ Yésu aádrwá tɔkana bhó « Mɨɨ́ngɔga sɨ́ nézózi biti nɛ́ ɔdhyá ! 7 Angéle i ɨ́n'a nómbí balí nɛ́, ofa mófo ómbi si bhándrɛ ányɛngbanga mɔmbɛ́, ési ká ú kómua bha ú a ɨ éiko kpɛ́, ékíní kpɛ́ nɛ́. Oónu ka átɔdhyɔ i bhó ndrɛɛ́wɛ hɛ nɛ́. 8 Má nɛ́ mádhyá nyala nɛ́, ofa kála mófo nɛ́ngbanga mɔmbɛ́ ɛ́gala. Nɔ́dhyɔkana, átadhɨnga i ɨ́má nɛ́Ngwángwɛ i nÓmbí bha nɛ́ mɛ́kʉ́ba ɨ nɛ́, máámbwuba pɨ́tɛ́ nápíápí zá átapɛ i ? »

Bhe Yésu ɔgá nátámbá i nɛ́Mɔfarúsi bhu nɛ́ndɔ́mbɛ i ɛ́páko anyɛ andrɛ

9 Hee bhe Yésu ɔgá tɔkana nátámbá akʉ́nɛ́ ómbi si kábongo nyɛ bhó nya ámɛ́mɛ́yɔ pima Angéle tánɛŋɔ nɛ́ kála, ká hɛ́ kógwá ómbi akʉ́ɛ́ tápu nɛ́. 10 Yésu ɔdhya bhó « Nɛ́tɨánɛ kana, bhe áasí sɔ́ ɨ́ ányɛrɨ́ sóórúé, bhe kéíkébwʉ ú átɛ́bálá i náángélégyó kpɔkpɔ andrɛ bhó ku nyasɛmya Angéle. Náasí akʉ́nɛ́ kana abwʉ nɛ́Mɔfarúsi, bhe nákʉ́nɛ́ abwʉ nɛ́ndɔ́mbɛ i ɛ́páko anyɛ. 11 Bhe nɛ́Mɔfarúsi nɛ́ apá ndrɛ ɛ́nzɛ́lɛ́lɛ́, a n'asɛmya tándreísú nɛ́ bhó ‹ Hiii sɔ́ Angéle, máángɔʉbwɔ́ mɨ ! Gyegye ka ɨ ma bha bha sɨ́ ómbi akʉ́ɛ́ nɛ́. Ési ká ɔ́ɔ́gʉ́, ómbi biti, bhe ká ú kɔ́ɔ́mʉa ándrɔ́ si ómbi anyɛ nɛ́. Bhe mɔ́ʉbwá mɨ Angéle sɨ́ ka ɨ ma bha bha sɨ́ nɛ́ndɔ́mbɛ i ɛ́páko anyɛ ndré. 12 Má ú mémbwua némo átɛ́pɔ́sɔ kana ámémírí sóórúé^a, bhe má ú mááa nédímɛ átɔ́dhyɔ́ ndúbhu si bhándrá nɛ́ si mámbwua nɛ́. › 13 Hee bhe nɛ́ndɔ́mbɛ nɛ́ apá ndrɛ nándrɛ sɔ́ dryɛ́, ka nɛ́ ka ɨ nɔ́rɔ bhu ɔmbɛmbɛ i bhó ndrɛɨ́nga ánɛŋɔ bha ú bhó nɛ́. Hee bh'erímá a n'apopa nɛ́, a n'ɔdhya bhó ‹ Kíkilíaákɔ Angéle, kʉgá ká ngwɛ́ mʉ́ nɔ́dɔ, ɨ́má nɛ́másúmúómbíé ! › » 14 Bhe Yésu aádrwá tɔkana bhó « Má nɛ́ mádhyá nyala nɛ́, nɛ́ndɔ́mbɛ nɛ́ ɔkʉbwʉ bhó ú bhándrɛ, Angéle a bhó n'aángeégi nɔ́ɔ ɛ́masúmu si bhándrɛ nɛ́ ndúbhu nɛ́, ka nɛ́ ka bha bha nɛ́Mɔfarúsi nɛ́ nɛ́. Outo nɛ́, sɨ́ nómbí i eíndría ndrɛ nɛ́, bhe kɛ́ɨ́rya nɛ, bhe nómbí i ɛɨ́rya ndrɛ nɛ́, bhe kéíndría nɛ. »

Bhe Yésu ongá ɛ́gyándrɛ́ sásá bhó kéku bha ú ndra ɨ

(Mat. 19.13-15; Mákɔ 10.13-16)

