Su Bagu a Dunia
21
Na nailay ku menem su bagu a langit enggu lupa. Ka naawa den su danden a langit enggu lupa apeg den nu manga lagat. 2 Na nailay ku menem su suti a siudad a su bagu a Awrusalim a 'bpangalimbaba ebpun sa sulega a mana su babay a pegkawingen a adil den a benal kanu 'gkadtampung'in. 3 Na nakakineg aku menem sa suala a matanug a ebpun kanu Kulesi sa nia nin pedtalun na“Ilay nu! Saguna na su pendalepan nu Kadenan na sia den kanu manusia!
Tapiden nin silan taman sa mabaluy den silan a taw nin enggu sekanin i Kadenan nilan.
Na su Kadenan na lu kanilan!
4 Pamunasan nin su manga lu nu mata nilan.
Na da den kapatay,
da den kapaguguliang,
da den lidu na ginawa,
da den magedam a masakit.
Ka su langun nu danden na iniawa den.”
5 Na nia pidtalu nu 'bpagagayan kanu Kulesi na “Ilay nu! Pembagun ku den su langun-langun!” Na nia nin pan pidtalu sa laki na “Isulat'engka su entu ka su nia a kangadtalu na kasaligan enggu bantang!” 6 Na pidtalu nin bun sa laki i “Napasad den! Saki ba su Punan-punan enggu su Kapupusan, su Kadenan iganat sa ganatan taman sa taman. Na apia entain i 'gkamalan na painemen ku sa dala bayad'in a ebpun kanu bualan nu ig a pakaenggay sa uyag-uyag a da taman nin. 7 Na apia entain i manaban na matalima nin su langun nu entu enggu saki i mabaluy a Kadenan nin enggu silan menem na mabaluy a manga wata ku. 8 Ugaid'a su manga taw a dala paninindegan nin, su di 'bpamaginugut, su manga talampasa i galebek'in, su manga talibunu, su pedsisina, su 'bpamangalintaw, su manga pedsimba sa balahala enggu su langun nu manga budtuden na idtug silan kanu 'bpangalaw-kalaw i apuy nin a aden sandawa nin a pedsebu-sebu. Na entu ba su ikadua a kapatay.”
9 Isa kanu pitu kataw a malaikat a nakadtatanggit sa pitu timan a langgungan a napenu nu manga nauli den a tiuba i minubay sa laki sa nia nin pidtalu na “Sia ka, ka ipailay ku sa leka su babay a pakadtampung'u Manguda a Bili-bili.” 10 Na linemangkap sa laki nu Suti a Ruh na mana init aku nu malaikat lu kanu untul'u malambeg a palaw ka inipasandeng'in sa laki su suti a siudad a su Awrusalim a 'bpangalimbaba ebpun kanu adapan nu Kadenan lu sa sulega. 11 Na lu kanu entu su sigay nu Kadenan a pedsigay a mana balaalaga a watu a yaspir enggu mana kalingaw na katia. 12 Na inalad sa makapal enggu malambeg a aden sapulu enggu dua a bengawan nin. Na uman i bengawan nin na aden pedtameng lun a malaikat. Na inisulat kanu uman i bengawan nin su uman i ngala nu sapulu enggu dua a muliataw nu Israil. 13 Na su manga bengawan a entu na telu timan i sia tampal kanu sebangan, telu timan i sia kanu ilud, telu timan i sia kanu laya enggu telu timan bun i sia kanu sedepan. 14 Na su alad'u siudad na sapulu enggu dua i udsadan nu palaus'in a nakasulat kanu entu su uman i ngala nu sapulu enggu dua a sinugu nu Manguda a Bili-bili. 15 Na su malaikat a mimbitiala sa laki na pegkapet sa ibpanembu a bulawan ka 'bpanembun nin su siudad, su alad'in enggu su manga bengawan nu entu. 16 Na edsulung-sulung su kaulad'u siudad ka isa bu i tilenduan nin, balawagan nin enggu kalambeg'in. Na enggaga-dua gatus enggu patpulu ngibu lenet i balawagan nin, tilenduan nin enggu kalambeg'in. 17 Na tinembu nin bun su alad'u siudad. Na nia nin kakapal na dua gatus enggu sapulu enggu nem kapis sia luyud kanu tembu nu manusia a isa bu kanu tembu a inusal'u malaikat. 18 Na su alad'in na ebpun sa balaalaga a watu a yaspir enggu su siudad na bulawan a da simbul'in a mana su kalingaw nu katia. 19 Na uman i udsadan nu palaus'u alad'in na pibpalasan sa balaalaga a manga watu. Su ika-isa a udsadan nin na su balaalaga a watu a yaspir, su ikadua na sapiru, su ikatelu na agat, su ikapat na imirald, 20 su ikalima na uniks, su ikanem na rubi, su ikapitu na krisulitu, su ikawalu na biril, su ikasiyaw na tupas, su ikasapulu na krisuprasu, su ikasapulu enggu isa na asintu enggu su ikasapulu enggu dua na amitis. 21 Na su sapulu enggu dua menem a bengawan nin na uman i sakabengawan na balaalaga a watu a tipay. Na su maulad a lalan nu siudad na bulawan a dala simbul'in a mana kalingaw na katia.
22 Na lu kanu entu a siudad na dala nailay ku a suti a 'bpagagaman ka nia tidtu-tidtu a 'bpagagaman lu na su Kadenan a Mapulu a Barakat sa Langun enggu su Manguda a Bili-bili. 23 Di den nasisita sia su senang enggu su ulan-ulan a makatayaw kanu siudad ka su sigay den nu Kadenan i pakatayaw kanu siudad enggu nia den palitan na su Manguda a Bili-bili. 24 Na lemalakaw kanu kalinawag'in su manga bangsa. Na su manga datu nu dunia na ipalad'ilan lu su kabadtugan nilan. 25 Na su manga bengawan nin na dikena den 'bpamintuan ka dala den magabi lu. 26 Na su manga taw a ebpun kanu manga bangsa na ipalad'ilan lu su kabadtugan enggu kakawasan nilan. 27 Na dala pakaludep lu a apia ngin a dikena suti atawa ka apia entain a penggalebek sa kamustakilan atawa ka kabudtud. Ka nia bu mamakaludep lu na su manga taw a nakasulat i ngala nin kanu libelu nu Manguda a Bili-bili a su libelu a sinulatan kanu manga ngala nu mamakatalima kanu uyag-uyag a da taman nin.