15 Hee bhe ómbi kɛ́mbá Yésu ko tó bhu ɛ́ngwákʉ́rɛ́ átɛmbanda i bhó nétu kɔ́tɔ ánɛtɛ́ ányótódrú, bhó nóúfu hɛ nɛ́. A drʉ óudrwaamɨ kógwá sɔ́ nɛ́, bhe kérímá ká hɛ́ kémá hɛ bhó káángekú kɔ́rɔ bhelé nɛ́. 16 Bhe Yésu ongá ɛ́gyándrɛ́ sásá hɛ́, ɔdhya óudrwaamɨ kála bhó « Anyábha ɛ́gyándrɛ́ kéku bha zá má ɨ ! Mɨɨ́ngaátʉ́ ányɔɨ bhelé, outo nɛ́, sɨ́ nɛ́Ɨnyɨngwa i Angéle bha nɛ́ ɔgá ómbi si kɔ́kʉ́a nyɛ sɨ́ ɨ́hɛ nɛ́. 17 Má nɛ́ mádhyá nyala nzúdhá-nzúdhá nɛ́, nómbí i ekpokpo ka nɛ́Ɨnyɨngwa i Angéle bha nɛ́ únga ká sɨ́ nɛ́ngángwɛ sasa nɛ́, ekíbhú ka to ndrɛ. »

Ɛ́mándátíi kékíba bhu hɛ nyɛ átɛƗnyɨngwa i Angéle bha nɛ́ ?

(Mat. 19.16-30; Mákɔ 10.17-31)

18 Bhe nóúgé kana i éMoyúda anyɛ ɔɨ́a Yésu bhó « Hee nɛ́ náadhaadhombíé balí ! Onía bhó mɛ́sɨ́ ká bhásí bhó mámbwu nɔ́ra i ɛ́ɨ́zɛ́ kpɛ́ anyɛ ? » 19 Yésu ɔdhya nɔ́ɔ bhó « Oudhu gyó i múnga to ma bhó nómbí balí nɛ́ ? Ka ɨ ombí balí, a sɨ́ Angéle ápye kana. 20 Nyá ú nyɛ́ɨ́tɨ́a ɔ́ʉ́bwɔ́ si Angéle bha nɛ́ si : ‹ Mɨ́ɨ́ngɔɔmʉ́ bhelé nándrɔ i nómbí andrɛ, mɨ́ɨ́ngɔpwʉ́ bhelé nómbí, mɨ́ɨ́ngɛgʉ bhelé, mɨ́ɨ́ngaakí bhelé nɛ́ɨtɔ átómbí, kɛɛ́rʉ apándru bhu yándru. › » 21 Nóúgé nɛ́ aátua nɔ́ɔ bhó « Má ú mɛ́ɛ́rʉ́a ɔ́ʉ́bwɔ́ hɛ́ ndúbhu ɔtʉ́a ndrɛ sɨ́ andrɔ́tɔgbamagbámá. » 22 A drʉ Yésu ɔgá sɔ́ nɛ́, ɔdhya nɔ́ɔ bhó « Nédhu kana a nyáá ú eeká ndrúú tɔkana. Kʉ́ɔ́ bha átɔ́dhyɔ́ ndúbhu si nyá nɔ́ nɛ́, kɔʉ́hya hɛ, bhe nyóóbhua ɛ́mʉ́dádákúái átámɛ́faránga, be múbhúba pá ánoumbwu ro ú átɔrɔ. Átámɛ́zaa, bhe nyékua, bhe nyédrwá ma. » 23 Bhe átadhɨnga i náasí nɛ́ ɔgá ɨ sɔ́ nɛ́, bh'aádía ánɛgʉgʉ éndrú, outo nɛ́, sɨ́ ɨ́n'abwʉ ánɛmandati ootu.

24 A drʉ Yésu ogwá nɛ a n'aádía ánɛgʉgʉ sɔ́ nɛ́, ɔdhya bhó « Ɨ́n'a ámɛ́kpákpáálá pima átɛ́mándátíi bhó kékí nyɛ átɛƗnyɨngwa i Angéle bha nɛ́ ! 25 Sɨ́ɨ́sɔ́, ɨ́n'a ámɛ́kpákpáálá átɔ́kɔ́ bhó nékí ndrɛ átéípí pólo, bhe ɨ́n'a bhó táo ámɛ́kpákpáálá pima t'angɛ́pɛ átɛ́mándátíómbíé bhó nékí ndrɛ átɛƗnyɨngwa i Angéle bha nɛ́. » 26 Ómbi si kábwʉ ú kábɔga nɛ nɛ́ kɔ́dhya nɔ́ɔ bhó « mbáá ! Bhe adhíngwɛ i aátɛba ká bhó táo bhó ndrɔrá nɛ́ ? » 27 Yésu aátua kála bhó « Nédhu i ómbi káátɛ ka bhó nyɛsɨ́ nɛ́, Angéle ɛsɨ́a mɛ́sɨ́. »

28 Hee Pɛ́tɛrɔ ɔdhya nɔ́ɔ bhó « Ɨtá táo aama si maábabhá ɔ́dhyɔ́ ndúbhu si bháɛ́ nɛ́ bhe madrwá mɨ i nɛ́ ! » 29 Yésu ɔdhya kála bhó « Má nɛ́ mádhyá nyala nzúdhá-nzúdhá nɛ́, nómbí i aángabhá négyó i bhándrɛ nɛ́, ándrandrɔ, maánándrɛhɛ, apanɛ́ bhu yánɛ́, obhúa to ánandra átɛmbanda i nɛ́Ɨnyɨngwa i Angéle bha nɛ́ andrɛ nɛ́, 30 ambwuba mámbwu ɔ́dhyɔ́ ootu tɔkana átadhɨnga i ma to i nɛ́, bh'ambwuba ká tɔkana nɔ́ra i ɛ́ɨ́zɛ́ kpɛ́ anyɛ átɛɨzɛ i a ú ekuba nɛ́. »

Bhe Yésu aábhúa tɔkana bhó ndronziba mónzi bhó bhe ndroruba móru

(Mat. 20.17-19; Mákɔ 10.32-34)

31 Bhe Yésu ɛɨ́ngá óudrwaamɨ si bhándrɛ nɛ́ tɛ́ɛ́vhɛ́ égí sóórúé, bh'oótúa ndrɛ kɔ́rɔ, ɔdhya kála bhó « Amúgwó ká kiro, ma ú méíka bha ú áteYerusalɛ́mɛ. Ɔ́dhyɔ́ ndúbhu si énébi kɔ́hɛ́bwʉ máto, ɨ́má nɛ́Ngwángwɛ i nÓmbí bha nɛ́ nɛ́, ká ú kɛ́sɨ́ba nyɛ égye. 32 Outo nɛ́, ká ú kóoba ma átɛpagáno ányɛtɛ́, bhe kéínvoba ma, bhe kóúnzíba ma, bhe káuba máto áswáswá. 33 Bhe kópyoba ma néfímbo, bhe kɔ́pwʉba ma. Bhe átɛtɨánɛ ámɛ́sɔ́tá^b bhe máruba. » 34 Bhe óudrwaamɨ kabwʉ kɔ́tɨ gba átɛtʉ hɛ́, sɨ́ ányedrú kábwʉ kála ámóogye. Bhe kabwʉ kɔ́tɨ asɔdhyɔ gyó i Yésu ɔdhyɔ́bwʉ bhó ndrɔdhyɔ nɛ́.

Bhe Yésu ɛɨ́rá nɛ́ŋɔʉtɛtombíé kana

(Mat. 20.29-34; Mákɔ 10.46-52)

35 Yésu a n'ɔdhya bhó ndroópu bhó bha ú áteYeríko nɛ́, nɛ́ŋɔʉtɛtombíé kana ɨ́n'abwʉ drʉ a n'odría átéhíɛ ándrabɛ́, a n'oúnía ɔ́dhyɔ́ nɛ́. 36 A drʉ nɛ́ŋɔʉtɛtɛtombíé nɛ́ ɔgá ombirongwɛ a n'ɛɨ́bwa nɛ́, ɔɨa átombi si kábwʉ nɔ́tɔ ɔʉ́ndɨ́ nɛ́ bhó « Asɔdhyɔ gyó i a ú afa nɛ́ ? » 37 Kɔ́dhya nɔ́ɔ bhó « Yésu i nɛ́Náázarɛ́tɛ andrɛ a nɛ n'afa nɛ́ nɛ́. » 38 Hee bh'eigá ándrɛtʉ́ a n'ɔdhya bhó « Yésu Davídi ándrɛNgwá, kʉgá ká mʉ́ nɔ́dɔ ! » 39 Bhe ómbi si kɔ́dhabwʉ néetu nɛ́, bhe kérímá ká hɛ́ kɔ́ʉ́ngbá nɔ́ɔ bhó néégye ékpílíbhíndí nɛ́, bh'erímá táo a n'eígá ándrɛtʉ́ kpárá i sɔ́ ɨ́ nɛ́ bhó « Davídi ándrɛNgwá gwa, kʉgá ká mʉ́ nɔ́dɔ ! » 40 Hee bhe Yésu apá ndrɛ, ɔdhya bhó « Anyɛ́mba mʉ́ nɛ zá ! » Átadhɨnga i nɛ́ŋɔʉtɛtombíé nɛ́ oópúa ɨ ɔʉ́ndɨ́ nɛ́, Yésu ɔɨa nɛ bhó 41 « Nyá ú nyɔ́ɔ́mʉ́a bhó mɛ́sɨ́ mɨ́o oudhu ? » Bh'akɛ́lyá nɔ́ɔ bhó « Nɛ́Ɨ́nyɨ́, ndó mágwó ká ngwɛ́ tɔkana ! » 42 Yésu ɔdhya nɔ́ɔ bhó « Hee kugwó tɔkana ! Sɨ́ mɨ́ɨ́ngapí ma nɛ́, mɨ́ɨ́ngɔra. » 43 Hee bh'ɔɔ́sá sɨ́ nógwo tɔkana, bh'erímá a n'odrwá Yésu, a n'ɔʉ́bwá Angéle nɛ́. A drʉ ómbi ndúbhu kógwá sɔ́ nɛ́, bhe kérímá ká bhu hɛ ká hɛ́ kɔ́ʉ́bwá Angéle nɛ́.